អាជ្ញាធរខណ្ឌដង្កោ ប្រាប់ពលរដ្ឋឲ្យត្រៀមបង្ការ ទឹកជំនន់ស្ទឹងព្រែកត្នោត ជាយថាហេតុ

រដ្ឋបាលខណ្ឌដង្កោ នៅថ្ងៃនេះ បានជូនដំណឹង ស្ដីពី ការត្រៀមបង្ការទឹកជំនន់ស្ទឹងព្រែកត្នោត ជាយថាហេតុ។ ដោយ​អនុវត្ត​តាមប្រសាសន៍ របស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ ចុះថ្ងៃទី ១៨ ខែវិច្ឆិកា ឆ្នាំ ២០២១ រដ្ឋបាលខណ្ឌដង្កោ បានជម្រាបជូនប្រជាពលរដ្ឋ ដែលរស់នៅជាប់សណ្ដស្ទឹងព្រែកត្នោត ក្នុងនោះ មានសង្កាត់ដង្កោ សង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់​សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ បានឲ្យដឹងថា បច្ចុប្បន្នស្ថានភាពទឹក​ស្ទឹង​ព្រែកត្នោត បានហក់ឡើងជាបន្តបន្ទាប់ បណ្ដាលមកពីជំនន់ផ្នែកខាងលើ ធ្វើឲ្យទឹកស្ទឹងព្រែកត្នោត ក្នុងភូមិសាស្រ្ដ​ខណ្ឌដង្កោ មានកម្ពស់ដល់កម្រិតត្រូវប្រុងប្រយ័ត្នខ្ពស់។

ដូច្នេះដើម្បីចៀសវាង នូវហានិភ័យដែលបង្កឲ្យខូចខាតទ្រព្យសម្បត្តិ និងអាយុជីវិត រដ្ឋបាលខណ្ឌដង្កោ បានអំពាវ​នាវដល់ប្រជាពលរដ្ឋ ដែលរស់នៅតាមសណ្ដស្ទឹងព្រែកត្នោត មេត្តាត្រៀមសម្ភារៈ និងបន្តតាម​ដានស្ថាន​ភាពទឹក​ជាប្រចាំ ជៀស​វាង​ការបាត់បង់សម្ភារៈ និងអាយុជីវិត។

រដ្ឋបាលខណ្ឌដង្កោ សហការជាមួយក្រសួងធនធានទឹក និងឧតុនិយម បន្តតាមដានដោយយកចិត្ត​ទុកដាក់​ខ្ពស់​បំផុត នូវស្ថានភាពទឹក ដើម្បីជម្រាបជូនប្រជាពលរដ្ឋ ឲ្យបានជ្រាបជាបន្តបន្ទាប់៕