ព័ត៌មានជាតិ

បង្ហាញមុខក្រុមបង្ហោះម៉ូតូបង្កភាពអសន្តិសុខតាមផ្លូវសាធារណៈ

បានផុស

៣ years មុន

នៅ

ថ្ងៃព្រហស្បតិ៍ ១១ វិច្ឆិកា ២០២១

ដោយ

នៅព្រឹកថ្ងៃទី១១ ខែវិច្ឆិកា ឆ្នាំ២០២១ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ បាននាំយកក្មេងដែលធ្វើសកម្មភាពបង្ហោះម៉ូតូប្រដេញគ្នា និងកែច្នៃបំពង់ស៊ីម៉ាំងខុសលក្ខណៈបច្ចេកទេស បង្កការរំខានដល់អ្នកដទៃចំនួន១៣នាក់ធ្វើការអប់រំ និងធ្វើកិច្ចសន្យា នៅស្នងការដ្ឋាននគរបាលខេត្តឧត្ដរមានជ័យ ឲ្យពួកគាត់ត្រឡប់ទៅផ្ទះវិញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមក្មេងដែលត្រូវបាននគរបាលល្បាតឃើញមានធ្វើសកម្មភាពរញ៉េរញ៉ៃ នៅល្ងាចថ្ងៃទី១០ ខែវិច្ឆិកា ឆ្នាំ២០២១ ដោយកម្លាំងនគរបាលអន្តរាគមន៍ពិសេស សហការជាមួយ ការិយាល័យជំនាញនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បានធ្វើការបង្ក្រាបក្រុមក្មេងទំនើងចំនួន១៣នាក់ ដែលកំពុងធ្វើសកម្មភាពបង្ហោះម៉ូតូលើផ្លូវសួនច្បារ ជុំវិញបឹងស្នោ ក្នុងភូមិសាស្ត្រ ក្រុងសំរោង ខេត្តឧត្ដរមានជ័យ។ ជាពិសេសនោះទៀត ក្រុមក្មេងទំនើងបង្ហោះម៉ូតូតាមផ្លូវសាធារណៈ កែច្នៃបំពង់ស៊ីម៉ាំងខុសលក្ខណៈបច្ចេកទេស បង្ករការរំខានដល់អ្នកដទៃ។

ក្រោយពីមានសេចក្តីរាយការណ៍នេះ ឧត្តមសេនីយ៍ទោ ហួត សុធី ស្នងការនគរបាលខេត្តឧត្ដរមានជ័យ បានដាក់បទបញ្ជាដល់កងកម្លាំងនគរបាល គ្រប់អធិការដ្ឋានក្រុង/ស្រុក និងវរសេនាតូចនគរបាលការពារព្រំដែនគោកទាំង២ ត្រូវចាត់វិធានការបង្ក្រាបឲ្យខានតែបានដើម្បីយកទៅអប់រំណែនាំ។

ឧត្តមសេនីយ៍ទោ ហួត សុធី ស្នងការនគរបាលខេត្តឧត្ដរមានជ័យ បានសំដែងនូវការសោកស្តាយចំពោះសកម្មភាពរបស់ក្មួយៗទាំងនេះ ដែលជាទំពាំងស្នងប្ញស្សី សម្រាប់ប្រទេសជាតិ បែរជានាំគ្នាយកពេលវេលាដ៏មានតម្លៃទៅធ្វើអំពើអបាយមុខ មិនគប្បីដែលសង្គមគេស្អប់ខ្ពើម។ ហើយជាពិសេសសោកស្តាយចំពោះពេលវេលាដែលប្រើប្រាស់ទៅសិក្សារៀនសូត្រ ឬក៏ជួយកិច្ចការងារឪពុកម្តាយនៅផ្ទះ។

ឧត្តមសេនីយ៍ទោ ហួត សុធី បានណែនាំដល់ក្មួយប្រុសទាំង១៣នាក់ មិនត្រូវប្រព្រឹត្តនូវសកម្មភាពណាមួយដែលសង្គមស្អប់ខ្ពើម គឺត្រូវនៅឲ្យឆ្ងាយពីគ្រឿងញៀន គោរពច្បាប់ចរាចរណ៍ត្រូវធ្វើជាកូនល្អ មិត្តល្អ និងសិស្សល្អ និងត្រូវខិតខំរៀនសូត្រ ដើម្បីយកចំណេះដឹងកសាងសង្គមគ្រួសារ និងប្រទសជាតិឲ្យមានការរីកចម្រើន ។ ក្រោយពីលោកឧត្តមសេនីយ៍ស្នងការ បានធ្វើការអប់រំណែនាំហើយ ក្មេងទំនើង ទាំង ១៣នាក់ បានធ្វើកិច្ចសន្យា និងបញ្ឈប់មិនឲ្យមានមុខជាលើកទី២ទៀត មិនដូច្នោះទេ និងអនុវត្តតាមវិធានការរដ្ឋបាល រួចមកក៏បានប្រគល់ជូនឪពុក ម្តាយ និងអាណាព្យាបាល យកទៅធ្វើការអប់រំបន្ត៕

អត្ថបទ៖ ចាន់ ធី