ព័ត៌មានជាតិ

ឯកឧត្តមជាម យៀប ជាបេក្ខភាពអនុប្រធានទី១ រដ្ឋសភា ?

បានផុស

៣ years មុន

នៅ

ថ្ងៃអាទិត្យ ១៤ វិច្ឆិកា ២០២១

ដោយ

លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាបានបញ្ជាក់ថា គណៈអចិន្ត្រៃយ៍ នឹងបើកកិច្ចប្រជុំ ដើម្បីពិនិត្យសម្រេចលើសំណើរដាក់បេក្ខជនអនុប្រធានរដ្ឋសភាជំនួសឯកឧត្តម ងួន ញ៉ិល នៅថ្ងៃទី២២ ខែវិច្ឆិកា ហើយនៅថ្ងៃទី២៥ ខែវិច្ឆិកា រដ្ឋសភា នឹងបើកកិច្ចប្រជុំពេញអង្គ ដើម្បីបោះឆ្នោតផ្តល់ទំនុកចិត្ត។

ទោះបីជាយ៉ាងណា មកដល់ពេលនេះ នៅតែមានចម្ងល់មួយចំនួនទាក់ទងបេក្ខភាពអនុប្រធានទី១ រដ្ឋសភា ជំនួសឯកឧត្តម ងួន ញិល ដោយសារតែព័ត៌មាននេះ នៅមិនទាន់មានប្រភពផ្លូវការណាមួយបង្ហើបនៅឡើយ។ លោក ឡេង ប៉េងឡុង បានប្រាប់កម្ពុជាថ្មីថា លោកមិនទាន់អាចបង្ហើបបានទេ។ លោកបញ្ជាក់យ៉ាងដូច្នេះថា “ឥឡូវខ្ញុំមិនទាន់ចង់បញ្ចេញទេ ពីព្រោះប្រជុំរដ្ឋសភា ប្រជុំថ្ងៃទី២៥ នោះទេ ហើយប្រជុំអចិន្ត្រៃថ្ងៃទី២២ (ខែវិច្ឆិកា) “។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃអាទិត្យ ទី១៤ ខែវិច្ឆិកានេះ មានប្រភពពីមន្ត្រីជាន់ខ្ពស់រដ្ឋសភាម្នាក់បានបង្ហើបថា បេក្ខភាពអនុប្រធានទី១ រដ្ឋសភា ជំនួសឯកឧត្តម ងួន ញិល គឺឯកឧត្តមកិត្តិសេដ្ឋាបណ្ឌិត ជាម យៀប ដែលបច្ចុប្បន្នជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ហើយបេក្ខភាពនេះ ត្រូវបានបញ្ជូនទៅរដ្ឋសភាកាលពីថ្ងៃទី១០ ខែវិច្ឆិកា កន្លងទៅ។

ទាក់ទងព័ត៌មាននេះ កម្ពុជាថ្មីមិនទាន់អាចសុំការបញ្ជាក់ពីឯកឧត្តមកិត្តិសេដ្ឋាបណ្ឌិត ជាម យៀប បាននៅឡើយទេ គិតត្រឹមល្ងាចថ្ងៃអាទិត្យ ទី១៤ ខែវិច្ឆិកា ឆ្នាំ២០២១ នេះ។

សូមបញ្ជាក់ថា ឯកឧត្តមកិត្តិនីតិកោសលបណ្ឌិត ងួន ញិល អតីតអនុប្រធានទី១ នៃរដ្ឋសភា បានទទួលមរណភាពដោយរោគាពាធ នៅវេលាម៉ោង១០ និង៣០ នាទីព្រឹកថ្ងៃទី០៥ ខែវិច្ឆិកា ឆ្នាំ២០២១ នៅគេហដ្ឋាន ដែលស្ថិតនៅសង្កាត់ព្រែកប្រា ខណ្ឌច្បារអំពៅ៕

អត្ថបទ៖ កោះកែវ