ចាប់បានអ្នកទោសម្នាក់ ក្នុងចំណោម៧នាក់ ដែលទម្លុះគុក នៅស្ទឹងត្រែង​

អ្នកទោសចំនួន៧នាក់ ដែលទម្លុះគុករត់ចេញនោះ សមត្ថកិច្ចចាប់បានម្នាក់ហើយ ចំណែក៦នាក់ទៀតកំពុងតាមប្រមាញ់។ អ្នកទោស​ទម្លុះ​គុក​ ត្រូវបាន​សមត្ថកិច្ច​ចាប់បាន​ម្នាក់​ម្នា​ក់ នៅ​យប់​ថ្ងៃទី​១០​ ខែវិច្ឆិកា​ ឆ្នាំ​២០២១​ នៅ​ចំណុច​វាលស្រែ​ស្រូវ ក្នុង ភូមិសាស្ត្រ​ភូមិ ឃុំ​ថា​ឡា ស្រុក​ថា​ឡា​បរិ​វ៉ា​ត់​ ខេត្តស្ទឹងត្រែង​។

លោក​ឧ​ត្ត​ម​សេនីយ៍​ទោ ​អូត ​ស៊ី​វុត្ថា​ ស្នងការ​នគរបាល​ខេត្ត​បាន​ឲ្យ​ដឹងថា ​អ្នកទោស​ម្នាក់​ដែល​សមត្ថកិច្ច​ចាប់បាន​ឈ្មោះ​ទូច វ៉ា​ត់ ជា​ជនល្មើស​គ្រឿងញៀន ក្នុងចំណោម​អ្នកទោស​៧​នាក់ ​ដែល​បាន​វាយ​ទម្លុះ​ជញ្ជាំង​គុក ខេត្តស្ទឹងត្រែង រត់គេចខ្លួន​កាលពី​ម៉ោង​៣​ទៀបភ្លឺ ថ្ងៃទី​៨ ខែវិច្ឆិកា​ឆ្នាំ​២០២១​។​

លោក​ឧ​ត្ត​ម​សេនីយ៍​ទោ​បន្តថា​៖ ​នៅ​ថ្ងៃទី​១០​វិច្ឆិកា​នេះ សមត្ថកិច្ច​និង​ដាក់​កម្លាំង​បន្ថែមទៀត​ នៅតាម​ចំណុច​គោលដៅ​សង្ស័យ ព្រោះ​តាម​ពិនិត្យ​អ្នកទោស​ទាំងនេះ ពុំមាន​ស្បៀង​គ្រប់គ្រាន់ ក្នុងការ​ពួន​សម្ងំ​លាក់ខ្លួន​ក្នុងព្រៃ​បានយូរ​នោះទេ គឺ​នៅពេល​ណាមួយ​ពិតជា​ចេញមក​ភូមិ​អ្នកស្រុក​ជាមិនខាន​។ បច្ចុប្បន្ន​សមត្ថកិច្ច​កំពុង​ស្រាវជ្រាវ​ស៊ើបអង្កេត តាម​ប្រមាញ់​រុករក​អ្នកទោស​ទាំង ៦ នាក់​បន្តទៀត ដើម្បី​ចាប់ខ្លួន​យក​ត្រឡប់មកវិញ​

អត្ថបទ៖ ​ងិន​លីម​