លោកស្នងការ ស ថេត ចូលខ្លួនបង់​ការផាកពិន័យ ចំពោះកំហុសមិនពាក់មួកសុវត្ថិភាព ពេលរួមដំណើរដោយជិះ​ម៉ូ​តូ

លោកឧត្តមសេនីយ៍ឯក​ ស​ ថេត​ អគ្គស្នងការរង​ និងជាស្នងការនគរបាលរាជធានីភ្នំពេញ​ នៅព្រឹកថ្ងៃទី២៧ ខែតុលា ឆ្នាំ ២០២១នេះ បានអញ្ជើញទៅបង់ការផាកពិន័យ តាមច្បាប់ចរាចរណ៍ផ្លូវគោក​ ទាក់ទងទៅនឹងការរួមដំណើរដោយមិនបានពាក់មួកសុវត្ថិភាព នៅពេលដែលលោកស្នងការ​ ចុះពិនិត្យ​ និងលើកទឹកចិត្តកងកម្លាំង​ ក៏ដូចជាការត្រួតពិនិត្យស្ថាន ភាពគ្រោះទឹកជំនន់ នៅទឹកដីខណ្ឌដង្កោ​ រាជធានីភ្នំពេញ​ កាលពីព្រឹកថ្ងៃទី២៦ ខែតុលា ឆ្នាំ២០​២១។

បើតាមស្នងការដ្ឋាននគរបាលរាជធានីភ្នំពេញ បានឲ្យដឹងថា ​លោកស្នងការ​ មិនបានពាក់ពួកសុវត្ថិភាព ​នៅពេលនោះព្រោះថា​ ទីតាំងនោះជាទីតាំង ដែលកំពុងរងគ្រោះដោយទឹកជំនន់​ ទីតាំងកំពុងប្រឈមនឹងហានិភ័យ​ ជាទីតាំងដែលកម្លាំងគណ:បញ្ជាការឯកភាព កំពុងតែជួយសង្គ្រោះប្រជាពលរដ្ឋ​ សហការគ្នាទប់ស្កាត់​ និងបញ្ជៀសទឹកជំនន់​ ជាពិសេសជា ទីតាំងដែលរដ្ឋបាលរាជធានីភ្នំពេញ​ បានបិទ​ហាមមិនឲ្យយានយន្តគ្រប់ប្រភេទ ធ្វើចរាចរណ៍ឆ្លងកាត់តំបន់នេះឡើយ៕