ព័ត៌មានជាតិ

ក្រសួងការបរទេស និង CDC ផ្សព្វផ្សាយច្បាប់វិនិយោគរបស់កម្ពុជា ជូនដល់ស្ថានតំណាងប្រចាំនៅបរទេស

បានផុស

៣ years មុន

នៅ

ថ្ងៃព្រហស្បតិ៍ ៤ វិច្ឆិកា ២០២១

ដោយ

ក្រសួងការបរទេស និងសហប្រតិបត្តិការអន្តរជាតិ និងក្រុមប្រឹក្សាអភិវឌ្ឍន៍កម្ពុជា (CDC) បានរៀបចំសិក្ខាសាលាតាមប្រព័ន្ធវីដេអូ ដើម្បីផ្សព្វផ្សាយពីច្បាប់ស្ដីពីវិនិយោគ នៃព្រះរាជាណាចក្រកកម្ពុជា ជូនដល់ថ្នាក់ដឹកនាំ មន្ត្រីរាជការ និងមន្ត្រីការទូតកម្ពុជា នៅតាមស្ថានតំណាងកម្ពុជានៅបរទេស។

កិច្ចប្រជុំនេះ ធ្វើឡើងកាលពីថ្ងៃពុធ ទី៣ ខែវិច្ឆិកា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់របស់ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ដោយមានការចូលរួមធ្វើបទអន្តរាគមន៍ដោយលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីបើកសិក្ខាសាលានេះ លោកឧបនាយករដ្ឋមន្ត្រី ប្រាក់ សុខុន បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងក្រុមការងារនៃក្រុមប្រឹក្សាអភិវឌ្ឍន៍កម្ពុជា ដែលបានខិតខំប្រឹងប្រែងអស់រយៈពេល៦ឆ្នាំ ក្នុងការសិក្សាស្រាវជ្រាវ និងតាក់តែងរហូតធ្វើឱ្យច្បាប់ស្តីពីវិនិយោគថ្មីនេះលេចចេញជារូបរាងឡើង។ លោកឧបនាយករដ្ឋមន្ដ្រី ក៏បានរំលេចពីបច្ច័យអវិជ្ជមាន ដែលកើតចេញពីវិបត្តិនៃជំងឺកូវីដ-១៩ និងសង្គ្រាមពាណិជ្ជកម្ម ដែលធ្វើឱ្យសេដ្ឋកិច្ចសកល និងរំហូរវិនិយោគផ្ទាល់ពីបរទេសទូទាំងពិភពលោកមានការធ្លាក់ចុះគួរឱ្យកត់សម្គាល់។ ឯការប្រកួតប្រជែងរបស់មហាអំណាច ដែលធ្វើឱ្យប្រែប្រួលសណ្តាប់ធ្នាប់អន្តរជាតិ ក៏បានដាក់សម្ពាធដល់តំបន់អាស៊ី-ប៉ាស៊ីហ្វិក និងបានប៉ះពាល់ដល់មជ្ឈភាព និងសាមគ្គីភាពអាស៊ាន និងទំនាក់ទំនងរបស់អង្គការតំបន់នេះជាមួយដៃគូខាងក្រៅ។

លោកឧបនាយករដ្ឋមន្ដ្រី ជឿជាក់យ៉ាងមុតមាំថា ការដាក់ឱ្យប្រើនូវច្បាប់វិនិយោគថ្មីនេះ ត្រូវបានធ្វើឡើងចំពេលវេលា ដែលកម្ពុជា ត្រូវការស្ដារឡើងវិញនូវសង្គម-សេដ្ឋកិច្ច ក្រោយវិបត្តិកូវីដ-១៩ និងធ្វើឱ្យកម្ពុជាក្លាយជាទិសដៅដ៏ទាក់ទាញមួយសម្រាប់វិនិយោគិន។ ការដាក់ឲ្យប្រើនូវច្បាប់ថ្មីនេះក៏ស្របពេលដែលរាជរដ្ឋាភិបាលសម្រេចឱ្យបើកដំណើរការសកម្មភាពសេដ្ឋកិច្ច និងប្រទេសឡើងវិញជាបណ្ដើរៗ ដើម្បីទទួលស្វាគមន៍ភ្ញៀវទេសចរណ៍ និងវិនិយោគិនបរទេស ពិសេសទេសចរណ៍ចាក់វ៉ាក់សាំង និងការកំណត់គោលនយោបាយតំបន់ទេសចរណ៍សុវត្ថិភាព។

ទន្ទឹមនេះ លោកឧបនាយករដ្ឋមន្ត្រីបានគូសបញ្ជាក់ថា ច្បាប់វិនិយោគថ្មីនេះ នឹងដើរតួនាទីយ៉ាងសំខាន់ដល់ការអនុវត្តយុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣ ឱ្យកាន់តែមានប្រសិទ្ធភាព និងទទួលបានជោគជ័យ តាមរយៈស្ថានតំណាងកម្ពុជាប្រចាំនៅបរទេសទាំងអស់ដែលជាសេនាធិការរបស់ក្រសួងការបរទេស ក្នុងការកៀរគរដៃគូវិនិយោគថ្មីប្រកបដោយសក្តានុពលខ្ពស់ចូលមកប្រទេសកម្ពុជា។

ចំណែកលោក សុខ ចិន្តាសោភា បានថ្លែងអំណរគុណចំពោះវត្តមានរបស់ឧបនាយករដ្ឋមន្ដ្រី ដែលបានចូលរួមជ្រោមជ្រែងកិច្ចខិតខំប្រឹងប្រែងក្នុងការផ្សព្វផ្សាយច្បាប់ ស្ដីពីវិនិយោគថ្មីនេះជូនដល់ថ្នាក់ដឹកនាំ មន្ត្រីរាជការ និងមន្ត្រីការទូតកម្ពុជានៅតាមស្ថានតំណាងកម្ពុជានៅបរទេសទាំងអស់ ដែលជាយុទ្ធសាស្ត្រដ៏មុតស្រួចក្នុងការបង្ហាញពីកាលានុវត្តភាពនៅកម្ពុជា សំដៅទាក់ទាញការវិនិយោគប្រកបដោយគុណភាពបន្ថែម។ លើសពីនេះ លោករដ្ឋមន្ត្រីប្រតិភូ ក៏បានវាយតម្លៃខ្ពស់ចំពោះកិច្ចសហការជាប្រចាំរបស់ក្រសួងការបរទេស ព្រមទាំងស្ថានតំណាងកម្ពុជា ប្រចាំនៅក្រៅប្រទេសទាំងអស់ ដែលជានិច្ចកាលតែងរួមចំណែកយ៉ាងសំខាន់ក្នុងការជំរុញវិនិយោគ និងផ្សព្វផ្សាយ ពីបរិស្ថានវិនិយោគនៅកម្ពុជាជូនដល់វិនិយោគិនបរទេស៕

ដោយ ៖ កោះកែវ