ភ្ញៀវទេសចរណ៍ជាង ៣ ម៉ឺននាក់ចូល​មកលេងក្នុងខេត្តបាត់ដំបង

ខេត្តបាត់ដំបង÷ បើទោះបីខេត្តបាត់ដំបងខកខានមិនបានប្រារព្វពិធីបុណ្យអុំទូកក៏ដោយចុះភ្ញៀវទេសចរមកពីទិសទីតែងមកលេងកម្សាន្តតាមរមណីដ្ឋាននានាក្នុងភូមិសាស្ត្រខេត្តបាត់ដំបងនៅតែបន្តមកកម្សាន្តរបស់ពួកគេជាបន្តបន្ទាប់ក្នុងរយះពេល៣ថ្ងៃនៃបុណ្យនេះជាង៣ម៉ឺននាក់។

លោកអ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងថា រមណីយដ្ឋាននិងតំបន់ទេសចរណ៍សំខាន់ៗដែលជាគោលដៅមានសក្តានុពលតំបន់លំហែរកាយក្នុងភូមិសាស្ត្រខេត្តបាត់ដំបងរួមមាន រមណីយដ្ឋានប្រាសាទបាណន់រមណីយដ្ឋានភ្នំសំពៅ ទស្សនាហ្វូងសត្វប្រចៀវល្អាងភ្នំំភ្នំពៅ រមណីយដ្ឋានប្រាសាទឯកភ្នំ អាងទឹកកំពីងពួយ រមណីយដ្ឋានស្ទឹងថ្មដា រមណីយដ្ឋានទឹកធ្លាក់៥៣ក្នុងស្រុកភ្នំព្រឹក រមណីយដ្ឋាននគរជុំភ្នំព្រឹក ភ្នំកំពូល វត្តល្អាងកង្កែប វត្តនាងរំសាយសក់ វត្តភ្នំជីហង្ស រមណីយដ្ឋានវត្តភ្នំចំបាំង និងសហគមន៍អេកូទេសចរណ៍ទឹកធ្លាក់អូរជាំល្អាងភ្នំប្រាំពីរជាដើម។

បើយោងតាមរបាយការណ៍បូកសរុបរបស់មន្ទីរទេសចរណ៍ខេត្តបាត់ដំបង អំឡុងប្រារព្វព្រះរាជពិធីបុណ្យអុំទូកបណ្តែតប្រទីបនិងសំពះខែអកអំបុករយ:ពេល៣ថ្ងៃចាប់ពីថ្ងៃទី១៨ដល់ថ្ងៃទី២០ខែវិច្ឆកាឆ្នាំ២០២១ ខេត្តបាត់ដំបងបានទទួលភ្ញៀវទេសចរណ៍ជាតិនិងអន្តរជាតិឲ្យចូលមកលេងតាមតំបន់កម្សាន្តនានាមានចំនួន ៣៨ ៦២៨នាក់ ដែលក្នុងនោះភ្ញៀវទេសចរណ៍ជាតិមានចំនួន ៣៨,៥៦៥នាក់ និងភ្ញៀវទេសចរណ៍អន្តរជាតិ​ផ្ទៃក្នុង​មានចំនួន៦៣នាក់ផងដែរ។

បើធៀបទីនឹងថ្ងៃបុណ្យចូលឆ្នាំចិនវៀតណាមរយ:ពេល២ថ្ងៃកាលពីឆ្នាំ២០២០កន្លងទៅ មានចំនួន១៣៤,៤៤០នាក់។ ការដើរកម្សាន្តក្នុងរយះពេល៣ថ្ងៃនៅក្នុងវិបត្តិកូវីដ គេសង្កេតឃើញថាទាំងភ្ញៀវ ទាំងម្ចាស់រមណីយដ្ឋានគោលដៅទេសចរណ៍​​នានាក្នុងខេត្ត បានចូលរួមអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាលអនុវត្តវិធានការការពារខ្លួនពីជំងឺកូវីដ-១៩បានយ៉ាងល្អប្រសើរផងដែរ៕

អត្ថបទ៖ សៅ សារិទ្ធ