សមត្ថកិច្ចឃាត់ខ្លួនបុរសម្នាក់ ក្រោយកាន់កាំបិតនៅដៃ ហើយដើរឆ្លងដែនទៅទឹកដីថៃ

យុវជនម្នាក់ ដៃម្ខាងកាន់កាំបិត និងម្ខាងទៀតកាន់ដែកឆាប លោតឡើងលើដំបូលរថយន្ត របស់សមត្ថកិច្ចដោយមិនដឹងហេតុផល បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចយ៉ាងច្រើន។ ករណីនេះលោកវរសេនីយ៍ទោ វេ គឹមចត់ អធិការនគរបាលស្រុកកំរៀង បានប្រាប់ថា ករណីដែលបង្កការភ្ញាក់ផ្អើលខាងលើនេះ ស្ថិតនៅចំណុចមាត់ច្រកទ្វាអន្តរជាតិដូង បង្កឡើងដោយយុវជនម្នាក់ កើតឡើងនៅរសៀលថ្ងៃទី ២៧ ខែតុលា ឆ្នាំ២០២១ ត្រង់ចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង។

យុវជនបង្កឈ្មោះ ម៉ែន សុឃឿន ភេទប្រុស អាយុ ២៣ឆ្នាំ រស់នៅភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបងក្នុងស្មារតីវ ង្វែង (បែក) ដោយសារឥទ្ធិពលគ្រឿងញៀន មានកម្រិតច្រើន។

លោកអធិការបន្តថា យុវជនរូបនេះនៅថ្ងៃកើតហេតុ បានធ្វើដំណើរពីផ្ទះទៅដល់ចំណុចមាត់ច្រកទ្វាអន្តរជាតិ ក្នុងគោលបំណឆ្លងដែនចូលក្នុងទឹកដីថៃ ហើយក៏ស្រាប់តែរត់ឡើងលើដំបូលរថយន្ត របស់សមត្ថកិច្ចនគរបាល ដែលកំពុងប្រតិបត្តិការការងារ ដែលដៃម្ខាងប្រដាប់ដោយកាំបិត និងម្ខាងទៀតកាន់ដែកឆាបគ្រវីគ្រវាត់ចុះឡើងៗ ស្រែកឡូឡា ដោយភ្លាមៗ នោះសមត្ថកិច្ចមិនទាន់ហ៊ានចូលក្បែរនោះទេ។

មួយសន្ទុះក្រោយមក ជនបង្កបានលោតចុះមកក្រោមវិញ ហើយក៏រត់ឆ្លងដែនចូលក្នុងទឹកដីថៃ ហើយទាំងសមត្ថកិច្ចកម្ពុជា ទាំងថៃ បានប្រើជំនាញលួងលោម ទើបឈានដល់ឃាត់ខ្លួនបាន ហើយនាំខ្លួនទៅសាកសួរនៅអធិការនគរបាលស្រុកកំរៀង ដើម្បីអនុវត្តតាមនីតិវិធី៕

អត្ថបទ៖ សៅ សារិទ្ធ