បុណ្យអុំទូក ៣ថ្ងៃ​ នៅខេត្តស្ទឹងត្រែង មានភ្ញៀវទេសចរទៅលេងកម្សាន្តជាង ៦ពាន់នាក់

នៅខេត្តស្ទឹងត្រែង ក្នុងថ្ងៃព្រះរាជពិធីបុណ្យអុំទូក អកអំបុក និងសំពះព្រះខែ រយៈពេល ៣ថ្ងៃ ចាប់ពីថ្ងៃទី ១៨ ដល់ថ្ងៃទី ២០ ខែវិច្ឆិកា ឆ្នាំ ២០២១ មានភ្ញៀវទេសចរជាតិ ទៅលេងតាមតំបន់រមណីយដ្ឋានទេសចរណ៍នានា ក្នុងខេត្តចំនួន ៦,១៩២នាក់។ ចំនួននេះមានការថយចុះ បើប្រៀបធៀបនឹងព្រះរាជពិធីបុណ្យអុំទូក កាលពីឆ្នាំមុន។  

លោក អ៊ុន ប៉ោសឿន​ ប្រធានមន្ទីរទេសចរណ៍ខេត្តស្ទឹងត្រែង បានមានប្រសាសន៍ថា នៅឆ្នាំនេះសង្កេតឃើញ មានភ្ញៀវទេសចរថយចុះ ក្នុងការធ្វើដំណើរទៅលេងកម្សាន្ត នៅតាមរមណីយដ្ឋាននានាក្នុងខេត្ត ហើយភ្ញៀវទេសចរមានការទទួលខុសត្រូវខ្ពស់ ទាំងការថែរក្សារសុខភាព និងផ្នែកបរិស្ថាន ផងដែរ។ លោកបន្តថា ភ្ញៀវទេសចរ ដែលបានទៅលេងកម្សាន្ដនៅខេត្តស្ទឹងត្រែង ភាគច្រើនមកពីរាជធានីភ្នំពេញ, ខេត្តក្រចេះ, ត្បូងឃ្មុំ, កំពង់ចាម, កំពង់ធំ, ព្រះវិហារ, រតនគីរី, និងមណ្ឌលគីរីជាដើម។

អ្នកស្រី ដារីណា ភ្ញៀវទេសចរមកពីខេត្តកំពង់ធំ បានប្រាប់ថា ឆ្នាំនេះទោះបីប្រទេសយើង រងផលប៉ះពាល់ពីជំងឺកូវីដ​-១៩ក៏ដោយ ក៏នៅតាមសហគមន៍ទេសចរណ៍នីមួយៗ ឃើញរៀបចំបានល្អជាងឆ្នាំមុន គ្រាន់តែពុំសូវមានភ្ញៀវទេចរ មកលេងកម្សាន្ដច្រើនដូចមុនប៉ុណ្ណោះ។

សូមជម្រាបថា ខេត្តស្ទឹងត្រែងភ្ញៀវទេសចរជាតិ ទៅលេងនៅតាមរមណីយដ្ឋាន ក្រៅពីរមណីយដ្ឋាអេកូទេសចរណ៍អន្លង់ផ្សោត, និងព្រះរំកិលហើយនោះ ​ក៏បានទៅលេងនៅរមណីយដ្ឋាន ភ្នំជម្រកសត្វ ឆ្វាំង, រមណីយដ្ឋានអូរឬស្សីកណ្តាល, រមណីយដ្ឋាននិស័្សយស្នេហ៍សេសាន, និងរីស្សតបក្សីមេគង្គ ជាដើម៕

អត្ថបទ៖ ងិ នលីម