រកឃើញម្ចាស់ពានរង្វាន់ ព្រះនាងឥន្ទ្រទេវី ជយលាភីប្រលោមលោកខ្នាតខ្លី និងកំណាព្យ ឆ្នាំ២០២១

វេលាព្រឹក ថ្ងៃទី ២៩ ខែវិច្ឆិកា ឆ្នាំ២០២១ នៅសហសាលាអង្គរ ទីស្ដីការក្រសួងវប្បធម៌ និង វិចិត្រសិល្បៈ បានរៀបចំធ្វើពិធីប្រគល់ពានរង្វាន់ជូនអ្នកជាប់ជយលាភីនិពន្ធ និងកំណាព្យ ដែលមានលោកជំទាវ នេត្រ ភូមារី រដ្ឋលេខាធិការ តំណាងខ្ពង់ខ្ពស់ លោកជំទាវ បណ្ឌិតសភាចារ្យ រដ្ឋមន្ត្រីក្រសួងវប្បធម៌ និងវិចិត្រសិល្បៈ។

ការសម្រេចរបស់គណៈកម្មការជយលាភីបានសម្រេចជ្រើសរើសទទួលយកជយលាភីស្នាដៃតែងនិពន្ធមានចំនួន ៥នាក់មានស្នាដៃពីលេខ ១ ដល់ស្នាដៃលេខ ៥ ចំពោះប្រលោមលោកខ្នាតខ្លី ដែលមានដូចជា រឿងគែនព្យួរជញ្ជាំង រឿងបូណ៌មី រឿងចិត្តប្រណី រឿងជំជីវិត និងរឿងទឹកភ្នែកស្នេហា។

ផ្នែកកំណាព្យវិញគណ:កម្មាធិការបានសម្រេចយកជយលាភី ៥ រូប ដែលមានកំណាព្យរឿងជយលាភីពីលេខ ១ ដល់លេខ ៥ រួមមានកំណាព្យ រឿងនិស្ស័យស្នេហ៍កុលាបស រឿងលោហិតវីរៈនារី រឿងកំណប់ស្នេហ៍ រឿងសំឡេងសង្គម និងរឿងម្ដាយ។

តាមការគូសបញ្ជាក់របស់ លោក កុក រស់ ប្រធាននាយកដ្ឋានសៀវភៅ និងការអានបានរៀបរាប់ថាក្នុងការវិនិច្ឆ័យវាយតម្លៃពិន្ទុជម្រើស ជម្រុះ ចម្រាញ់ ដើម្បីទទួលបានពានរង្វាន់ ក្រសួងបានបង្កើតគណ:កម្មការ វាយតម្លៃ ផ្នែកប្រលោមលោកខ្នាតខ្លីមួយ និងគណៈកម្មការ វាយតម្លៃផ្នែកកំណាព្យមួយ ដោយអនុវត្តទៅតាមលក្ខខណ្ឌ ៣ យ៉ាងជាគោលគឺ៖

១. អត្ថន័យ: ផ្ដោតលើគុណធម៌សច្ចធម៌ និង សីលធម៌។

២. អត្ថររូប: ផ្ដោតលើវិធីតែង.រចនាបថ និង សោភ័ណ្ឌ។

៣. អត្ថរស: ផ្តោតលើតម្លៃ អប់រំ តម្លៃជាតិ និង តម្លៃរីកចម្រើន៕

អត្ថបទ៖ រុងរឿង

ចុចអាន៖ សៀវភៅដ៏រសើប (អ្នកយុទ្ធសាស្រ្តវ័យក្មេងនៅ​អាស៊ី) ភាគី១ ត្រូវបានបោះពុម្ព និងផ្សព្វផ្សាយ​ជាផ្លូវការ