ព័ត៌មានជាតិ

ផ្ទះ២ខ្នងរុះរើសឹងមិនទាន់ និង២ខ្នងទៀតត្រៀមរុះរើ ខណៈច្រាំងទន្លេមេគង្គស្រុតបាក់

បានផុស

៣ years មុន

នៅ

ថ្ងៃសុក្រ ២៩ តុលា ២០២១

ដោយ

លំនៅឋានប្រជាពលរដ្ឋចំនួន២ខ្នង រុះរើស្ទើរតែមិនទាន់ និង២ខ្នងទៀតត្រៀមរុះរើ ខណៈទឹកទន្លេមេគង្គឡើងធ្វើឲ្យបាក់ច្រាំង។ ហេតុការណ៍បាក់ច្រាំងទន្លេមេគង្គ បានកើតឡើងនៅវេលាម៉ោង៥ ល្ងាចថ្ងៃទី២៦ ខែតុលាដោយបាក់ជម្រៅ៣០ម៉ែត្រ និងបណ្ដោយ១០០ម៉ែត្រ នៅក្នុងហេតុការណ៍នេះ ត្រូវបានអាជ្ញាធរគ្រប់លំដាប់ថ្នាក់ចុះអន្តរាគមន៍រហូតដល់វេលាម៉ោង ១ទៀបភ្លឺឈានចូលថ្ងៃទី២៧ ខែតុលា ឆ្នាំ២០២១ ទើបរួចរាល់ស្ថិតនៅភូមិរកាធំឃុំជីរោទ៍ទី១ ស្រុកត្បូងឃ្មុំ។ ទោះជាយ៉ាងណានៅក្នុងហេតុការណ៍នេះ មានម៉ាស៊ីនបូមទឹកមួយគ្រឿងរបស់ពលរដ្ឋ ត្រូវបានបាក់ចូលទៅក្នុងទន្លេបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក តឹក លាង មេឃុំជីរោទ៍ទី១ មានប្រសាសន៍ឲ្យដឹងថា ស្ទើរតែរាល់ឆ្នាំច្រាំងទន្លេមេគង្គ តែងតែបាក់ស្រុតនោះ គឺជាគ្រោះធម្មជាតិដែលបានកើតឡើង។ នៅក្នុងហេតុការណ៍នេះ គឺធ្វើឲ្យលំនៅឋានប្រជាពលរដ្ឋចំនួន២ខ្នង ត្រូវបានរុះរើជាបន្ទាន់ក្នុងនោះរួមមាន៖

១.អុជ មាច ភេទប្រុស អាយុ៦១ឆ្នាំ ផ្ទះមានទំហំ ៥ x១២ម ២.ផ្ទះឈ្មោះ ទូច ស្រីល័ក្ខ ភេទស្រីអាយុ២៧ឆ្នាំ មានទំហំ៤ x៥ ម៉ែត្រប្រក់សស័ង្កសី។ លោកមេឃុំរូបនេះ មានប្រសាសន៍បន្តថា នៅពេលដែលរូបលោកទទួលដំណឹងពីមេភូមិក៏ដូចជាប្រជាពលរដ្ឋក្នុងមូលដ្ឋានភ្លាមៗនោះក៏បានជូនដំណឹងទៅលោកអភិបាលស្រុកត្បូងឃ្មុំដើម្បីឲ្យជ្រាប។

ដោយមើលឃើញគ្រោះធម្មជាតិច្រាំងទន្លេកាន់តែបាក់មកកៀកលំនៅឋានប្រជាពលរដ្ឋទាំងនេះ ជាមួយនោះអាជ្ញាធរ បានប្រកាសតាមមេក្រូហៅប្រជាពលរដ្ឋនៅក្នុងភូមិ ឲ្យមកជួយអន្តរាគមន៍រុះរើលំនៅឋានចំនួន២ខ្នង ហើយនៅក្នុងហេតុការណ៍នេះ ក៏មានវត្តមានអភិបាលស្រុកអភិបាលរងស្រុក បានចុះមកជួយដោយមិនគិតពីការនឿយហត់នោះឡើយ។ ប្រសិនបើមានការយឺតយ៉ាវលំនៅឋានពលរដ្ឋ អាចនឹងត្រូវស្រុតទៅតាមច្រាំងទន្លេចូលទៅក្នុងទឹកទន្លេ។ តែនេះដោយសារមហាសាមគ្គីប្រជាពលរដ្ឋរាប់រយនាក់ ក្នុងនោះរួមមានប្រជាការពារ នគរបាលប៉ុស្តិ៍ អាជ្ញាធរដែនដី ទើបធ្វើឲ្យដំណើរការនេះបានប្រព្រឹត្តទៅលឿន។ ជាមួយនោះក៏មានលំនៅឋានប្រជាពលរដ្ឋចំនួន២ខ្នងទៀត ក្នុងនោះរួមមាន ១.ឈ្មោះ ស៊ុន រូទី ភេទប្រុស អាយុ៤២ឆ្នាំ ផ្ទះមានទំហំ៥គុណ៧ម៉ែត្រ និង ២.ផ្ទះ ឈ្មោះ ចាន់ សុឆន្ទ ភេទស្រី អាយុ៦៧ឆ្នាំ មានទំហំ៤គុណនិង៥ម៉ែត្រ ដែលត្រៀមនឹងរុះរើផងដែរ។

លោកមេឃុំជីរោទ៍ទី១ បានបញ្ជាក់ថា កាលពីឆ្នាំ២០២០កន្លងទៅ ទឹកទន្លេមេគង្គឡើងតូចមិនបានលិចច្រាំងទន្លេនោះទេ ហើយក៏មិនបានធ្វើឲ្យលំនៅឋានប្រជាពលរដ្ឋបានរងការខូចខាតនោះដែរ។ ជាក់ស្ដែងដូចជាច្រាំងទន្លេនៅក្រោយវត្តរកាធំ ដែលបាក់ជាខ្លាំងស្ទើរតែដល់កុដិព្រះចៅអធិការ តែត្រូវបានឯកឧត្តមបណ្ឌិតជាម ច័ន្ទសោភ័ណ អភិបាលខេត្តរួមនិងស្ថាប័នជំនាញបានរៀបចំបាវខ្សាច់ទប់ដោយមិនឲ្យច្រាំងបាក់មកបន្តទៀតនោះទេ៕

អត្ថបទ៖ សាន វិឡែម 