ព័ត៌មានជាតិ

បុណ្យអុំទូកខាងមុខ បានឈប់សម្រាកដើរលេងធម្មតា តែអត់អុំទូកទេ

បានផុស

៣ years មុន

នៅ

ថ្ងៃចន្ទ ១ វិច្ឆិកា ២០២១

ដោយ

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ពិធីបុណ្យអុំទូកខាងមុខនេះ រាជរដ្ឋាភិបាលអនុញ្ញាតឲ្យឈប់សំរាក ដើរលេងធម្មតា តែការដើរលេងត្រូវអនុវត្តវិធានការសុខាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន បានមានប្រសាសន៍បែបនេះ នៅក្នុងពិធីប្រកាសបិទយុទ្ធនាការចាក់វ៉ាក់សាំងដល់កុមារអាយុចាប់ពី០៦ឆ្នាំ និងបើកយុទ្ធនាការចាក់វ៉ាក់សាំងដល់កុមារអាយុ៥ឆ្នាំ កាលពីព្រឹកថ្ងៃទី០១ ខែវិច្ឆិកា ឆ្នាំ២០២១។ សម្តេចបញ្ជាក់ថា នៅក្នុងពិធីបុណ្យអុំទូក សំពះព្រះខែ អកអំបុក បណ្តែតប្រទីបខាងមុខនេះ យើងអនុញ្ញាតឲ្យដើរលេងឈប់ធម្មតា។ កន្លងទៅ ពេលភ្ជុំបិណ្ឌ យើងបារម្ភផ្ទុះជំងឺកូវីដ-១៩ចេញពីវត្ត តែយើងរកវិធីធ្វើយ៉ាងណា ដើរលេងត្រូវអនុវត្តវិធានការសុខាភិបាល។

ទាក់ទងបញ្ហានេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃធ្លាប់បានបញ្ជាក់ថា ព្រះរាជពិធីបុណ្យអុំទូកឆ្នាំ២០២១នេះ នឹងមិនអនុញ្ញាតឱ្យមានការប្រារព្ធ ដូចឆ្នាំមុនៗទេ ដោយសារតែការរីករាលដាល នៃជំងឺកូវីដ១៩។ សម្តេចក្រឡាហោម ស ខេង បានបញ្ជាក់ថា “ឥឡូវនេះ ចូលដល់ខែតុលា តាមការសម្រេចរបស់រាជរដ្ឋាភិបាល គឺឆ្នាំនេះយើងមិនបានប្រារព្ធពិធីបុណ្យអុំទូក អកអំបុក ដូចបណ្តា ឆ្នាំមុនៗទេ ដោយសារបញ្ហាកូវីដនេះឯង ប៉ុន្តែនៅឆ្នាំ២០២២ ដែលនឹងឈានចូលមកដល់នោះ យើងមានព្រឹត្តិការណ៍នយោបាយដ៏សំខាន់មួយរបស់ជាតិ ដែលមិនអាចរំលងបាន គឺការបោះឆ្នោតក្រុមប្រឹក្សាឃុំ សង្កាត់។

សូមបញ្ជាក់ថា នៅឆ្នាំ២០២១នេះ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះ ព្រះខែ នឹងត្រូវធ្វើឡើងក្នុងរយៈពេល៣ថ្ងៃ ដោយចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ខាងមុខនេះ៕

ដោយ ៖ កោះកែវ