ល្បែងជល់មាន់ខុសច្បាប់មួយកន្លែង ត្រូវបានអាវុធហត្ថចុះបង្ក្រាប ឃាត់ខ្លួនជនសង្ស័យម្នាក់

កម្លាំងកងរាជអាវុធហត្ថ ស្រុកអូរជុំចំនួន៤នាក់ ដឹកនាំដោយលោកវរសេនីយ៍ត្រី វ៉ន ឃាន មេបញ្ជាការអាវុធហត្ថមូលដ្ឋានបានចុះបង្ក្រាបទីតាំងជល់មាន់ លួចលាក់ខុសច្បាប់មួយកន្លែង និងបានឃាត់ខ្លួនជនសង្ស័យម្នាក់ រួមទាំងវត្ថុតាងមួយចំនួនទៀត ក្នុងនោះដោយមានការសម្របសម្រួលនីតិវិធីពីលោក លាង អ៊ូ ព្រះរាជអាជ្ញារងអមសាលាដំបូងខេត្ត។

ប្រតិបត្តិការចុះបង្ក្រាបទីតាំងលេងល្បែងជល់មាន់ខាងលើនេះ បានធ្វើឡើងនៅវេលាម៉ោង ១ និង៣០នាទីរសៀល កាលពីថ្ងៃទី៣ ខែវិច្ចិកា ឆ្នាំ២០២១ នៅត្រង់ចំណុច ចម្ការស្វាយចន្ទី ស្ថិតនៅក្នុងភូមិក្រូច ឃុំឯកភាព ស្រុកអូរជុំ។

របាយការណ៍ពីអាវុធហត្ថបានឲ្យដឹងថា ក្នុងនោះឃាត់ខ្លួនជនសង្ស័យម្នាក់ និងដកហូតវត្ថុតាងបានមួយចំនួនដូចជា÷ ម៉ូតូចំនួន៤គ្រឿង ជញ្ជីងថ្លឹងមាន់ចំនួន១ កញ្ចក់បាំងមាន់ចំនួន១ ស្កត់រុំខ្នាយមាន់ចំនួន១ដុំ ចាននិងគំរបអាប៉ោងចំនួន១​(ផ្តិល)ផងដែរ។

បច្ចុប្បន្នជនសង្ស័យ រួមនិងវត្ថុតាងត្រូវបានបញ្ជូនទៅកាន់ការិយាល័យជំនាញ នៃកងរាជអាវុធហត្ថខេត្ត ដេីម្បីចាត់ការបន្តទៅតាមនីតិវិធី។

សូមបញ្ជាក់ផងដែរថា មតិមហាជនរស់នៅក្នុងក្រុងបានលុង បានលើកឡើងថា មួយរយៈនេះ សមត្ថកិច្ចនៅក្នុងខេត្តរតនគិរី បាននិងកំពុងដុតដៃដុតជើង ចុះប្រតិបត្តិការបង្ក្រាបអ្នកលេងល្បែងស៉ីសងគ្រប់ប្រភេទឬនៅតាមបណ្តាស្រុកមួយចំនួន ប៉ុន្តែនៅផ្ទះខ្លះមិនទាន់ឃើញមានសមត្ថកិច្ចជំនាញទៅចុះបង្ក្រាបនៅឡើយទេ ក្នុងក្រុងបានលុង ដោយសារមានខ្នងបង្អែកដ៏រឹងមាំ៕

អត្ថបទ៖ វុទ្ធឦសាន