លោក គួច ចំរើន ៖ យើងមិនត្រូវចង់បានហួសហេតុពេក ដែលធ្វើឲ្យភ្ញៀវគេខ្លាចរអា ឬរាងចាលនោះទេ

សម្រាប់ការបើកទេសចរណ៍វ៉ាក់សាំង នៅចុងខែវិច្ឆិកានេះ អភិបាលខេត្តព្រះសីហនុ បានលើកឡើងថា ត្រូវតែមានការចូលរួមពីវិស័យឯកជន ដែលធ្វើការងារពាក់ព័ន្ធ នឹងវិស័យសេវាកម្ម និងវិស័យទេសចរណ៍ផ្ទាល់តែម្ដង ដោយមិនត្រូវចង់បានផលចំណេញច្រើនហួសហេតុ ដែលនាំឲ្យភ្ញៀវទេសចរណ៍ខ្លាចរអានោះទេ។

លោក គួច ចំរើន អភិបាល នៃគណៈអភិបាលខេត្តព្រះសីហនុ មានប្រសាសន៍ប្រាប់អ្នកសារព័ត៌មាន នៅថ្ងៃទី១ ខែ​វិច្ឆិកាថា សម្រាប់ការបើកដំណើរការទេសចរណ៍វ៉ាក់សាំង នៅក្រុងព្រះសីហនុ និងក្រុងកោះរ៉ុង នៃខេត្តព្រះសីហនុ នាខែចុងខែវិច្ឆិកានេះ លោកស្នើឲ្យវិស័យឯកជន ដែលបម្រើសេវាកម្មពាក់ព័ន្ធនឹងវិស័យទេសចរណ៍ រួមមាន៖ អាហារ​ដ្ឋា​ន​ សណ្ឋាគារ និងសេវាដឹកជញ្ជូនជាដើម ត្រូវចូលរួមអនុវត្តឲ្យបានខ្ជាប់ខ្ជួន នូវវិធានការសុខាភិបាល ក៏ដូចជាវិធានការសុវត្ថិភាព និងនីតិវិធីប្រតិបត្តិស្តង់ដាអប្បរមា (SOP) សម្រាប់អាជីវកម្មទេសចរណ៍ផងដែរ។

លោក គួច ចំរើន មានប្រសាសន៍បន្តថា សម្រាប់អ្នកទេសចរជាតិ និងអន្តរជាតិ ក៏ដូចជាប្រជាពលរដ្ឋនៅ​មូល​ដ្ឋាន គឺចាំបាច់ណាស់ត្រូវចូលរួមអនុវត្ត ឲ្យបានខ្ជាប់ខ្ជួននូវវិធានការទប់ស្កាត់ ការរាតត្បាតនៃជំងឺកូវីដ-១៩ ឲ្យបានគ្រប់ៗ គ្នា។ ចំណែកបញ្ហាចរាចរណ៍វិញ អភិបាលខេត្តព្រះសីហនុ បានឲ្យដឹងថា អាជ្ញាធរមានសមត្ថកិច្ច នឹងខិតខំប្រឹងប្រែ ង រៀបចំប្រព័ន្ធគ្រប់គ្រងចរាចរណ៍ និងបង្កើនសមត្ថភាព របស់មន្ត្រីនគរបាលចរាចរណ៍ ធ្វើយ៉ាងណាឲ្យពួកគេកាន់​តែមានសមត្ថភាពគ្រប់គ្រង និងដោះស្រាយបញ្ហានេះ ឲ្យកាន់តែល្អប្រសើរ។

ក្នុងនោះដែររដ្ឋបាលខេត្ត ក៏នឹងពិនិត្យមើលទៅលើឥរិយាបថរបស់មន្ត្រី ដែលជាបម្រើសេវាសាធារណៈ ទាំងក្នុង​វិស័​យ​សន្តិសុខ សណ្ដាប់ធ្នាប់ ចរាចរណ៍ និងវិស័យផ្សេងៗទៀត ធ្វើយ៉ាងណាបម្រើភ្ញៀវទេសចរណ៍ឲ្យបានល្អ នៅ​ពេល​ពួកគេ មកដល់ទឹកដីនៃខេត្តព្រះសីហនុ។

លោកអភិបាលខេត្តព្រះសីហនុ បានលើកឡើងដែរថា រាជរដ្ឋាភិបាលកម្ពុជា បានប្ដេជ្ញាចិត្តនៅក្នុងការបើក​ទេស​ចរណ៍​វ៉ាក់សាំងឡើងវិញ ដែលគោលដៅធំបំផុតនៃការបើកនេះ គឺដើម្បីធ្វើឲ្យប្រទេសរបស់យើង ងើបឡើងវិញនូវ​វិស័យសេវាកម្ម ដែលរួមចំណែកដល់ការបង្កើតនូវការងារ និងផ្ដល់ឱកាសដល់ប្រជាពលរដ្ឋ មានការងារធ្វើ និង​មានប្រាក់ចំណូល។

លោក គួច ចំរើន បានលើកឡើងបន្ថែមថា ការបើកទេសចរណ៍វ៉ាក់សាំងនេះ ត្រូវមានការចូលរួមពីវិស័យឯកជន ដែល​​ធ្វើការងារពាក់ព័ន្ធ នឹងវិស័យសេវាកម្ម និងវិស័យទេសចរណ៍ផ្ទាល់តែម្ដង ដោយមិនត្រូវចង់បានផលចំណេញ​ច្រើន ហួសហេតុ ដែលនាំឲ្យភ្ញៀវទេសចរណ៍ខ្លាចរអានោះទេ។ លោកថា «ការបើកបែបនេះ ការដំណើរការបែបនេះ វា​ទាមទារឲ្យមានការចូលរួម ពិសេសគឺអ្នកដែលបម្រើសេវាផ្ទាល់នោះតែម្ដង យើងត្រូវចេះបែងចែក ថា ពិតហើយ​យើងចង់បានប្រាក់ចំណូល យើងចង់មានការងារធ្វើ ដូច្នេះយើងមិនត្រូវចង់បានហួសហេតុពេក ដែលធ្វើឲ្យភ្ញៀវគេ​ខ្លាច​រអា ឬរៀងចាលនោះទេ ចឹងទេត្រូវរួមគ្នាទាំងអស់គ្នា ធ្វើម៉េចគឺថា យើងត្រូវចែករំលែក ថា សុខចិត្តចិញ្ចឹមអ្នក​ទេសចរ ឲ្យគាត់មកយើងឲ្យបានច្រើនដង ចំណូលតិច ប៉ុន្តែគាត់មកច្រើនដង យើងនឹងរស់បានយូរទាំងអស់គ្នា»។

លោក គួច ចំរើន បានបន្ថែមទៀតថា យើងមិនត្រូវគិតតែថា បើកៗ តែមិនបានគិតអំពីការផ្ដល់សេវាកម្ម ដែលជា​ការ​លើ​ក​ទឹ​​ក​​​​ចិត្តដល់អ្នកទេសចរ ឲ្យពួកគេមានការពេញចិត្ត មកលេងម្ដងហើយ នឹកឃើញចង់​មកលេង​ប្រទេស​កម្ពុជាយើងម្ដងទៀត នោះទេ។

សូមជម្រាបថា បន្ទាប់ពីរងនូវវិបត្តិជំងឺកូវីដ-១៩ ជាង ២ឆ្នាំមកនេះ ទីបំផុត ប្រទេសកម្ពុជា ក៏បានប្រកាសបើកទទួលទេសចរអន្តរជាតិឡើងវិញ ក្រោមទម្រង់ជា «ទេសចរណ៍វ៉ាក់សាំង»។ ការបើកទទួលទេសចរណ៍វ៉ាក់សាំងនេះ គឺចាប់ផ្ដើមដំបូងនៅក្រុងព្រះសីហនុ ក្រុងកោះរ៉ុង នៃខេត្តព្រះសីហនុ និងនៅតំបន់វិស្សមកាលតារាសាគរ នៃស្រុកបទុមសាគរ ខេត្តកោះកុង ចាប់ពីថ្ងៃទី៣០ ខែវិច្ឆិកា ឆ្នាំ២០២១ នេះតទៅ។

បន្ទាប់មក នឹងបន្តបើកទទួលនៅខេត្តសៀមរាប នាខែមករា ឆ្នាំ ២០២២ខាងមុខ ក្នុងក្របខណ្ឌនៃកម្មវិធីទេសចរ​ណ៍វ៉ាក់សាំង ដែលអនុញ្ញាតឲ្យភ្ញៀវទេសចរអន្តរជាតិស្នាក់នៅ និងទស្សនាក្នុងតំបន់ ឬគោលដៅទេសចរណ៍សុវត្ថិភាពរយៈពេល ៥ថ្ងៃ ដោយមិនតម្រូវឲ្យធ្វើចត្តាឡីស័ក ក្នុងសណ្ឋាគារឡើយ៕  

អត្ថបទ៖ ឃួន សុភ័ក្រ