ព័ត៌មានជាតិ

ប្រធានមន្ទីរសាធារណការខេត្ត ស្នើសុំឲ្យម្ចាស់រថយន្តធុនធ្ងន់ ចូលរួមគោរពច្បាប់ចរាចរណ៍

បានផុស

៤ years មុន

នៅ

ថ្ងៃសៅរ៍ ២៤ តុលា ២០២០

ដោយ

ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោក សំ លាងទ្រី បានស្នើសុំឲ្យម្ចាស់រថយន្តដឹកទំនិញធុនធ្ងន់ទាំងអស់ ដែលធ្វើចរាចរណ៍លើផ្លូវមួយចំនួន ក្នុងភូមិសាស្ត្រខេត្តព្រះវិហារ មេត្តាចូលរួមគោរពច្បាប់ចរាចរណ៍ផ្លូវគោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ថែមពីនោះ ត្រូវចៀសវាងឲ្យបាននូវការដឹកជញ្ជូនទំនិញលើសទម្ងន់កម្រិតកំណត់ ដែលធ្វើឲ្យខូចផ្លូវ។

ការស្នើសុំបែបនេះរបស់ លោក សំ លាងទ្រី បានធ្វើឡើង កាលពីថ្ងៃទី២៣តុលា ខណៈលោក ចុះពិនិត្យមើលស្ថានភាពជាក់ស្ដែង ការដ្ឋានថែទាំប្រចាំ នៅលើផ្លូវជាតិលេខ៩៤ ពីទីរួមស្រុកឆែប ទៅកាន់ឃុំកំពង់ស្រឡៅ១ ស្រុកឆែប ខេត្តព្រះវិហារ(ព្រំដែនកម្ពុជា-ឡាវ)។

លោក សំ លាងទ្រី បានមានប្រសាសន៍ថា ថ្ងៃនេះ លោកបានចុះពិនិត្យស្ថានភាពជាក់ស្ដែងការដ្ឋានថែទាំប្រចាំ នៅលើផ្លូវជាតិលេខ៩៤ ពីទីរួមស្រុកឆែប ទៅកាន់ឃុំកំពង់ស្រឡៅ១ ស្រុកឆែប ខេត្តព្រះវិហារ(ព្រំដែនកម្ពុជា-ឡាវ)។

លោកបញ្ជាក់ថា ផ្លូវនេះ ត្រូវបានក្រុមការងារ មន្ទីរសាធារណការ និងដឹកជញ្ជូនខេត្តព្រះវិហារ ធ្វើការជួសជុល ដោយកៀរសម្រួល ថែមក្រួសក្រហម ស្រោចទឹក កិនបង្ហាប់។

បច្ចុប្បន្ន អាចឲ្យចរាចរណ៍បានល្អប្រសើរឡើងវិញហើយ បន្ទាប់ពីផ្លូវមួយខ្សែនេះ ទទួលរងផលប៉ះពាល់ ខូចខាតដោយអន្លើ ពីជំនន់ទឹកភ្លៀងរយៈពេលកន្លងមក។

ដើម្បីធានាសុវត្ថិភាព និងថែរក្សាផ្លូវថ្នល់ឲ្យប្រើប្រាស់បានយូរអង្វែង លោកបានសូមឲ្យម្ចាស់រថយន្តដឹកទំនិញធុនធ្ងន់ទាំងអស់ មេត្តាចូលរួមគោរពច្បាប់ចរាចរណ៍ផ្លូវគោក ចៀសវាងការដឹកជញ្ជូនទំនិញលើសទម្ងន់កម្រិតកំណត់ ដែលធ្វើឲ្យផ្លូវថ្នល់ងាយនឹងទទួលរងប្រេះ ស្រុត ខូចខាតឆាប់រហ័ស៕