សម្ដេចតេជោ ហ៊ុន សែន ស្នើឲ្យក្រុមការងារធ្វើប័ណ្ណ ឬកាតចាក់វ៉ាក់សាំង ត្រូវដាក់ឈ្មោះអ្នកចាក់ឲ្យបានត្រឹមត្រូវ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើដល់ក្រសួងសុខាភិបាល គណៈកម្មការចំពោះ​កិច្ច​សម្រាប់ការចាក់វ៉ាក់សាំង ក៏ដូចជាក្រសួងការពារជាតិ និងក្រុមការងារចាក់វ៉ាក់សាំងបង្ការជំងឺកូវីដ-១៩ ទាំងអស់​ ខិតខំធ្វើប័ណ្ណ ឬ កាតចាក់វ៉ាក់សាំងជូនប្រជាពលរដ្ឋ ដែលបានចាក់រួចរាល់ ហើយត្រូវដាក់ឈ្មោះឲ្យបានត្រឹមត្រូវ ជាពិសេសនៅលើផ្នែកភាសាអង់គ្លេស។

ការស្នើយ៉ាងដូច្នេះ ដោយសារសម្ដេចតេជោ ហ៊ុន សែន យល់ឃើញថា ប្រជាពលរដ្ឋ ក៏ដូចជាមន្ត្រីរាជការរបស់យើង​មួយ​ចំនួន ចាំបាច់ត្រូវធ្វើដំណើរទៅក្រៅប្រទេស ហើយក្នុងករណីមានការដាក់ឈ្មោះជាភាសាអង់គ្លេស មិនបាន​ត្រឹមត្រូវ ឲ្យដូចទៅនឹងឈ្មោះនៅក្នុងលិខិតឆ្លងដែនទេនោះ គឺពួកគេមិនអាចធ្វើដំណើរចេញទៅ​ក្រៅ​ប្រទេស​បាន​ទេ។

យោងតាមសារជាសំឡេង នៅរសៀលថ្ងៃទី២ ខែវិច្ឆិកានេះ សម្ដេចតេជោនាយករដ្ឋមន្ត្រី បានមានប្រសាសន៍ថា «ដូច្នេះសូមយកចិត្តទុកដាក់ ទៅលើការដាក់ឈ្មោះឲ្យបា​ន​ត្រឹមត្រូវទាំងជាភាសាខ្មែរ និងទាំងជាភាសាអង់គ្លេស សម្រាប់ការប្រើប្រាស់ក្នុងការចេញទៅក្រៅប្រទេស»៕

អត្ថបទ៖ ឃួន សុភ័ក្រ