នៅទីរួម​ខេត្ត​តាកែវ ក្ងានមួយក្បាលថ្លៃ១០ម៉ឺនរៀល ចិញ្ចឹម​តែ ៦ ខែ​បាន​ផល

អ្នកចិញ្ចឹម និងអ្នកលក់សត្វក្ងានលាន់មាត់ដូចគ្នាថា ការចិញ្ចឹមក្ងានអាចរកចំណូលបានខ្ពស់ និងចំណេញពេលវេលាក្នុងការចិញ្ចឹមដូចគ្នា បើប្រៀបធៀបទៅនឹងការចិញ្ចឹមសត្វដទៃទៀត។

អ្នកស្រី​ស៊ីម អាជីវករលក់ក្ងានក្នុងទីរួមខេត្តតាកែវបានឱ្យដឹងថា កន្លែងដេប៉ូលក់ក្ងាននេះគឺលក់តែក្ងានឈ្មោលប៉ុណ្ណោះក្នុងលក្ខណៈគ្រួសារដោយក្នុង១ថ្ងៃ អាចបញ្ចេញលក់បានចំនួន៤០ក្បាល។ តម្លៃ​វិញ​ក្នុង១ក្បាលលក់បានថ្លៃ២៥ដុល្លារ ស្មើ​១០​ម៉ឺនរៀល។

អាជីវករ​រូប​នេះបន្ត​ថា អ្នកស្រី​ទើប​លក់ក្ងានថ្មីៗ​នេះទេ ហើយចំពោះអ្នកទិញដែលយកក្ងានឈ្មោលទៅតិចតួចគ្រាន់យកលម្អផ្ទះតែប៉ុណ្ណោះ រីឯអ្នកចាប់ទិញច្រើនគឺជាឈ្មួញកណ្តាលយកក្ងានទៅលក់តាមបណ្តាភោជនីយដ្ឋានធំៗដែលនិយមទទួលទានសត្វក្ងាន។ សត្វក្ងានចិញ្ចឹមពីតូចក្នុងរយៈពេល៥ខែ ទើបអាចធំធាត់ល្អដែលមានទំងន់ចាប់ពី៤គីឡូក្រាមទៅ៥គីឡូក្រាម។ ដោយឡែកបើសិនចិញ្ចឹមក្ងានត្រឹមតែ៣ខែក៏អាចបញ្ចេញលក់បានដែរក្នុងរវាងទំងន់របស់វាត្រឹម៣គីឡូក្រាមក៏អាចទាញយកផលពីវាបានផងដែរ។

បើ​តាម​អាជីវករ​រូប​នេះ​ ការ​ចិញ្ចឹមសត្វក្ងានឆាប់បានផលនិងលក់​បាន​ហាង​ឆេង​ខ្ពស់លើ​ទីផ្សា៕

អត្ថបទ៖ កញ្ញា វ៉ាត