ព័ត៌មានជាតិ

ក្រសួងអប់រំពន្យារពេលរៀន និងបង្រៀននៅកម្រិតមត្តេយ្យនិងសេវាអប់រំកុមារតូច

បានផុស

៣ years មុន

នៅ

ថ្ងៃចន្ទ ៨ វិច្ឆិកា ២០២១

ដោយ

ក្រសួងអប់រំយុវជននិងកីឡា បានសម្រេចពន្យារពេលដំណើរការរៀន និងបង្រៀន នៅកម្រិតមត្តេយ្យសិក្សា និងសេវាអប់រំកុមារតូច។

យោងតាមសេចក្តីជូនដំណឹងរបស់ក្រសួងអប់រំយុវជននិងកីឡា ចុះថ្ងៃទី០៨ វិច្ឆិកានេះ បានឱ្យដឹងថាអនុវត្តតាមអនុសាសន៍ ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងស្នើសូម លោក លោកស្រីប្រធាន ណែនាំដល់គ្រឹះស្ថានមត្តេយ្យសិក្សាគ្រប់ប្រភេទទាំងមត្តេយ្យសិក្សា សាធារណៈ មត្តេយ្យសិក្សាឯកជន និងមត្តេយ្យសហគមន៍និងសេវាអប់រំកុមារតូច ត្រូវពន្យារពេលសម្រាប់ ដំណើរការរៀន និងបង្រៀនដោយផ្ទាល់នៅតាមគ្រឹះស្ថានសិក្សា។

ក្រសួងបានបន្តថា បន្ទាប់ពីកុមារអាយុ ៥ ឆ្នាំបានចាក់វ៉ាក់សាំង ការពារកូវីដ-១៩ រួច ក្រសួងនឹងចេញលិខិតអនុញ្ញាតឲ្យគ្រឹះស្ថានសិក្សាបើកបង្រៀនសម្រាប់កុមារអាយុ៥ឆ្នាំ។

ក្រសួងបានណែនាំ លោក លោកស្រីប្រធានមន្ទីរអប់រំរាជធានីខេត្តមេត្តាផ្សព្វផ្សាយឲ្យបានទូលំទូលាយ ដល់គ្រប់គ្រឹះស្ថានមត្តេយ្យសិក្សា និងសេវាអប់រំកុមារតូច តាមការគួរ។

ប្រមុខរដ្ឋាភិបាលភិបាលកម្ពុជា សម្តេចតេជោហ៊ុនសែន បានលើកឡើងថា សាលាមតេយ្យសិក្សានៅមិនទាន់អនុញ្ញាតឲ្យបើកដំណើរការនៅពេលនេះនៅឡើយទេ ដោយសារកុមារអាយុពី៣ទៅ៤ឆ្នាំនៅមិនទាន់បានចាក់វ៉ាក់សាំងនៅឡើយ។

មានប្រសាសន៍នៅក្នុងពិធីសម្ពោធអគារក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី០៨ ខែវិច្ឆិកា នេះ សម្ដេច នាយករដ្ឋមន្ត្រី បានមានប្រសាសន៍ថា «ខ្ញុំសូមផ្តាំផ្ញើមតេយ្យកុំអាលលឿនពេកខ្ញុំចង់ឱ្យបើកបឋម អនុវិទ្យាល័យ វិទ្យាល័យ មហាវិទ្យាល័យនិងសាលាបណ្តុះបណ្តាលវិជ្ជាជីវៈដោយសារគម្លាតសុវត្ថិភាព»។

សម្តេចតេជោបានបន្តថា ការអនុញ្ញាតឱ្យបើកដំណើរការដោយសារតែពួកគេបានចាក់វ៉ាក់សាំងបង្ការជំងឺកូវីដ១៩រួចហើយ ពិសេសកុមារអាយុ៥ឆ្នាំ។ ចំណែកកុមារអាយុពី៣ទៅ៤ឆ្នាំ នៅមិនទាន់បានចាក់វ៉ាក់សាំងនៅឡើយទេ។ ដូច្នេះសូមកុំប្រញាប់បើកលឿនពេក៕

ដោយ ៖ សំអឿន