ការសម្ពោធដាក់ឱ្យដំណើរការ ឧបករណ៍វាស់ចំណុះស្រាបៀរ នៅរោងចក្រផលិតស្រាបៀររបស់ក្រុមហ៊ុន HEINEKEN

​នៅ​ថ្ងៃ​ពុធ ទី​១០ ខែវិច្ឆិកា ឆ្នាំ​២០២១ នៅ​រោងចក្រ​ផលិត​ស្រា​បៀរ​របស់​ក្រុមហ៊ុន HEINEKEN (Cambodia) Co., Ltd., មានការ​រៀបចំ​ពិធីសម្ពោធដាក់ឱ្យដំណើរការឧបករណ៍វាស់ចំណុះស្រាបៀរក្រោមអធិបតីភាពដ៏ខ្ពង់ខ្ពស់របស់​ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និង​ជា​ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​ពន្ធដារ និង​លោក WONG Chung Wah Samson នាយក​គ្រប់គ្រង​ក្រុមហ៊ុន HEINEKEN ព្រមទាំង​មានការ​ចូលរួម​ពី​ថ្នាក់ដឹកនាំ និង​មន្ត្រី​ពាក់ព័ន្ធ​នៃ​អគ្គនាយកដ្ឋាន​ពន្ធដារ និង​ក្រុមហ៊ុន​។​

​ក្នុង​គោលដៅ​ពង្រឹង​ការគ្រប់គ្រង​ប្រមូល​ចំណូល​ពន្ធ​-​អាករ​គ្រប់​ប្រភេទ ជាពិសេស​ចំណូល​អាករ​ពិសេស​លើ​ផលិតផល​ស្រា​បៀរ និង​ភេសជ្ជៈ​គ្មាន​ជាតិ​សុរា ឱ្យមាន​ប្រសិទ្ធភាព​ខ្ពស់ និង​ធានាបាន​នូវ​ការប្រកួតប្រជែង​ដោយ​ស្មើភាព​គ្នា អគ្គនាយកដ្ឋាន​ពន្ធដា​រ​បានចេញ​សេចក្តីណែនាំ​លេខ​១៥០២៤ អ​ពដ ចុះ​ថ្ងៃទី​០៨ ខែកញ្ញា ឆ្នាំ​២០២១ ស្តីពី​កាតព្វកិច្ច​ដំឡើង​ឧបករណ៍​វាស់​ចំណុះ​ស្រា​បៀរ និង​ភេសជ្ជៈ​គ្មាន​ជាតិ​សុរា​របស់​សហគ្រាស​ផលិត​ក្នុងស្រុក​ស្របតាម​ខ្លឹមសារ​ប្រកា​សលេខ ០១០ សហវ​.​ប្រក ចុះ​ថ្ងៃទី​១២ ខែមករា ឆ្នាំ​២០២១ របស់​ក្រសួង​សេដ្ឋកិច្ច និង​ហិរញ្ញវត្ថុ​។ សហគ្រាស​ផលិត​ក្នុងស្រុក​មាន​កាតព្វកិច្ច​ដំឡើង​ឧបករណ៍​វាស់​ចំណុះ​នេះ​តាម​ចំណុច ទីតាំង និង​ស្តង់ដារ​បច្ចេកទេស​ត្រឹមត្រូវ​ដែល​ទទួលស្គាល់​ដោយ​អគ្គនាយកដ្ឋាន​ពន្ធដារ ដោយបាន​កំណត់ពេល​វេលា​នៃ​ការចាប់ផ្តើម​អនុវត្ត​ប្រើប្រាស់​ឧបករណ៍​វាស់​ចំណុះ​នេះ​ចាប់ពី​ថ្ងៃទី​០១ ខែធ្នូ ឆ្នាំ​២០២១ នេះ​តទៅ​។​

​ជាមួយគ្នានេះ ឯកឧត្តម​រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​គូសបញ្ជាក់ថា ឧបករណ៍​វាស់​ចំណុះ​នឹង​ត​ភ្ជាប់​ទៅនឹង​ប្រព័ន្ធ​អេ​ឡិច​ត្រូ​និ​កដោយផ្ទាល់ ជាមួយនឹង​ហេដ្ឋារចនាសម្ព័ន្ធ​បណ្តាញ (Network) របស់​អគ្គនាយកដ្ឋាន​ពន្ធដារ និង​ដំណើរការ ២៤​ម៉ោង​ក្នុង​មួយថ្ងៃ ដែល​ឧបករណ៍​នេះ​មាន​១.​នាឡិកា​វាស់​ចំណុះ (Flowmeter) ២. នាឡិកា​វិភាគ​សារធាតុ​រាវ​នៅ​ខ្សែចង្វាក់​ផលិតកម្ម​វេច​ខ្ចប់ (Conductivity meter) និង ៣.​ប្រអប់​ត្រួតពិនិត្យ​ទិន្នន័យ (Field Control Box)​។ ដូច្នេះ​អគ្គនាយកដ្ឋាន​ពន្ធដារ មាន​មូលដ្ឋាន​ជាក់លាក់​ក្នុងការ​ផ្ទៀងផ្ទាត់ និង​តាមដាន​ការប្រកាស និង​បង់ប្រាក់​ពន្ធ​របស់​សហ​គ្រាស និង​ធានាបាន​នូវ​ការប្រកួតប្រជែង​ដោយ​ស្មើភាព (Level playing field)​។​

​ក្នុងឱកាស​នេះ ឯកឧត្តម​រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​ថ្លែង​កោតសរសើរ​ចំពោះ​ក្រុមហ៊ុន HEINEKEN (Cambodia) Co., Ltd., ដែលជា​សហគ្រាស​មួយ​មាន​អនុលោមភាព​សារពើពន្ធ​ខ្ពស់ និង​ជា​ក្រុមហ៊ុន​ដែល​បាន​ស្ម័គ្រចិត្ត​ចូលរួម​សហការ និង​បាន​បំពាក់​ឧបករណ៍​វាស់​ចំណុះ​នេះ​មុនគេ ហើយ​ព្រមទាំង​ទទួលបាន​ការកោតសរសើ​រ​ពី​សំណាក់​ប្រមុខ​រដ្ឋាភិបាល​ដែល​តាមរយៈ​លិខិត​ចុះ​ថ្ងៃទី​០៨ ខែវិច្ឆិកា ឆ្នាំ​២០២១ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​ថ្លែងអំណរគុណ​និង​កោតសរសើរ​ចំពោះ​ក្រុមហ៊ុន ដែល​បាន​ចូលរួមចំណែក​ក្នុង​ការបំពេញ​កាតព្វកិច្ច​ពន្ធដារ​ផ្ទៃក្នុង ជាពិសេស ១.​បាន​បង់ពន្ធ​ជូន​រដ្ឋ​ច្រើនជាងគេ​លំដាប់​ទី​១ ក្នុង​វិស័យ​ផលិត​ស្រា​បៀរ និង​ភេសជ្ជៈ​គ្មាន​ជាតិ​សុរា ២.​មាន​អនុលោមភាព​សារពើពន្ធ​ខ្ពស់​ប្រភេទ “​មាស​” និង ៣.​ជា​ក្រុមហ៊ុន​ដំបូង និង​ឈានមុខ​គេ​ក្នុង​វិស័យ​ផលិត​ស្រា​បៀរ និង​ភេសជ្ជៈ​គ្មាន​ជាតិ​សុរា​ក្នុងស្រុក ដែល​បាន​ស្ម័គ្រចិត្ត​ក្នុង​ការចូល​រួមសហកា​រ​ដំឡើង និង​ប្រើប្រាស់​ឧបករណ៍​វាស់​ចំណុះ ស្របតាម​ការសម្រេចរ​បស់​រាជរដ្ឋាភិបាល​។

​គួរ​បញ្ជាក់ថា បើទោះជា​ស្ថិតក្នុង​ស្ថានភាព​ដ៏​លំបាក​ដោយសារ​ការរីក​រាលដាល​ខ្លាំង​នៃ​ជំងឺ​កូ​វីដ​-១៩ នេះ​ក៏ដោយ ក៏​លទ្ធផល​នៃ​ការប្រមូល​ចំណូល​ពន្ធដារ​អាច​នៅមាន​ស្ថានភាព​ល្អប្រសើរ ដែល​នេះ​គឺ​ដោយសារ​មានការ​យកចិត្តទុកដាក់​ខ្ពស់​ពី​សំណាក់​សម្តេច​តេ​ជោ​នាយករដ្ឋមន្ត្រី និង​ក្រសួង​សេដ្ឋកិច្ច និង​ហិរញ្ញវត្ថុ ជាពិសេស​ការចាត់វិធានកា​រ​ជា​យុទ្ធសាស្ត្រ​ក្នុង​ការចាក់​វ៉ាក់សាំង​ជូន​ប្រជាពលរដ្ឋ​កម្ពុជា ប្រកបដោយ​ស្មារតី​បុ​រេ​សកម្ម និង​ទាន់ពេលវេលា ដែល​អាចធ្វើឱ្យ​ប្រទេស​កម្ពុជា​អាច​បើក​ដំណើរការ​សេដ្ឋកិច្ច​ឡើងវិញ​នៅក្នុង​ខែវិច្ឆិកា​នេះ​។​

​ឯកឧត្តម​រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​បញ្ជាក់ថា មាន​សហគ្រាស​ផលិត​ស្រា​បៀរ និង​ភេសជ្ជៈ​គ្មាន​សុរា​មួយចំនួនទៀត បាននិងកំពុង​សហកា​រ​ជាមួយ​អគ្គនាយកដ្ឋាន​ពន្ធដារ ដោយបាន​ត្រៀម​រៀបចំ​ដំឡើង​ឧបករណ៍​វាស់​ចំណុះ​នេះ ដែល​អាច​នឹង​ចាប់ផ្តើម​ក្នុងពេល​ឆាប់ៗ​ខាងមុខ ហើយ​សង្ឃឹម​យ៉ាង​មុតមាំ​ថា នឹងមាន​សហគ្រាស​ផលិត​ស្រា​បៀរ​និង​ភេសជ្ជៈ​គ្មាន​ជាតិ​សុ​រាជា​បន្តបន្ទាប់​ទៀត នឹងចូលរួម​អនុវត្ត​កាតព្វកិច្ច​ដំឡើង​ឧបករណ៍​វាស់​ចំណុះ​នេះ​។ ការចាប់ផ្តើម​ថ្ងៃនេះ គឺជា​គំរូ​ល្អ​ក្នុងការ​អនុវត្ត​សម្រាប់​សហគ្រាស​ក្នុង​វិស័យ​ដូចគ្នានេះ ហើយ​វិស័យ​ឯកជន គឺជា​ដៃគូ​មិនអាច​ខ្វះ​បាន​ដ៏​សំខាន់​របស់​រាជរដ្ឋាភិបាល និង​ជា​កម្លាំងចលករ​សម្រាប់​ការអភិវឌ្ឍ និង​ជំរុញ​កំណើនសេដ្ឋកិច្ច​។ ឯកឧត្តម គង់ វិបុល បាន​ដឹកនាំ​ក្រុមការងារ​បច្ចេកទេស​នៃ​អគ្គនាយកដ្ឋាន​ពន្ធដារ ពិនិត្យ​ខ្សែចង្វាក់​ផលិតកម្ម​ក្នុង​រោងចក្រ ព្រមទាំង​បានធ្វើ​ការបិទ​សៀ​ល​សុវត្ថិភាព (Security Seal) លើ​ឧបករណ៍​វាស់​ចំណុះ និង​ប្រកាស​ដាក់ឱ្យ​ដំណើរការ​ប្រើប្រាស់​ជា​ផ្លូវការ​នូវ​ឧបករណ៍​នេះ​។​

​ជា​កិច្ចបញ្ចប់​កម្មវិធី ឯកឧត្តម គង់ វិបុល រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​ពន្ធដារ ក៏បាន​ប្រគល់​លិខិត​សរសើរ​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ជូន​លោក WONG Chung Wah Samson នាយក​គ្រប់គ្រង​ក្រុមហ៊ុន HEINEKEN (Cambodia) Co., Ltd., ផងដែរ​។​

​ក្នុងឱកាស​នេះដែរ ឯកឧត្តម​រដ្ឋមន្ត្រី​ប្រតិភូ​អម​នាយករដ្ឋមន្ត្រី​ក៏បាន​ធ្វើ​សន្និសីទកាសែត ដោយ​ផ្តល់ឱកាស​ជូន​អ្នកសារព័ត៌មាន​សួរ​សំណួរ​ពាក់ព័ន្ធ​នឹង​យន្តការ​នេះ និង​អំពី​ការគ្រប់គ្រង​ប្រមូល​ចំណូល​ពន្ធដារ​ជារួម​ផងដែរ​។​

​ខ្លឹមសារ​សំខាន់​នៃ​ស​និ្ន​សីទ​កាសែត​៖

​ថ្ងៃទី​១០ ខែវិច្ឆិកា ឆ្នាំ​២០២១ អគ្គនាយកដ្ឋាន​ពន្ធដា​រ​បានដាក់​ដំណើរការ​ឧបករណ៍​វាស់​ចំណុះ​ស្រា​បៀរ និង​ភេសជ្ជៈ​គ្មាន​ជាតិ​សុរា​ដំបូង​គេ​សម្រាប់​ក្រុមហ៊ុន HEINEKEN (Cambodia) Co., Ltd., ជំរុញ​លើកទឹកចិត្ត​ដល់​សហគ្រាស​ផលិត​ស្រា​បៀរ និង​ភេសជ្ជៈ​គ្មាន​ជាតិ​សុរា​ផ្សេងៗ​ទៀត​ចូលរួម​អនុវត្ត​កាតព្វកិច្ច​នេះ ពង្រឹង​អនុលោមភាព​សារពើពន្ធ ដើម្បី​ជាការ​ចូលរួមចំណែក​ដ​ល់​អភិវឌ្ឍន៍​ជាតិ និង​ប្រកួតប្រជែង​ដោយ​ស្មើភាព​គ្នា និង​ដើរតួនាទី​ជា​ដៃគូ​អភិវឌ្ឍន៍​របស់​រដ្ឋាភិបាល​។ លទ្ធផល​នៃ​ការគ្រប់គ្រង​ប្រមូល​ចំណូល​ពន្ធ​សម្រាប់​ឆ្នាំ​២០២១ នេះ គឹម​ត្រឹម​រយៈពេល ១០​ខែ ឆ្នាំ​២០២១ ទោះបីជា​មិន​ប្រសើរ​ជាង​រយៈពេល​ដូចគ្នា​ឆ្នាំ​២០២០ ក៏ប៉ុន្តែ​សម្រេចបាន​លទ្ធផល​លើស​ការរំពឹងទុក និង​ផែនការ​ហិរញ្ញវត្ថុ​សម្រាប់​ឆ្នាំ​២០២១​។​

​អគ្គនាយកដ្ឋាន​ពន្ធដា​រ​បាន​ដាក់ចេញ​វិធានការ​បុ​រេ​សកម្ម ឆ្លើយតប​ទៅនឹង​បញ្ហា​ប្រឈម និង​ការលំបាក​នានា​ក្នុង​បរិបទ​នៃ​ការរីក​រាតត្បាត​ជំងឺ​កូ​វីដ​-១៩ ក្នុងនោះ​បន្ត​ពង្រឹង​ការគ្រប់គ្រង​ប្រមូល​ចំណូល​ពន្ធ​តាម​ប្រព័ន្ធ​បច្ចេកវិទ្យា​ព័ត៌មាន ដែល​បាន​ដាក់ឱ្យអនុវត្ត​ជា​បន្តបន្ទាប់ ជាពិសេស​ជំរុញ​ការប្រើប្រាស់​ប្រព័ន្ធគ្រប់គ្រង​ការដាក់​លិខិត​ប្រកាស​ពន្ធ​លើ​ប្រាក់ចំណូល​ប្រចាំឆ្នាំ Tol E-Filing និង​ការគ្រប់គ្រង​ដាក់​លិខិត​ប្រកាស​តាម​ប្រព័ន្ធ​អន​ឡាញ E-Filing, ប្រព័ន្ធ​ទូទាត់​ប្រាក់​ពន្ធ​តាម​អន​ឡាញ E-Payment, និង​ប្រព័ន្ធ​ទទួល​លិខិត​ប្រកាស​ពន្ធ ពាក្យស្នើសុំ​លិខិត​រដ្ឋបាល និង​/​ឬ​ឯកសារ​នានា​តាមរយៈ​ប្រព័ន្ធ​បញ្ជូន​ឯកសារ​អេ​ឡិច​ត្រូ​និ​ច (E-Document Submission System) តាមរយៈ​អាសយដ្ឋាន https://file-revenue.tax.gov.kh/eUploader/ ព្រមទាំង​ការដាក់ឱ្យ​ប្រើប្រាស់​នូវ​ការទូទាត់​ប្រាក់​ពន្ធ​ដោយ​ស្វ័យប្រវត្តិ​តាម​ទូរស័ព្ទដៃ​កំណែទម្រង់រដ្ឋបាល​សារពើពន្ធ និង​ទំនើបកម្ម​ពន្ធដារ ដោយ​សម្រេច​ឱ្យបាន​រដ្ឋបាល​កិច្ច​ល្អ និង​ឈានទៅ​សម្រេច​ឱ្យបាន​នូវ​អភិបាលកិច្ច​ល្អ ដែល​ស្នូល​នៃ​យុទ្ធសាស្ត្រ​ចតុកោណ​របស់​រដ្ឋាភិបាល​៕ ​