បញ្ជូនក្រុមសង្គ្រោះចំនួន ២បន្ថែម ខណៈជំនន់ស្ទឹងព្រែកត្នោត បន្តគំរាមកំហែង

ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទមេបញ្ជាការកងទ័ពជើងគោក បានដាក់បទបញ្ជាដល់ក្រុមសង្គ្រោះចំនួន២ បន្ថែមទៀត ដើម្បីជួយសង្គ្រោះប្រជាពលរដ្ឋ ដែលកំពុងរងការ លិចលង់ដោយទឹកជំនន់ នៅក្នុងនោះមានក្រុមសង្គ្រោះ៧១១ នៃកងពលតូចលេខ៧០ និងកង សង្គ្រោះ៧០៦ របស់យោធភូមិភាគពិសេស ខណៈដែលកងសង្គ្រោះលេខ ៩១១ នៃបញ្ជាការដ្ឋានទ័ពពិសេសកងទ័ពជើងគោក កំពុងជាប់ដៃជួយសង្រ្គោះបងប្អូនប្រជាពលរដ្ឋក្នុងខណ្ឌកំបូល នៅរាត្រីថ្ងៃទី២៧ ខែតុលា ឆ្នាំ២០២១នេះ។

សូមជម្រាបថា នៅចំពោះមុខស្ថានភាពជំនន់ទឹកស្ទឹងព្រែកត្នោត ដែលបានវាយលុកក្នុងខណ្ឌមួយចំនួនក្នុងរាជធានីភ្នំពេញ គឺត្រូវបានប្រមុខថ្នាក់ដឹកនាំ បានយកចិត្តទុកដាក់យ៉ាងខ្លាំងដល់សុវត្ថិភាពបងប្អូនប្រជាពលរដ្ឋ។ ក្នុងនោះ អាជ្ញាធរ មន្រ្តីជំនាញ និងសមត្ថកិច្ចកំពុងតែតាមដានយកចិត្តទុកដាក់ ដោយមានការប្រុងប្រយ័ត្នខ្ពស់បំផុត ក្នុងការត្រៀម ជួយសង្រ្គោះប្រជាពលរដ្ឋក្នុងករណីទឹកជំនន់នៅតែបន្តគំរាមកំហែង ដែលអាចបង្កគ្រោះថ្នាក់ជាយថាហេតុណាមួយ៕

អត្ថបទ៖ កោះកែវ