កម្ពុជាឈ្នះក្ដី នឹងទទួលបានវត្ថុបុរាណ ៤ រូបមកវិញ ពីសារមន្ទីរសិល្បៈ នៅសហរដ្ឋអាមេរិក

នៅរសៀលថ្ងៃទី១១ ខែវិច្ឆិកានេះ ក្រសួងវប្បធម៌ និងវិចិត្រសិល្បៈ បានចេញសេចក្ដីជូនព័ត៌មានថា អនុលោមតាមអនុស្សរណៈនៃការយោគយល់គ្នារវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក, វត្ថុបុរាណខ្មែរចំនួន ៤ រូប នឹងត្រូវប្រគល់មកកម្ពុជាវិញនាពេលខាងមុខ។

រដ្ឋាភិបាលសហរដ្ឋអាមេរិក តាមរយៈការិយាល័យអាជ្ញាសហរដ្ឋអាមេរិកប្រចាំសង្កាត់ភាគខាងត្បូងនៃទីក្រុងញូវុយ៉ក (USAO-SDNY) និងការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក (HSI) បានដំណើរការក្ដីក្នុងតុលាការពាក់ព័ន្ធនឹងសម្បត្តិវប្បធម៌ខ្មែរចំនួន ៤ រូប ដែលត្រូវបានរឹបអូសពីសារមន្ទីរសិល្បៈ Denver នៅសហរដ្ឋអាមេរិក។

វត្ថុបុរាណខ្មែរទាំង ៤ រូបនោះ មាន ១. ចម្លាក់ព្រះនាងប្រាជ្ញាបារមិតា សម័យអង្គរ ថ្មភក់ ២. ចម្លាក់ព្រះសូរ្យ សម័យមុនអង្គរ ថ្មភក់ ៣. ជួងសំរឹទ្ធ សម័យបុរេប្រវត្ត និង ៤. ផ្ដែរព្រះនារាយណ៍ផ្ទំ សម័យមុនអង្គរ ថ្មភក់។

លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ថា យើងទាំងអស់គ្នាមានសេចក្ដីរំភើបរីករាយ ក្នុងការបន្តស្វាគមន៍រតនៈសម្បត្តិដ៏មានតម្លៃទាំងនេះត្រឡប់មកកម្ពុជាវិញ ហើយមានមោទនភាពចំពោះកិច្ចសហការរបស់យើងជាមួយរដ្ឋាភិបាលសហរដ្ឋអាមេរិក។

លោកស្រីរដ្ឋមន្ត្រីមានអំពាវនាវដល់សារមន្ទីរ និងអ្នកប្រមូលសមុច្ច័យឯកជននានា ដែលកាន់កាប់រក្សាទុកសម្បត្តិវប្បធម៌ខ្មែរ សូមប្រគល់សម្បត្តិវប្បធម៌ទាំងនោះដោយស្ម័គ្រចិត្តមកកម្ពុជាវិញ។ ក្រសួងកំពុងបន្តប្រមូលភស្តុតាងនៃការលួចនាំចេញ និងការកាន់កាប់ដោយខុសច្បាប់នូវសម្បត្តិវប្បធម៌ខ្មែរ។

គួរបញ្ជាក់ថា សារមន្ទីរសិល្បៈ Denver គឺជាសារមន្ទីរមួយក្នុងចំណោមសារមន្ទីរទាំង ១០ ដែលមានវត្ថុបុរាណត្រូវបានលក់ឬបរិច្ចាគដោយលោក Latchford។ ក្នុងអំឡុងពេលស៊ើបអង្កេតចំពោះសកម្មភាពហិរញ្ញវត្ថុរបស់លោក Latchford  អ្នកសារព័ត៌មានធ្វើការជាមួយទិន្នន័យដែលបានលេចចេញដ៏ធំបានទាក់ទងទៅមន្រ្តីសារមន្ទីរស្តីពីវត្ថុបុរាណពាក់ព័ន្ធនឹងការលក់ទិញដ៏អាម៉ាស់របស់ឈ្មួញដែលត្រូវបានចោទប្រកាន់ក្នុងឆ្នាំ ២០១៩ ពីបទលួចវត្ថុបុរាណសិល្បៈយកទៅលក់។

ទំនាក់ទំនងរបស់សារមន្ទីរ Denver និង Latchford បានស្ថិតក្រោមការត្រួតពិនិត្យអស់រយៈពេលជាច្រើនឆ្នាំមកហើយ។ នៅក្នុងសេចក្តីថ្លែងការណ៍មួយទៅកាន់កាសែតវ៉ាស៊ីនតោនប៉ុស្តិ៍អ្នកនាំពាក្យម្នាក់បាននិយាយថាស្ថាប័ននេះបានទាក់ទងជាមួយមន្រ្តីកម្ពុជាអំពីវត្ថុទាំងបួនមកពីប្រទេសកម្ពុជាចាប់តាំងពីការចោទប្រកាន់របស់ឈ្មួញទិញលក់នៅឆ្នាំ ២០១៩ ។ ប៉ុន្តែ សារៈមន្ទីរទើបតែចាប់ផ្តើមដំណើរការប្រគល់វត្ថុបុរាណទាំងនេះ មកវិញ៕

អត្ថបទ៖ ច័ន្ទ វីរៈ

ព័ត៌មានពិស្ដារ៖