ព័ត៌មានជាតិ

អាជ្ញាធរខេត្តកណ្តាលស្នើឲ្យម្ចាស់អាជីវកម្មខ្សាច់ក្នុងក្រុងតាខ្មៅ ជួយជួសជុលផ្លូវនិងចេញថ្លៃបោសសំអាតរាល់ខែ

បានផុស

៣ years មុន

នៅ

ថ្ងៃអង្គារ ២៣ វិច្ឆិកា ២០២១

ដោយ

អាជ្ញាធរខេត្តកណ្តាលបានស្នើឱ្យម្ចាស់អាជីវកម្មខ្សាច់នៅក្នុងក្រុងតាខ្មៅ ទាំង២២ដេប៉ូជួយជួសជុលផ្លូវ លូនិងជួយចេញបោសសម្អាតជារៀងរាល់ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំពិនិត្យ និងណែនាំទៅដល់អាជីវកម្មខ្សាច់ ក្នុងក្រុងតាខ្មៅ កាលពីថ្ងៃទី២២វិច្ឆិកា លោក ណុប ដារ៉ា អភិបាលរងខេត្តកណ្តាលបានបានស្នើដល់ម្ចាស់អាជីវកម្ម ទាំង២២ដេប៉ូឱ្យចូលរួមដើម្បីធានាការថែទាំ ផ្លូវប្រវែង២៨,៥គីឡូម៉ែត្រ លូ ឱ្យបានស្អាតជាប្រចាំ ដោយគិតចាប់ពី ផ្លូវ២១អា និងផ្លូវ២១បេ ប្រវែង ៦គីឡូម៉ែត្រ និងត្រូវចូលរួមជួសជុលកំណាត់ផ្លូវដែលខូចខាត ប្រសិនបើការដឹកជញ្ជូនធ្វើឲ្យខូចខាតផ្លូវ។

ជាមួយគ្នានេះដែរ លោកអភិបាលរងខេត្ត ក៏បានស្នើដល់ម្ចាស់អាជីវកម្មត្រូវរួមគ្នាជួយចេញថ្លៃបោសម្អាតជារៀងរាល់ខែ ដែលមានតម្លៃសរុបចំនួន ១០០,០០០,០០០រៀល ដោយសំដៅលើការបោសសំអាតផ្លូវ ការជួសជុល និងថែទាំផ្លូវ ព្រមទាំងស្ដារលូ ដែលត្រូវប្រើប្រាស់ គ្រឿងចក្រចំនួន ០៧គ្រឿង និងកម្មករ ២៥នាក់។

លោក ណុប ដារ៉ា បានណែនាំដល់មន្ទីរពាក់ព័ន្ធ កម្លាំងមានសមត្ថកិច្ច និងអាជ្ញាធរក្រុង ត្រូវរួមសហការគ្នាចុះពិនិត្យដល់ទីតាំង អាជីវកម្មខ្សាច់ ដើម្បីដឹងថា តើម្ចាស់អាជីវកម្មទាំងនោះ មានការសំអាត និងបានធ្វើកន្លែងលាងរថយន្តខ្សាច់មុនពេលដឹកខ្សាច់ចេញពីដេប៉ូត្រឹមត្រូវដែរឫទេហើយ បើម្ចាស់អាជីវកម្មណាមួយមិនសហការ នេះអាជ្ញាធរត្រូវអនុវត្តតាមច្បាប់ដោយគ្មានការយោគយល់ឡើយ។

ទន្ទឹមនឹងនេះដែរ លោកអភិបាលរងខេត្តក៏បានជំរុញដល់ មន្ទីរពាក់ព័ន្ធ និងកងកម្លាំងមានសមត្ថកិច្ច ត្រូវបន្តចាត់វិធានការឲ្យបានម៉ឺងម៉ាត់ ដល់ម្ចាស់អាជីវកម្ម ឲ្យអនុវត្តតាមកិច្ចសន្យា និងច្បាប់ពាក់ព័ន្ធនានា រាល់ការដឹក ខ្សាច់ ដឹកដីត្រូវអនុវត្តតាមបទដ្ឋានបច្ចេកទេសត្រឹមត្រូវ ដឹកកុំឱ្យហុយ និងជ្រុះខ្សាច់មកលើផ្លូវ ដែលបានធ្វើឱ្យប៉ះពាល់ដល់អ្នកធ្វើដំណើរ និងប្រជាពលរដ្ឋរស់នៅតាមដងផ្លូវ។

លោកអភិបាលរងខេត្ត បានបញ្ជាក់ថា« រាល់ការដឹកជញ្ជូនខ្សាច់ គ្រួស និងដី ម្ចាស់អាជីវកម្មត្រូវណែនាំដល់អ្នកដឹក ត្រូវលាងសំអាតកង់ឡានឲ្យបានស្អាតពេលចេញពីដេប៉ូ ត្រូវគ្របឲ្យបានជិតល្អ កុំដឹកលើសទម្ងន់ បើកបរដោយក្រមសីលធម៌ ត្រូវលាងសម្អាតផ្លូវដែលប្រឡាក់ឲ្យបានស្អាត ក្នុងករណីម្ចាស់អាជីវកម្មណាដែលនៅតែប្រព្រឹត្តល្មើសច្បាប់ ធ្វើឱ្យផ្លូវខូច ត្រូវទទួលខុសត្រូវជួសជុលផ្លូវឱ្យបានស្អាតឡើងវិញ និងត្រូវរងការផាកពិន័យ ឬបិទអាជីវកម្មតែម្ដង»។

យ៉ាងណាក៏ដោយ លោក អភិបាលរងខេត្ត បានថ្លែងអំណរគុណដល់ម្ចាស់អាជីវកម្មទាំង២២ដេប៉ូ ដែលបានសហការក្នុងការរួមចំណែកថែរក្សា និងជួសជុលផ្លូវ ក៏ដូចជាចូលរួមស្ដារលូ ដើម្បីផ្លូវស្អាតនិងគ្មានទឹកដក់ផងដែរ៕

ដោយ ៖ សំអឿន