អាកាសធាតុផ្ដើមចុះត្រជាក់ខ្លាំង សូមត្រៀមអាវរងា និងភួយក្រាស់ៗ

រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានប្រាប់​ឱ្យដឹងថា រដូវវស្សាបានបញ្ចប់ហើយ ប៉ុន្តែភ្លៀងនៅតែមាន ដោយសារតែតំបន់របស់យើង​កំពុងតែ​ទទួល​រងឥទ្ធិពលពីបាតុភូតឡានីណា ដែលបង្កឱ្យនៅតែមានការធ្លាក់ភ្លៀងជាបន្តបន្ទាប់។

លោកចាន់ យុត្ថា បញ្ជាក់ថា ខ្យល់មូសុងឦសានចាប់ផ្ដើមបង្កើនឥទ្ធិពល​មកលើព្រះរាជាណាចក្រ​កម្ពុជា ហើយនៅដើមខែធ្នូនេះ នឹងចាប់ចុះត្រជាក់ជាពិសេសគឺតំបន់ខ្ពង់រាបចាប់ផ្ដើមត្រជាក់មុន ចំណែកខាងក្រោមមិនទាន់ទេ លើកលែងតែផ្នែកខាងក្រោម ស្រុកវាលវែង នៃខេត្តពោធិ៍សាត់ និងខេត្តកោះកុងដែលជាប់ជាមួយវាលវែង។

លោកក៏អំពាវនាវឱ្យបងប្អូនប្រជាពលរដ្ឋយកចិត្តទុកដាក់ចំពោះសុខភាព ជាពិសេសចំពោះមនុស្ស​ចាស់ ត្រូវមានភូយ ឬខោអាវក្រាស់ៗ ដើម្បីទប់ទល់ជាមួយអាកាសធាតុចុះត្រជាក់។

ក្រសួងធនធានទឹក និងឧតុនិយម ប្រកាសថា អាកាសធាតុនឹងចាប់ផ្ដើមចុះត្រជាក់លើកទី១ ចាប់ពីថ្ងៃទី ១ ខែធ្នូ ដល់សប្ដាហ៍ទី ៣ ដែលមាននៅភូមិសាស្ត្រតំបន់ជួរភ្នំដងរែក និងខ្ពង់រាបភាគឦសាន សីតុណ្ហភាពអប្បរមា នឹងធ្លាក់ចុះក្នុងរង្វង់ ១៧ អង្សា ខណៈបណ្ដារាជធានី ខេត្តដ៍ទៃក្នុងរង្វង់ ១៩ អង្សា៕

អត្ថបទៈ ឡេង ដេត