ទីលាន​​តេជោ គ្រោង​ប្រើ​ជា​ទីតាំង​​សម្ពោធ​ផ្លូវ ៣៧ ខ្សែ​នៅ​ខេត្តព្រះសីហនុ

អាជ្ញាធរ​ខេត្តព្រះសីហនុ បាន​រៀបចំ​ទីលាន​តេជោ ដែលទើបកែលម្អ​ប្រប​តាម​មាត់​ឆ្នេរ​ដើម្បី​ប្រើប្រាស់ជាទីតាំងសម្ពោធហេដ្ឋារចនាសម្ព័ន្ធផ្លូវថ្នល់៣៧ ខ្សែ​ ដែល​ទើប​បញ្ចប់ការ​ស្ថាបនា​​រួចរាល់​។

កាលពីម្សិលមិញនេះ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បាន​ដឹកនាំមន្ត្រីជំនាញចុះពិនិត្យទីលានតេជោ (ពយតាមូង) ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ។

ក្នុងឱកាសចុះពិនិត្យទីលានតេជោ លោក​អភិបាល​ខេត្ត​បានធ្វើការណែនាំដល់ក្រុមហ៊ុនស្ថាបនាទីលានតេជោ ត្រូវពន្លឿនការប្រមូលកាកសំណល់ និងលាងសម្អាតឱ្យបានស្អាត ព្រោះទីតាំងទីលានតេជោ រដ្ឋបាលខេត្តព្រះសីហនុ​គ្រោងរៀបចំ​ជា​វេទិកាសម្ពោធហេដ្ឋារចនាសម្ព័ន្ធផ្លូវថ្នល់៣៧ខ្សែ និងអាងប្រព្រឹត្តកម្មទឹកកខ្វក់ទី១ និងទី២ នៅដើមខែធ្នូ ឆ្នាំ២០២១ ខាងមុខ៕