រាជធានី-ខេត្តចំនួន ៩មាននិស្សិត ក្មេងកំព្រា និងជនគ្មានទីពឹង ស្នាក់នៅតាមវត្តច្រើនជាងគេ

លោក សេង សុមុនី អ្នកនាំពាក្យក្រសួងធម្មការ និងសាសនា បានឲ្យដឹងនៅព្រឹកថ្ងៃទី ៧ ខែវិច្ឆិកា​នេះថា មានសិស្ស-និស្សិត ក្មេងកំព្រា និងជនគ្មានទីពឹង ស្នាក់នៅតាមវត្តអារាមនានា នៅទូទាំងប្រទេសប្រមាណជាង ១ម៉ឺននាក់។ ក្នុងនោះមានរាជធានីខេត្តចំនួន ៩ស្នាក់នៅច្រើនជាងគេ។

លោកបានបន្តថា រាជធានី-ខេត្តដែលមានសិស្ស-និស្សិត ស្នាក់នៅតាមវត្តច្រើនជាងគេ រួមមាន៖ រាជធានីភ្នំពេញ មានសិស្សនិស្សិតស្នាក់នៅច្រើនជាងគេមានចំនួន ៣០៧៩នាក់, ខេត្តបាត់ដំបងចំនួន ៨៦៦នាក់, និងខេត្កកណ្តាលចំនួន ៨៣៣នាក់។ ចំណែកខេត្ត ដែលមានក្មេងកំព្រាស្នាក់នៅក្នុងវត្តច្រើនជាងគេ រួមមាន៖ ខេត្តព្រៃវែងចំនួន ៧៤៦នាក់, ខេត្តព្រះសីហនុមានចំនួន៣៣៤នាក់,  និងខេត្តសៀមរាបចំនួន ៣១១នាក់។ រីឯខេត្ត ដែលមានជនគ្មានទីពឹងស្នាក់ នៅក្នុងវត្តអារាមច្រើនជាងគេ រួមមាន៖ ខេត្តកណ្តាលមាន ១៥៩នាក់, ខេត្តកំពង់ស្ពឺ ១៤០នាក់, និងខេត្តកំពង់ចាមចំនួន ១២០ នាក់។

លោក សេង សុមុនី បានបន្តទៀតថា ក្រៅពីជាកន្លែងប្រារព្ធពិធីបែបសាសនា និងជាទីថែរក្សានូវអត្តសញ្ញាណ និងវប្បធម៌ហើយ គឺវត្តអារាម ក៏ជាទីជម្រកស្នាក់អាស្រ័យរបស់សិស្ស-និស្សិតក្រីក្រ បន្តការសិក្សាជាច្រើន ដែលមកពីជនបទ ហើយមិនមានលទ្ធភាពគ្រប់គ្រាន់ ក្នុងការរកលុយដើម្បីជួលផ្ទះ ឬអាហារហូបចុក មិនថានៅរាជធានី ឬតាមបណ្តាខេត្តឡើយ។

លោក ស៊ឹម​ សំរេច រស់នៅខេត្តកំពង់ចាម ដែលមានកូនស្នាក់នៅវត្ត នៅរាជធានីភ្នំពេញ បានគាំទ្រនិងចាត់ទុកវត្តអារាម ជាមជ្ឈមណ្ឌលសម្រាប់សង្គ្រោះសិស្ស-និស្សិតក្រីក្រ ឲ្យទទួលបានឱកាសបន្តការសិក្សា និងការអប់រំ។ លោកបានបន្តថា ប្រសិនបើអត់មានវត្តអារាម សម្រាប់សិស្ស-និស្សិតស្នាក់នៅទេ ពួកគេអាចត្រូវបោះបង់ចោលការសិក្សា ដោយសារមិនមានលទ្ធភាព ជួលផ្ទះស្នាក់នៅបន្តការសិក្សា៕

អត្ថបទ៖ សំអឿន