៤ ចំណុច​បេក្ខជន​ត្រៀម​​ប្រឡង​បាក់ឌុបត្រូវ​ដឹង​ ប្រយ័ត្ន​ធ្លាក់ដោយ​ស្វ័យប្រវត្តិ

ក្រសួងអប់រំ យុវជន​និង​កីឡាបានចេញសេចក្តីណែនាំ​ ចំពោះបេក្ខជនដែលត្រូវ​ចូលរួម​ប្រឡង​សញ្ញាបត្រមធ្យម​សិក្សា​ទុតិយភូមិ នៅថ្ងៃ​ ២៧ ធ្នូ ឆ្នាំ​២០២១ នេះ។

ក្នុង​សេចក្តីប្រកាស​បានកំណត់​យ៉ាងច្បាស់​ពី​បទបញ្ញត្តិ​និង​ការ​ដាក់ពិន័យ ចំពោះបេក្ខជន​ដែល​អនុវត្ត​ខុស​គោលការណ៍ណែនាំ អាច​ប្រឈម​បាត់បង់សិទ្ធិប្រឡង​និង​ធ្លាក់​ដោយ​ស្វ័យប្រវត្តិ។

បេក្ខជនដែលមានសកម្មភាព ត្រូវចាត់ទុកថាជាការលួចចម្លង៖

– មានសៀវភៅឯកសារ ឬសំណៅឯកសារសរសេររូបមន្តលើបន្ទាត់ ឬក្រដាសដោយដែកចារ ការចម្លងរូបមន្ត ឬមេរៀននៅលើតុទុកជាមុន ការសរសេរលើបាតដៃ លើភ្លៅ លើទ្រនាប់ជើងលើកន្សែងជូតមុខក្នុងបន្ទប់ប្រឡង
– ចម្លងសំណៅឯកសារពីអ្នកដទៃ ឬយកកិច្ចការអ្នកដទៃមកដាក់នៅកន្លែងដែលខ្លួនអង្គុយ
– អើតមើលសន្លឹកកិច្ចការអ្នកដទៃ
– ប្រើប្រាស់ទូរស័ព្ទ ឬឧបករណ៍អេឡិចត្រូនិកគ្រប់ប្រភេទនៅក្នុងបន្ទប់ប្រឡង
– អង្គយខុសពីលេខតុរបស់ខ្លួនដោយគ្មានការអនុញ្ញាតពីអនុរក្ស ឬរំកិលមកអង្គុយកៀកអ្នកដទៃ
– រំកិលតុមកអង្គុយជាប់គ្នាខុសពីប្លង់កំណត់ដោយគណៈមេប្រយោគ
– បង្កលក្ខណៈ ឬផ្តល់ឱកាសឱ្យអ្នកដទៃចម្លង
– ប្តូរសន្លឹកកិច្ចការគ្នា ប្តូរក្រដាសព្រាងគ្នា ឬផ្ទៀងផ្ទាត់ចម្លើយគ្នា ចម្លងគ្នាជាក់ស្តែង។

កម្រិតវិន័យចំពោះសកម្មភាពលួចចម្លង៖

កម្រិតវិន័យសម្រាប់បេក្ខជនណាដែលបានប្រព្រឹត្តសកម្មភាពដូចបានកំណត់ក្នុងប្រការនេះត្រូវចាត់ ទុកថាជាអំពើលួចចម្លង ត្រូវបញ្ឈប់មិនឱ្យប្រឡងបន្តទៀត និងត្រូវកំណត់ឱ្យធ្លាក់ជាស្វ័យប្រវត្តិ។

បេក្ខជនធ្វើសកម្មភាព​ដែល​ចាត់ទុកថាជាសកម្មភាពកម្រិតថ្នាក់ទី១ ធ្វើឱ្យខូចសណ្តាប់ធ្នាប់ របៀបរៀបរយនៃការប្រឡង និងប៉ះពាល់កិត្តិយសគណៈមេប្រយោគ៖

– មកដល់មណ្ឌលប្រឡងក្រោយជួងទីពីរ ប្រសិនបើបេក្ខជនជួបប្រទះនឹងឧបទ្ទវហេតុផ្សេងៗដែលអាចអនុគ្រោះបាន ដោយ​មិនឱ្យលើសពី១៥នាទី ក្រោយជួងទីពីរ អនុរក្សអនុញ្ញាតឱ្យចូលប្រឡង តាមរយៈប្រធានមណ្ឌលដោយមិនបន្ថែមម៉ោងឡើយ
– សន្លឹកកិច្ចការណាដែលមានសញ្ញាសម្គាល់អាគតដ្ឋានរបស់ខ្លួន
– ចម្លើយនៃសំណួរណាដែលមានវិចារដូចគ្នាទាំងស្រុង
– ចម្លើយសំណួរណាដែលមានខ្លឹមសារដូចទាំងស្រុងទៅនឹងសំណើវិញ្ញាសាដែលត្រូវបាននាំចូលក្នុងបន្ទប់ប្រឡងដោយបេក្ខជន ដោយអ្នកដទៃតាមគ្រប់មធ្យោបាយ ឬក្រោយការធ្វើកោសល្យវិច័យ
– ឃើញថាសន្លឹកកិច្ចការនោះដូចគ្នាទាំងស្រុងទៅនឹងចម្លើយវិញ្ញាសាដែលមានស្រាប់ ដែលត្រូវបានរៀបចំឡើងដោយខុសច្បាប់។

កម្រិតវិន័យថ្នាក់ទី១៖ បេក្ខជនណាដែលបានប្រព្រឹត្តសកម្មភាពកម្រិត១ដូចបានកំណត់នេះត្រូវចាត់ទុកថា ជាអំពើដែលធ្វើឱ្យខូចសណ្តាប់ធ្នាប់របៀបរៀបរយនៃការប្រឡង និងប៉ះពាល់កិត្តិយសគណៈមេប្រយោគ នឹងមិនអនុញ្ញាតឱ្យចូលប្រឡង ដោយកំណត់ឱ្យធ្លាក់ជាស្វ័យប្រវត្តិ។

បេក្ខជនធ្វើសកម្មភាព ដែល​ចាត់ទុកថាជាសកម្មភាពកម្រិតថ្នាក់ទី២៖

– ដើរចុះឡើងពីកន្លែងអង្គុយដោយគ្មានការអនុញ្ញាតពីអនុរក្ស
– ហែកសន្លឹកកិច្ចការ ឬមិនព្រមប្រគល់សន្លឹកកិច្ចការជូនអនុរក្ស
– ផ្លាស់ទីកន្លែងអង្គុយដោយលុបលេខតុពីកន្លែងដែលបានកំណត់ទៅសរសេរលេខតុរបស់ខ្លួននៅកន្លែងផ្សេង
– ឱ្យសន្លឹកកិច្ចការ ឬសំណៅក្រដាសព្រាងរបស់ខ្លួនទៅអ្នកដទៃចម្លង
– ឱ្យអ្នកដទៃសរសេរលើសន្លឹកកិច្ចការរបស់ខ្លួន
– សរសេរលើសន្លឹកកិច្ចការរបស់អ្នកដទៃ
– បោះប្រធានវិញ្ញាសាចេញក្រៅបន្ទប់ប្រឡងចេញទៅយកឯកសារ ឬចម្លើយពាក់ព័ន្ធទៅនឹងប្រធានវិញ្ញាសាចូលក្នុងបន្ទប់ប្រឡងវិញក្នុងពេលធ្វើវិញ្ញាសា
– បង្កជម្លោះក្នុងមណ្ឌលប្រឡង ឬបន្ទប់ប្រឡង ដោយគម្រាមកំហែងលើបេក្ខជនដទៃ
– ដណ្តើមយកសន្លឹកកិច្ចការរបស់អ្នកដទៃមកចម្លង
– ហែក ឬលាក់សន្លឹកកិច្ចការអ្នកដទៃ
– យកសន្លឹកកិច្ចការរបស់អ្នកដទៃធ្វើជាសន្លឹកកិច្ចការរបស់ខ្លួន
– ធ្វើមេខ្លោងប្រមូលលុយ ឬណែនាំឱ្យបេក្ខជនដទៃប្រមូលលុយ យកលុយឱ្យអនុរក្ស។

កម្រិតវិន័យថ្នាក់ទី២ – បេក្ខជនណាដែលបានប្រព្រឹត្តសកម្មភាពកម្រិត២ ដូចបានកំណត់ក្នុងប្រការនេះត្រូវបាន កំណត់ឱ្យធ្លាក់ជាស្វ័យប្រវត្តិ និងផ្អាកមិនឱ្យប្រឡងមួយឆ្នាំបន្ទាប់។

បេក្ខជនធ្វើសកម្មភាព ដែល​ចាត់ទុកថាជាសកម្មភាពកម្រិតថ្នាក់ទី៣៖
– យកអាវុធជាតិផ្ទុះចូលក្នុងមណ្ឌលប្រឡង
– ឱ្យអ្នកដទៃមកប្រឡងជំនួស
– ធ្វើឱ្យខូចសម្ភារៈក្នុងបន្ទប់ប្រឡង និងខូចខាតបន្ទប់ប្រឡងដោយចេតនា
– មិនអនុវត្តតាមការណែនាំរបស់គណៈមេប្រយោគ ឬអ្នកមានសមត្ថកិច្ចក្នុងមណ្ឌលប្រឡង ឬអ្នក មានសមត្ថកិច្ចត្រួតពិនិត្យការប្រឡង។

កម្រិតវិន័យថ្នាក់ទី៣៖ បេក្ខជនណាដែលបានប្រព្រឹត្តសកម្មភាពកម្រិត៣ ដូចបានកំណត់ក្នុងប្រការនេះ ត្រូវបានកំណត់ឱ្យធ្លាក់ដោយស្វ័យប្រវត្តិ និងផ្អាកមិនឱ្យប្រឡងពីរឆ្នាំបន្ទាប់។ ក្នុងករណីចាំបាច់ បេក្ខជននឹងត្រូវបញ្ជូនទៅស្ថាប័ន មានសមត្ថកិច្ច ដើម្បីដោះស្រាយតាមច្បាប់ជាធរមាន។

ជាមួយគ្នានេះ បើ​តាម​ជំពូកទី៥ ទោសប្បញ្ញត្តិ​បទល្មើសការបន្លំក្នុងការប្រឡង តាមមាត្រា៤៩ នៃច្បាប់ស្តីពីការអប់រំ ចែងថា សាមីខ្លួន ឬជនណា ដែលប្រឡងជំនួស ឬបន្លំគ្រប់រូបភាពក្នុងការប្រឡងដូចបានបញ្ញត្តិក្នុងមាត្រា២៦ នៃច្បាប់នេះ ត្រូវទទួលពិន័យអន្តរការណ៍ជាប្រាក់ពី ១.០០០.០០០ (មួយលាន)រៀល ទៅ ៥.០០០.០០០ (ប្រាំលាន)រៀល។

ករណីមិនរាងចាល សាមីខ្លួនត្រូវទទួលពិន័យអន្តរការណ៍ជាប្រាក់ចំនួនទ្វេដងនៃប្រាក់ពិន័យអន្តរការណ៍ខាងលើ ហើយត្រូវព្យួរការប្រឡងសម្រាប់រយៈពេល ២(ពីរ)ឆ្នាំ ឬហាមឃាត់មិនឱ្យចុះឈ្មោះក្នុងបញ្ជី ប្រឡងជាស្ថាពរ។

ចំពោះជនដែលប្រឡងជំនួស ឬបន្លំគ្រប់រូបភាពក្នុងការប្រឡងត្រូវផ្តន្ទាទោសតាមច្បាប់ព្រហ្មទណ្ឌជាធរមាន៕