ផ្ទេរ​តំណែង​ប្រធានច្រកទ្វារព្រំដែនអូរយ៉ាដាវ ទៅកាន់​តួនាទី​ជា​​​អភិបាល​ស្រុក​អណ្តូងមាស

ខេត្តរតនគិរី÷ លោក ញ៉ែម​ សំអឿន អភិបាលនៃគណៈអភិបាលខេត្តរតនគិរី បានអញ្ជើញជាអធិបតីភាព ក្នុងពិធីប្រកាសផ្ទេរភារកិច្ចប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិអូរយ៉ាដាវ​ នៃខេត្តរតនគិរី​ ​ដោយមានការចូលរួម ពីលោកមេបញ្ជាការកងកម្លាំងប្រដាប់អាវុធទាំងបីប្រភេទ ថ្នាក់ដឹកនាំខេត្ត ប្រធានមន្ទីរអង្គភាពជុំវិញខេត្ត ព្រមទាំងអាជ្ញាធរស្រុកអូរយ៉ាដាវផងដែរ។

ពិធីនេះប្រារព្ធធ្វេីឡេីងនៅ​ថ្ងៃទី២៦ ខែតុលា ឆ្នាំ២០២១​ នៅទីស្នាក់ការត្រួតពិនិត្យច្រកទ្វារព្រំដែនអន្តរជាតិអូរយ៉ាដាវ។

លោក ញ៉ែម​ សំអឿន អភិបាលខេត្តរតនគិរី​ បានមានប្រសាសន៍ថា​ ពិធីប្រកាសផ្ទេរភារកិច្ចរបស់លោក​ កង​ សារឿន​ ប្រធានស្នាក់ការច្រកទ្វារព្រំដែនអន្តរជាតិអូរយ៉ាដាវ​ ឲ្យទៅកាន់មុខតំណែងជាអភិបាលស្រុកអណ្ដូងមាស​ និង​តែងតាំងលោក​ សាយ​ ចំរេីន​ ជាប្រធានស្នាក់ការច្រកទ្វារព្រំដែនអន្តរជាតិអូរយ៉ាដាវ​វិញ។

ការផ្ទេរភារកិច្ច និងប្រគល់ភារកិច្ចប្រធានស្នាក់ការច្រកទ្វារទ្វេរភាគីព្រំដែន គឺដើម្បីធ្វើការផ្លាស់ប្ដូរបទពិសោធគ្នាទៅវិញទៅមក និងដើម្បីជំរុញឲ្យមានការអភិវឌ្ឍន៍នៅតាមច្រកទ្វារព្រំដែន ព្រោះថាប្រធានទីស្នាក់ការច្រកទ្វារព្រំដែននីមួយៗ គឺមានអាណត្តិរយៈពេល២ឆ្នាំ ដែលក្រសួងមហាផ្ទៃបានកំណត់។

លោកអភិបាលខេត្តក៏បានណែនាំដល់ ប្រធានទីស្នាក់ការច្រកទ្វារព្រំដែនអន្តរជាតិអូរយ៉ាដាវ ត្រូវចេះសហការគ្នាជាមួយសមត្ថកិច្ច និងពង្រឹងកិច្ចសហប្រតិបត្តិការរវាងខេត្តជាប់ព្រំដែន ដើម្បីរួមគ្នារក្សាសន្តិសុខសណ្តាប់ធ្នាប់ នឹងលុបបំបាត់បទល្មើសនានា៕

អត្ថបទ៖ វុទ្ធឦសាន