ភ្ញៀវទេសចរចេញដើរកម្សាន្ត កើនជាងសប្ដាហ៍មុន ១.២៧% សរុបជិត ១៤ម៉ឺននាក់

​​រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងនៅ​ថ្ងៃទី២៥ ខែតុលា ឆ្នាំ២០១២១នេះថា ក្នុងរយៈពេល៣ថ្ងៃ គឺថ្ងៃទី២៣ ដល់ថ្ងៃទី២៤ ខែតុលានេះ ដែលជាថ្ងៃចុងសប្តាហ៍កន្លងទៅនេះ ភ្ញៀវទេសចរដែលបានចេញដើរទស្សនាកម្សាន្ត កើនជាងសប្ដាហ៍មុន ១.២៧% មានចំនួនសរុប ​១៣៩,៨៦៤ នាក់ ក្នុងនោះមានភ្ញៀវជាតិ​ ១៣៦,៤៩៨នាក់ និងភ្ញៀវបរទេសផ្ទៃក្នុង ​៣,៣៦៦ នាក់។

បើតាមលោក ថោង ខុន បានលើកឡើងថា ​​គោលដៅទេសចរណ៍សំខាន់ៗ ដែលភ្ញៀវទេសចរធ្វើដំណើ​រ​កម្សាន្ត​​រួមមាន៖ ​ខេត្តព្រះសីហនុ ៣០,៩២៦នាក់, រាជធានីភ្នំពេញ ២៥,៤៩៣នាក់, ខេត្តកំពត ១៧,៩៧៤នាក់, ខេត្តកែប ៩,៦១៦នាក់, ខេត្តសៀមរាប ៨,៦១៨នាក់, ខេត្តកំពង់ស្ពឺ ៧,៨៨៥នាក់, ខេត្តមណ្ឌលគិរី ៥,៩៨៤នាក់, ខេត្តពោធិ៍សាត់ ​៥,៦៦៥ នាក់ និងខេត្តកណ្តាល ៥,៣២៥ នាក់។

លោក ថោង ខុន បាន​កត់សម្គាល់​​ថា តួលេខ​នេះ​មាន​ការ​កើនឡើង​ប្រមាណ​ ១.២៧ ភាគរយ បើធៀបនឹងសប្តាហ៍កន្លងមក។

​តាមលោក ថោង ខុន​ ខេត្តតំបន់ឆ្នេរសមុទ្រ ពិសេសខេត្តព្រះសីហនុ កំពត និងកែប ជាគោលដៅសំខាន់ ដែលបានស្រូបទាញភ្ញៀវទេសចរច្រើន រហូតដល់ប្រមាណ​ ៤២ ភាគរយ នៃចំនួនភ្ញៀវសរុប។ ទន្ទឹមនឹងនេះ ខេត្តសៀមរាប ក៏បានបង្ហាញសញ្ញានៃការងើបឡើងវិញជាបណ្តើរៗ ខណៈដែលគោលដៅទេសចរណ៍ខេត្តកំពង់ស្ពឺ មណ្ឌលគិរី ពោធិ៍សាត់ នៅតែជាគោលដៅពេញនិយមនាចុងសប្តាហ៍កន្លងមក។

លោករដ្ឋមន្ត្រីក្រសួងទេសចរណ៍បានគូសបញ្ជាក់ថា សភាពការណ៍ជារួម មិនមានបញ្ហាអ្វីគួរកត់សម្គាល់ទេ ខណៈដែលរដ្ឋបាលរាជធានីខេត្ត មន្ទីរទេសចរណ៍ បានបន្តយកចិត្តទុកដាក់ក្នុងការពង្រឹងការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) នៅតាមមូលដ្ឋានអាជីវកម្ម និងគោលដៅទេសចរណ៍នានា ពិសេសការអនុវត្តវិធានការ ៣កុំ និង៣ការពារ៕

អត្ថបទ៖ កោះកែវ