ដើមឈើកណ្តាលផ្លូវ នៅ​ក្រុងសៀមរាប មាន​ទាំង​មតិ​រិះគន់​និង​គាំទ្រ ឥឡូវ​អាជ្ញាធរ​ឆ្លើតតប

ដើមឈើចំនួន២ដើម ដោយមួយដើម ស្ថិតនៅខាងកើតស្ទឹងសៀមរាប ឆៀងខាងជើងស្ពាននាគ ក្នុងសង្កាត់ស្លក្រាម  និងមួយដើមទៀតនៅចំណុចមាត់ស្ទឹងសៀមរាប ខាងកើតក្បែរវត្តព្រះឥន្ទកោសា ក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ទទួលរងការរិៈគន់យ៉ាងខ្លាំងពីប្រជាពលរដ្ឋ ក៏ដូចជាមហាជន ក្រោយពីមានការផ្សព្វផ្សាយតាមបណ្ដាញសារព័ត៌មាននានាថា អាចនឹងបង្កគ្រោះថ្នាក់ដល់អ្នកធ្វើដំណើរ។

ឆ្លើតបសំណួរកម្ពុជាថ្មី លោក សុខ កុល អ្នកនាំពាក្យរដ្ឋបាលខេត្តសៀមរាបបានបញ្ជាក់ថា ដើមឈើនេះពិតជាស្ថិតនៅលើផ្លូវមែន ប៉ុន្តែគេមិនទុកបែបនេះទេ។ លោក សុខ កុល បញ្ជាក់ថា ដើមឈើនេះស្ថិតនៅខាងកើតស្ពាននាគក្រុងសៀមរាប ហើយរូបថតដែលឃើញដើមឈើនៅលើផ្លូវនេះ គឺជាការរៀបចំកសាងផ្លូវដំបូងប៉ុណ្ណោះ “បន្តិចទៀតគេនឹងយកចេញហើយ គេអត់ទុកអញ្ចឹងទេ” ប៉ុន្តែការយកដើមឈើនេះចេញ ត្រូវតែមាននីតិវិធីយកចេញដោយត្រឹមត្រូវ​ចៀសវាង​ការរិះគន់ណាមួយ។

គួររំលឹកថា ដើមឈើចំនួន២ដើមខាងលើ ដែលស្ថិតនៅចំកណ្តាលផ្លូវនេះ ក្រោយមានបណ្ដាញសារព័ត៌មាន ក៏ដូចជាសង្គមហ្វេសប៊ុកមួយចំនួនបានផ្សព្វផ្សាយនោះ មានមតិមួយចំនួនបានគាំទ្រឲ្យមានការកាប់ចេញ ដើម្បីចៀសវាងមានគ្រោះថ្នាក់ដល់អ្នកដំណើរ ប៉ុន្តែចំនួនក៏មិនគាំទ្រឲ្យកាត់ចេញដែរ។

តាមប្រភពមួយចំនួនបានឲ្យដឹងថា នៅរសៀលថ្ងៃ២៩ ខែតុលា ឆ្នាំ២០២១នេះ អាជ្ញាធរបានសម្រេចកាត់ដើមឈើ​១​ដើម នៅខាងកើតស្ទឹងសៀមរាប នៅចំណុចមាត់ស្ទឹងសៀមរាប ខាងកើតក្បែរវត្តព្រះឥន្ទកោសា ក្នុងភូមិបឹងដូនប៉ា សង្កាត់ស្លក្រាម ហើយពីម្សិលមិញ (ថ្ងៃទី២៨ ខែតុលា) ក៏បានកាប់ដើមឈើមួយដើមផងដែរ នៅឆៀងខាងជើងស្ពាននាគ ក្នុងសង្កាត់ស្លក្រាម ក្រុងសៀមរាប៕

អត្ថបទ៖កោះកែវ