ព័ត៌មានជាតិ

កម្ពុជានឹងមាន ទីលានប្រណាំងរថយន្ត តម្លៃជាង៣០លានដុល្លានៅឆ្នាំ២០២២ខាងមុខ

បានផុស

៣ years មុន

នៅ

ថ្ងៃអង្គារ ២ វិច្ឆិកា ២០២១

ដោយ

ជនជាតិខ្មែរដំបូងគេម្នាក់បានបោះទុនប្រមាន៣០លានដុលា្លរទៅលើគម្រោងវិនិយោគទីលានប្រណាំងរថយន្តខ្នាតអន្តជាតិជាលើកដំបូងនៅក្នុងប្រទេសកម្ពុជា ។ គម្រោងដែលនឹងលើកមុខមាត់កម្ពុជាលើឆាកអន្តរជាតិនេះ ត្រូវបានវិយោគដោយក្រុមហ៊ុន Maritime Group ដែលមានទីតាំងគម្រោងលើខ្សែដី ១៦០ ហិកតា ស្ថិតនៅតាមបណ្តោយផ្លូវល្បឿនលឿន (Highway)ថ្មី ភ្នំពេញ-ព្រះសីហនុ ចម្ងាយពីរាជធានីភ្នំពេញប្រមាណ៧០គីឡូម៉ែត្រតែប៉ុណ្ណោះ។ ទីលានប្រណាំងរថយន្តនេះត្រូវបានទទួលស្គាល់ដោយស្ថាប័ន FIA (Fédération Internationale de l’Automobile)។ ម្ចាស់នៃគម្រោងវិនិយោគនេះ គឺអ្នកឧកញ៉ា ហេង សិទ្ធី ម្ចាស់ក្រុមហ៊ុន Maritime Group ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Maritime Group បានផ្តល់សិទ្ធិទៅដល់ក្រុមហ៊ុន PHG International ដែលបានឈ្នះក្នុងការដេញថ្លៃដើម្បីសាងសង់គម្រោងនេះឡើងដែលត្រូវចំណាយទុនវិនិយោគសរុប២៦លានយូរ៉ូ ស្មើនឹងប្រមាណ៣០លានដុល្លារអាមេរិក ដោយការវិនិយោគ១០០% របស់ក្រុមហ៊ុនMaritime groupដែលក្នុងនោះរួមមានទីលានប្រណាំងរថយន្ត Formula 3និងកីឡា Moto Sports ជាច្រើនទៀត Shopping Outlet និងរីសតលំដាប់អន្តរជាតិដែរ ។ គម្រោងដ៏ធំនេះ នឹងត្រូវចាប់ផ្តើមបើកការដ្ឋានសាងសង់នៅចុងឆ្នាំ២០២២ខាងមុខ។

សូមជម្រាបជូនថា ក្រុមហ៊ុន Maritime Group គឺជាក្រុមហ៊ុនវិនិយោគនិងអភិវឌ្ឍន៍ពហុវិស័យដែលមានបុត្រសម្ព័ន្ធក្រុមហ៊ុនជាច្រើនរួមមាន ធនាគារឯកទេស Maritime Bank, Maritime Tower ស្ថិតនៅលើផ្លូវ៦០ម៉ែត្រ, កោះស្រមោចនិងក្រុមហ៊ុនជាច្រើនទៀត ។ ចំណែកឯ PHG International ជាក្រុមហ៊ុនអន្តរជាតិដែលមានបទពិសោធន៍ជាង ៣០ ឆ្នាំក្នុងការអភិវឌ្ឍន៍គម្រោងទីលានប្រណាំងរថយន្តជាង២០ប្រទេសលើពិភពលោក រួមមានប្រទេសអារ៉ាប់ បារាំង ប៉ាវ៉ែត និងម៉ាឡេស៊ីជាដើម។

អ្នកឧកញ្ញា ហេង សិទ្ធី អគ្គនាយកក្រុមហ៊ុន Maritime Group បានមានប្រសាសន៍ថា ដោយសង្កេតឃើញថា ប្រទេសជាតិក្រោមការដឹកនាំដ៏ឆ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បាននាំនាវាកម្ពុជាកំពុងហោះទៅមុខឥតឈប់ឈរជាមួយកេរ្តិ៍ឈ្មោះកាន់តែល្បីរន្ទឺនៅលើឆាកអន្តរជាតិជាពិសេសកម្ពុជាបានឈរលើលំដាប់លេខ១ ក្នុងប្រទេសអាស៊ីក្នុងការបង្ការនិងទប់ស្កាត់ជំងឺកូវីដ១៩ បង្កបរិយាកាសដ៏កក់ក្ដៅនិងភាពជឿជាក់កាន់តែខ្លាំងដល់វិយោគិនទាំងជាតិនិងអន្តជាតិ។ ដោយ ភាពសុទិដ្ឋិនិយមនេះហើយទើបធ្វើឲ្យលោកហ៊ានបោះទុនវិនិយោគសាងសង់ទីលានប្រណាំងរថយន្តខ្នាតអន្តរជាតិនេះឡើងដែលពីមុនមកកម្ពុជាមិនធ្លាប់មាននោះទេ។គម្រោងដ៏ធំនេះនឹងរួមចំណែកយ៉ាងធំក្នុងការចូលរួមអភិវឌ្ឍសេដ្ឋកិច្ចកម្ពុជាតាមរយៈការបង្កើតការងារជូនប្រជាជនកម្ពុជារាប់ពាន់នាក់ក៏ដូចជាការទាក់ទាញការវិនិយោគគម្រោងធំៗបន្ត ទៅថ្ងៃខាងមុខ ៕

អត្ថបទ៖ ណារី