នាយករដ្ឋមន្ត្រី​ ប្រកាសជាថ្មីថា ខារ៉ាអូខេ ឌីស្កូតែក និងរង្គសាល គឺត្រូវរង់ចាំក្រោយថ្ងៃទី ៣០ ខែវិច្ឆិកា

ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសជាថ្មីថា ខារ៉ាអូខេ ឌីស្កូតែក និងរង្គសាល គឺត្រូវរង់​ចាំ​ក្រោយ​​​ថ្ងៃទី ៣០ ខែវិច្ឆិកា ឆ្នាំ ២០២១ ដោយសម្ដេចបានណែនាំដល់អាជ្ញាធរមានសមត្ថកិច្ចពាក់ព័ន្ធ ត្រូវ​ចាប់​ផ្ដើមពិនិត្យមើលជុំវិញបញ្ហានេះ។

ក្នុងពិធីសម្ពោធ ដាក់ឲ្យប្រើប្រាស់ជាផ្លូវការស្ពានឆ្លងទន្លេមេគង្គ ស្ពានមិត្តភាពកម្ពុជា​-ចិន ស្ទឹងត្រង់-ក្រូចឆ្មារ នាព្រឹកថ្ងៃទី ២៣ ខែវិច្ឆិកានេះ សម្ដេចតេជោនាយករដ្ឋមន្ត្រី បានថ្លែងថា ការបើកដំណើរការប្រទេសឡើងវិញ លើគ្រប់​វិស័​យមិនថយក្រោយនោះទេ ខណៈដែលចំនួនអ្នកឆ្លងជំងឺកូវីដ-១៩ បានបន្តថយចុះជាបន្តបន្ទាប់។ ចំណែកឯ​ចំនួនអ្នក​ដែល​បានចាក់​វ៉ាក់​សាំងបង្ការជំងឺកូវីដ-១៩ ក៏បានកើនឡើងជាលំដាប់ផងដែរ។

សម្ដេចតេជោ ហ៊ុន សែន បានថ្លែងបន្តថា អ្វីដែលត្រូវរង់ចាំការបើកដំណើរការបន្តទៀតនោះ គឺខារ៉ាអូខេ ឌីស្កូតែក និងរង្គសាល ដែលត្រូវរង់ចាំរហូតដល់ក្រោយថ្ងៃទី ៣០​ ខែវិច្ឆិកា ឆ្នាំ ២០២១។ សម្ដេចតេជោនាយករដ្ឋមន្ត្រី មាន​ប្រសាសន៍ ថា «អញ្ចឹងចូលខែធ្នូហ្នឹង រៀបចំទៅ នៅសល់តែប៉ុន្មានថ្ងៃទៀត ចូលដល់ហើយ បើកទៀត»៕