ព័ត៌មានជាតិ
លោក ឌិន សុមេធារិទ្ធ ខាតប្រាក់ជិត១លានដុល្លារលើវិស័យសណ្ឋាគារក្នុងវិបត្តិកូវីដ
វិបត្តិកូវីដ-១៩ បានអូសបន្លាយអស់រយៈពេលជិត ២ឆ្នាំ បណ្តាលឲ្យអាជីវកម្មជាច្រើនដួលរំលំ និងម្ចាស់អាជីវកម្មខាតបង់អស់ប្រាក់ជាច្រើនផងដែរ។

ក្នុងចំណោមសហគ្រិនជាច្រើន ក្នុងនោះមានលោក ឌិន សុមេធារិទ្ធ ស្ថាបនិកភូមិផ្កាត្រកួន និងជាប្រធានសមាគមសណ្ឋាគារ បានខាតបង់ប្រាក់អស់មួយចំនួនធំផងដែរ នៅក្នុងវិបត្តិសកលនេះ។
លោក ឌិន សុមេធារិទ្ធ បានឲ្យដឹងថា ក្នុងវិបត្តិកូវីដ-១៩នេះ លោកខាតបង់អស់ថវិកាប្រមាណជិត ១លានដុល្លារ ប៉ុន្តែលោកមិនបានជម្រុះបុគ្គលិកណាម្នាក់ឡើយ ដោយសារតែនៅមានហិរញ្ញវត្ថុសម្រាប់ទប់ទល់។ លោកបញ្ជាក់ដូច្នេះថា« ខ្ញុំខាតអស់ជិត១លានដុល្លារចេះតែទប់ទៅ ព្រោះខ្ញុំមានថវិកាគ្រាន់ទប់ ប៉ុន្តែពេលដែលខ្ញុំទប់លែងជាប់ខ្ញុំក៏ទម្លាក់ចោលដែរ ហ្នឹងដូចយើងទម្លាក់ដុំថ្មចោលពីខ្លួន…ជាធម្មតាជីវិតរកស៊ី ដូចជាជីវិតយើងដែរ មានកើតចាស់ឈឺស្លាប់ធម្មតាទេ របស់ដែលមិនបង្កើតចំណូលឲ្យយើង យើងកុំរវីរល់ច្រើន»។ លោកថ្លែងនេះ នៅក្នុងកិច្ចពិភាក្សាភាគទី១០ ក្នុងក្របខណ្ឌនៃកម្មវិធីមគ្គុទេសក៍ស្តារអាជីវកម្មក្នុងបរិបទកូវីដ-១៩ ក្រោមប្រធានបទ «មគ្គុទេសក៍ស្តារអាជីវកម្មពីវិស័យបដិសណ្ឋារកិច្ច» កាលពីថ្ងៃទី ២៥ ខែវិច្ឆិកា។

លោកបន្តទៀតថា« ខ្ញុំមានមោទនភាពមួយ បុគ្គលិកខ្ញុំ ខ្ញុំមិនជម្រុះអ្នកណាមួយចោលទេ…ធម្មតាយើងរកស៊ីដំបូងក៏គ្មានលុយដែរ រកស៊ីខ្លះចំណេញខ្លះខាតខ្លះ ជារឿងធម្មតា»។
លោក សុមេធារិទ្ធ សង្កត់ធ្ងន់ថា លោកមិនចង់ស្តារលុយ១លានដុល្លារដែលខាតបង់នោះទេ គឺលោកអះអាងថា នឹងយកមកវិញលើសពី១លានដុល្លារ ៥ដង។
លោក សុមេធារិទ្ធ បានបិទសណ្ឋាគាររបស់លោកនៅខេត្តសៀមរាប មិនអាចប្រឈមនឹងការខាតច្រើន ដោយសារមិនបានសិក្សាពីទីផ្សារច្បាស់លាស់។ តាមពិតទៅ លោកបិទតាំងពីមុនជំងឺកូវីដ-១៩ រាតត្បាតទៅទៀត។

កន្លងមកប្រធានសមាគមសណ្ឋាគាររូបនេះ ធ្លាប់ប្រាប់កម្ពុជាថ្មី ក្នុងវិបត្តិកូវីដ-១៩ វិស័យសណ្ឋាគារធ្លាក់ចុះភ្ញៀវទេសចរយ៉ាងគំហុក ដោយសារតែវិស័យនេះពឹងផ្អែកលើភ្ញៀវបរទេសទាំងស្រុង ចំណែកភ្ញៀវជាតិគឺបន្តិចបន្តួចប៉ុណ្ណោះ។ ជាក់ស្តែងជំងឺកូវីដ បានរាតត្បាតខ្លាំងកន្លងទៅ គ្មានចរាចរណ៍ភ្ញៀវបរទេសចេញចូល ជាហេតុនាំឲ្យវិស័យសណ្ឋាគាររង់គ្រោះធ្ងន់ធ្ងរ។
ទោះយ៉ាងណា បច្ចុប្បន្នការងារស្នូលរបស់លោក ឌិន សុមេធារិទ្ធ គឺអភិវឌ្ឍរមណីយដ្ឋាន ភូមិផ្កាត្រកួនរបស់លោកនៅជាយរាជធានីភ្នំពេញ ស្ថិតនៅភូមិផ្កាត្រកួន ឃុំស្វាយប្រទាល ស្រុកស្អាង ខេត្តកណ្តាល៕
អត្ថបទ៖ ទួន សុផល





-
ព័ត៌មានអន្ដរជាតិ១ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម៣ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៥ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៥ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៦ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម១ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
សន្តិសុខសង្គម១៥ ម៉ោង ago
ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ