៥ ចំណុចសំខាន់​​ត្រូវដឹង លក្ខខណ្ឌ​តែងតាំងតួនាទី​ជា​អភិបាល​​​​ស្រុក​​

អត្ថបទ​មុន កម្ពុជា​ថ្មី​បាន​លើក​ពី​ការ​តែងតាំងតួនាទី​អភិបាល​ខេត្ត ដោយ​ត្រូវ​ចេញដោយព្រះរាជក្រឹត្យ។ ដោយ​ឡែក​តួនាទី​អភិបាល​ស្រុក ក៏​មាននីតិវិធី​ជ្រើសរើស​ខុសគ្នា​មួយ​ចំនួន​ផងដែរ។

ក្នុង​ច្បាប់​ស្តី​ពី​គ្រប់គ្រង​រដ្ឋបាល​រាជធានី​ ខេត្ត ក្រុង​ ស្រុក​ ខណ្ឌ បាន​បញ្ជាក់​ថា តួនាទី​ជា​អភិបាល​ស្រុក​ត្រូវ​តែងតាំង​ដោយ​អនុក្រឹត្យ​តាម​សំណើ​របស់​រដ្ឋមន្ត្រី​ក្រសួង​មហាផ្ទៃ។ អភិបាលស្រុកត្រូវធ្វើការជ្រើសរើសពីក្នុងចំណោម មន្ត្រីទាំងពីរភេទ ដែលស្ថិតក្នុងក្របខ័ណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃ ដែលមានលក្ខណសម្បត្តិ​ដូចខាងក្រោម៖

– មានឋានន្តរសក្តិចាប់ពីអនុមន្ត្រីឡើង
– មានអាយុចាប់ពីសាមសិប (៣០)ឆ្នាំឡើង គិតដល់ថ្ងៃតែងតាំង
– មានបទពិសោធន៍ការងារផ្នែករដ្ឋបាលសាធារណៈយ៉ាងតិចចំនួនប្រាំ (០៥)ឆ្នាំ ឬ និង មានសញ្ញាបតបវិញ្ញាបត្រដែលទទួល​ស្គាល់ដោយក្រសួងអប់រំ យុវជន និងកីឡា
– មានឈ្មោះក្នុងបញ្ជីឈ្មោះបោះឆ្នោតផ្លូវការ ក្នុងរយៈពេលនៃការតែងតាំង
– មិនធ្លាប់មានទោសឧក្រិដ្ឋ ឬ មជ្ឈិមណាមួយ។

ក្នុង​មាត្រា ១៤៦ ក្នុង​ច្បាប់​ស្តី​ពី​គ្រប់គ្រង​រដ្ឋបាល​រាជធានី​ ខេត្ត ក្រុង​ ស្រុក​ ខណ្ឌ ក៏​បាន​បញ្ជាក់​ផង​ដែរ ក្នុង​ករណីចាំបាច់ អភិបាល​​ស្រុក​អាចជ្រើសរើសពីក្នុងចំណោមមន្ត្រីទាំងពីរភេទ ដែលស្ថិតក្នុងក្របខ័ណ្មន្ត្រីរាជការស៊ីវិល ក្រៅពី​ក្របខណ្ឌ​ក្រសួងមហាផ្ទៃ ប៉ុន្តែមន្ត្រីនោះត្រូវមានលក្ខណសម្បត្តិ សមស្របតាមមាត្រា ១៤២ មាត្រា ១៤៣ មាត្រា ១៤៤ និងមាត្រា ១៤៥ នៃច្បាប់នេះ៕

អត្ថបទ៖ ប៊ុណ្ណារ៉ា