អភិបាល​ខេត្តរតនគិរី​ ណែនាំ​មន្ត្រី​ឱ្យ​អនុវត្តតួនាទី​ គោរពវិន័យ​ការងារ​ឱ្យ​បាន​ល្អ​

អភិបាលខេត្តរតនគិរី លោក ញ៉ែម សំអឿន បានណែនាំដល់មន្ត្រីថ្នាក់ក្រោម ឱ្យអនុវត្តតួនាទី ភារកិច្ចឲ្យបានល្អ គោរពវិន័យការងារ និងគោរពគ្នាទៅវិញទៅមក។

លោក ញ៉ែម សំអឿន លើកឡើងក្នុងពិធីជួបសំណេះសំណាលជាមួយថ្នាក់ដឹកនាំ មន្រ្តីរាជការ និងមន្រ្តីជាប់កិច្ចសន្យាទាំងអស់ ក្នុងរចនាសម្ព័ន្ធសាលាខេត្តរតនគិរី នៅថ្ងៃទី ៣០ ខែវិច្ឆិកា ឆ្នាំ ២០២១។

លោក អភិបាលខេត្តរតនគិរី បានថ្លែងអំណរគុណ ដល់មន្រ្តីរាជការគ្រប់រូប គ្រប់ផ្នែក ដែល​បាន​ខិតខំ បំពេញការងារជូនរដ្ឋបាលខេត្ត ក្នុងរយៈពេលកន្លងមក។ បន្ថែមពីនោះលោក​អភិបាលខេត្ត​ក៏​បាន​ណែ​នាំដល់មន្រ្ដីរាជការទាំងអស់ត្រូវធ្វើជាគំរូល្អដល់ប្រជាពលរដ្ឋ រួមមាន ការគោរពច្បាប់​ចរាចរណ៍ ការរក្សាអនាម័យ វិន័យ សីលធម៌ សុជីវធម៌ និងត្រូវបន្ដថែរក្សាសុខភាពអោយបានល្អ ព្រមទាំងត្រូវបន្ដការពារខ្លួនពីជំងឺកូវីដ-១៩ ឱ្យបានខ្ជាប់ខ្ជួនផងដែរ។

លោកអភិបាលខេត្តក៏បានណែនាំដល់មន្រ្តីគ្រប់រូបត្រូវបង្កើនការ សិក្សារៀនសូត្រនូវអ្វីដែលមាន​ការខ្វះ​ចន្លោះពីរៀមច្បង អ្នកជុំវិញខ្លួនក៏ដូចជា លិខិតបទដ្ឋានគតិយុត្តផ្សេងៗ ដើម្បីពង្រឹង​ប្រសិទ្ធ​ភាព​ក្នុងការអនុវត្តតួនាទី ភារកិច្ច៕

អត្ថបទៈ វុទ្ធឦសាន