ព័ត៌មានជាតិ

ព្រះមហាក្សត្រអំពាវនាវឲ្យប្រជារាស្ត្រខ្មែរ នៅទូទាំងប្រទេសផ្អាកការជួបជុំគ្នា

បានផុស

៤ years មុន

នៅ

ថ្ងៃព្រហស្បតិ៍ ៣ ធ្នូ ២០២០

ដោយ

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានអំពាវនាវ ដល់ប្រជារាស្ត្រខ្មែរ នៅទូទាំងប្រទេស ពិសេសបងប្អូនមានពិការភាពសូមឲ្យផ្អាកការជួបជុំគ្នា តាមការណែនាំរបស់ ប្រមុខរាជរដ្ឋាភិបាលកម្ពុជា ដើម្បីចូលរួមទប់ស្កាត់ការឆ្លងរីករាលដាលនៃមេរោគកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវរបស់ព្រះមហាក្សត្រនេះ បានធ្វើឡើងបន្ទាប់ពីប្រទេសកម្ពុជា មានករណីឆ្លងជំងឺកូវីដ១៩ចូលក្នុងសហគមន៍ជាលើកដំបូង ដោយមានអ្នកឆ្លងចំនួន១៩នាក់ ក្នុងចំណោមអ្នកធ្វើតេស្តចំនួន៨៧៦៦នាក់។ ក្នុងចំណោមនោះនៅសល់វត្ថុសំណាកចំនួន៩៦នាក់ទៀត ត្រូវវិភាគនៅថ្ងៃទី៣ធ្នូនេះ។

តាមរយៈព្រះរាជសារផ្ញើជូនជនរួមជាតិក្នុងឱកាសទិវាជនមានពិការភាពកម្ពុជាលើកទី២២ និងអន្តរជាតិលើកទី៣៨ថ្ងៃទី៣ ខែធ្នូ ឆ្នាំ២០២០ ព្រះមហាក្សត្របានផ្ញើនូវសេចក្តីនឹករលឹកនិងជូនពរដល់ជនរួមជាតិជាពិសេសដល់បងប្អូនក្មួយៗមានពិការភាពគ្រប់រូបនិងគ្រប់ក្រុមគ្រួសារ សូមមាន សុខភាពល្អ សុភមង្គល ជៀសផុតពីការរាតត្បាតនៃជំងឺកូវីដ១៩។

ទាក់ទិនជនមានពិការភាពនេះដែរ ព្រះអង្គក៏បានសម្តែង នូវហឫទ័យគាំទ្រ ដោយស្មោះចំពោះរាជរដ្ឋាភិបាលកម្ពុជា ដែលមានឆន្ទៈខ្ពស់ប្រកបដោយភាពប្រាកដនិយម ក្នុងការលើកកម្ពស់សុខុមាលភាពជនងាយរងគ្រោះ ពិសេសជនមានពិការភាព។ ព្រះមហាក្សត្រ ក៏បានលើកទឹកចិត្តដល់រាជរដ្ឋាភិបាលបន្ថែមទៀត ដើម្បីបន្តសកម្មភាពដ៏ល្អប្រពៃថ្លៃថ្លានេះ និងអំពាវនាវផងដែរ ដល់បងប្អូនជនរួមជាតិទាំងអស់ឲ្យបន្តការគាំទ្ររាល់សកម្មភាព នានារបស់រាជរដ្ឋាភិបាលសម្រាប់ជនមានពិការភាព ដើម្បីលុបបំបាត់ ឧបសគ្គរារាំង ឈានទទួលបានឯករាជបុគ្គល ភាពជាម្ចាស់ការឲ្យបានរឹងមាំ ក្នុងទិសដៅសម្រេចបាននូវការលើកកម្ពស់និងការការពារសិទ្ធិរបស់ជនមានពិការភាព៕

អត្ថបទ៖ សំអឿន

Related Topics:ព្រះមហាក្សត្រ