អ្នកនាំពាក្យ ៖ ប្រឡងឌីប្លូមឆ្នាំនេះ មានបេក្ខជនចូលរួមប្រឡងជាង ១៦ម៉ឺននាក់ ថយចុះជាងឆ្នាំមុនជាង ២ម៉ឺននាក់

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឲ្យដឹងនៅព្រឹកថ្ងៃទី ៧វិច្ឆិកានេះថា ការប្រឡងសញ្ញា បត្រមធ្យមសិក្សាបឋមភូមិ ឬឌីប្លូមនៅឆ្នាំនេះ មានបេក្ខជនចូលរួមប្រឡងចំនួន ១៦២ ៥៨៩នាក់ ចែកជា១៧២២ មណ្ឌល និង ៧៣២៧បន្ទប់។

ចំនួនបេក្ខជនប្រឡងឌីប្លូមឆ្នាំនេះ មានការថយចុះជាង ២ម៉ឺននាក់ ខណៈប្រឡងឆ្នាំមុនក្រសួងអប់រំ បានរៀបចំនៅថ្ងៃទី ៣០ ខែវិច្ឆិកា ឆ្នាំ២០២០ ដោយមាននបេក្ខជនចូលរួមប្រឡងចំនួន ១៨៦៤១៦នាក់ មាន ១៦៨៤មណ្ឌលចែកជា ៧៤០៧បន្ទប់។ ប្រឡងឌីប្លូមឆ្នាំមុន ទោះបីជាក្រសួងបានរៀបចំការប្រឡងក៏ដោយ ក៏ក្រសួងបានសម្រេចឲ្យបេក្ខជន ដែលបានដាក់ពាក្យប្រឡងឲ្យជាប់ទាំអស់គ្នា ដោយមិនមានអ្នកធ្លាក់ឡើយ។

លោក រស់ សុវាចា បានបន្តថា ក្រសួងអប់រំ យុវជន និងកីឡា នៅតែរក្សាកាលបរិច្ឆេទប្រឡងឌីប្លូម នៅថ្ងៃ​ ១៥ វិច្ឆិកា ឆ្នាំ២០២១ដដែល ហើយការប្រឡងឌីប្លូម ត្រូវបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។

ប្រឡងឌីប្លូមឆ្នាំនេះ ក្រសួងអប់រំ នៅតែបន្តប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សាសាធារណៈ និងឯកជននីមួយៗ ដែលមានអនុវិទ្យាល័យ និងវិទ្យាល័យ ក្នុងការរៀបចំដំណើរការប្រឡង ដោយខ្លួនឯងពោល គឺចាប់តាំងពីការរៀបចំប្រធានវិញ្ញាសារ ដំណើរការសំណេរ កំណែ ស្រង់បូកពិន្ទុ និងការប្រកាសលទ្ធផលប្រឡង ជាដើម។

នៅមុនពេលប្រឡង ក្រសួងបានណែនាំឲ្យធ្វើអនាម័យ បោសសម្អាតបន្ទប់ អគារ បរិវេណ និងរៀបចំកន្លែងទុកដាក់សំរាមឲ្យបានត្រឹមត្រូវ រម្ងាប់មេរោគលើតុ កៅអី ដៃទ្វារ បង្កាន់ដៃ ផ្ទៃរាបបន្ទប់ប្រឡង និងកន្លែងចាប់កាន់ញឹកញាប់ផងដែរ។

ត្រូវពិនិត្យលទ្ធភាព រៀបចំគំនូសគម្លាតសុវត្ថិភាព នៅក្នុងបរិវេណគ្រឹះស្ថានសិក្សា រៀបចំតុកៅអី សម្រាប់បេក្ខជនក្នុងបន្ទប់ប្រឡងនីមួយៗ ដោយរក្សាគម្លាតសុវត្ថិភាពយ៉ាងតិច ១,៥ម៉ែត រៀបចំកន្លែងបិទបញ្ជីឈ្មោះបេក្ខជន នៅច្រើនកន្លែង ដើម្បីរក្សានូវគម្លាតសុវត្ថិភាព សម្រាប់បេក្ខជនមើលឈ្មោះ រៀបចំកន្លែងលាងសម្អាតដៃ និងបង្គន់អនាម័យ សម្រាប់ប្រើប្រាស់ជាប្រចាំរៀបចំសម្ភារៈអនាម័យ ដូចជា៖ សាប៊ូទឹកអាល់កុល ឬអាល់កុលដែលលាងដៃ សម្រាប់ប្រើប្រាស់ នៅតាមគ្រឹះស្ថានសិក្សា ដែលជាមណ្ឌលប្រឡងនីមួយៗ។

រៀបចំបន្ទប់ប្រឡងបម្រុង ដោយឡែកសម្រាប់បេក្ខជន ដែលមានកម្ដៅលើសពី ៣៧.៥អង្សាសេ និងបេក្ខជនដែលស្ថិតក្នុងកំឡុងពេលចត្តាឡីស័ក។ ក្នុងករណីរកឃើញអ្នក មានកម្តៅលើសពី ៣៧,៥អង្សាសេ ត្រូវ៖ -វាស់ស្ទង់កម្តៅម្តងទៀតជាលើកទី២ ក្រោយរយៈពេល ៥នាទី និងអនុញ្ញាតឲ្យចូលបន្ទប់ប្រឡងកន្លែង បំពេញភារកិច្ចរបស់ខ្លួនប្រសិនបើកម្ដៅចុះធម្មតាវិញ។

ករណីដែលស្ទង់កម្ដៅលើកទី ២ នៅតែខ្ពស់លើសពី ៣៧,៥អង្សាសេដដែល ចំពោះបេក្ខជនត្រូវបញ្ជូនទៅបន្ទប់ប្រឡងដាច់ដោយឡែក ដែលបានត្រៀមបម្រុងទុក (រក្សាលេខតុ លេខបន្ទប់ដដែល និងបញ្ជូនសន្លឹកកិច្ចការរបស់បេក្ខជនដាក់ នៅក្នុងជុំកិច្ចការបេក្ខជន នៅបន្ទប់ដើមតាមម៉ោង មុខវិជ្ជានីមួយៗ)។ ដោយឡែកចំពោះគណៈមេប្រយោគ និងគណៈកម្មការនានា ត្រូវអនុញ្ញាតឲ្យឈប់សម្រាក និងណែនាំឲ្យរកសេវាសុខភាព សមស្រប។

បើតាមក្រសួងអប់រំ ចំពោះមុខវិជ្ជាដែលត្រូវប្រឡងរួមមាន៖ ចំនួន ១០មុខវិជ្ជា ត្រូវជា ១១វិញ្ញាសារ រួមមាន៖ តែងសេចក្ដី, គីមីវិទ្យា, ផែនដី និងបរិស្ថានវិទ្យា, រូបវិទ្យា, ភូមិវិទ្យា, សីលធម៌-ពលរដ្ឋវិជ្ជា, គណិតវិទ្យា, ការសរសេរតាមអាន, ជីវវិទ្យា, ប្រវត្តិវិទ្យា, និងភាសាបរទេស។

ចំពោះរបបពិន្ទុ ដែលបេក្ខជនទទួលបាន ជាអតិបរមាមានចំនួន ៤៤៥ពិន្ទុ និងរបបពិន្ទុប្រចាំឆ្នាំ ១០០ពិន្ទុ សរុបពិន្ទុទាំងអស់ ៥៤៥ពិន្ទុ។ ប៉ុន្តែដោយសារភាសាបរទេស ជាវិញ្ញាសារស្ម័គ្រ ដូចនេះពិន្ទុប្រលងជាប់គឺ ៥៤៥ ដក ២៥រួចចែកនឹង ២ស្មើនឹង ២៦០ពិន្ទុ សម្រាប់បេក្ខជនចំណេះទូទៅ និងបំពេញវិជ្ចា។ ចំពោះបេក្ខជនស្វ័យរិនពិន្ទុជាប់ ៤៤៥ដក ២៥ ចែកនឹង ២ស្មើនឹង ២១០ពិន្ទុ។

ពិន្ទុដែលទទួលបាននិទ្ទេសមធ្យម គឺចាប់ពី ២៦០ដល់ ៣៣៧ពិន្ទុ និទ្ទេសល្អបង្គួរចាប់ពី ៣៣៨ដល់ ៤១៥ពិន្ទុ និងនិទ្ទេសល្អចាប់ ៤១៦ពិន្ទុឡើងទៅ សម្រាប់បេក្ខជនចំណេះទូទៅ និងបំពេញវិជ្ជា។ ចំពោះបេក្ខជនស័្វយរិនពិន្ទុ ចាប់ពី ២១០ដល់ ២៧២ទទួលនិទ្ទេសមធ្យម។ ពិន្ទុចាប់ពី ២៧៣ដល់ ៣៣៥ទទួលបាននិទ្ទេសល្អបង្គួរ និងពិន្ទូចាប់ពី៣៣៦ ឡើងទៅទទួលបាននិទ្ទេសល្អ។ គួរបញ្ជាក់ថា ការប្រឡងសញ្ញាបត្រមធ្យមសិក្សាបឋមភូមិនៅឆ្នាំនេះ នឹងប្រព្រឹត្តិទៅនៅថ្ងៃទី ១៥ ខែវិច្ឆិកា ឆ្នាំ២០២១ និងប្រកាសលទ្ធផលប្រឡង នៅថ្ងៃទី ២២ ខែវិច្ឆិកា ឆ្នាំ ២០២១៕

អត្ថបទ៖ សំអឿន