មន្ត្រី​​ចូល​​រួម​​ដាំ​កូន​ឈើ​២ ពាន់​​ដើម​ ​លើ​ដី​ដែល​ដក​ហូត​បាន​ ២ ពាន់​ហិកតា​

លោក ណៅ ធួក រដ្ឋលេខាធិការក្រសួងកសិកម្ម និងលោក ស៊ុន សុវណ្ណារិទ្ធិ អភិបាល នៃគណៈ​អភិ​បាល​ខេត្តកំពង់ឆ្នាំង នៅព្រឹកថ្ងៃទី ០២ ខែធ្នូ ឆ្នាំ២០២១ បានដឹកនាំកងកម្លាំងប្រដាប់អាវុធ និង​មន្ត្រីរាជ​ការប្រមាណជាង ៥០០ នាក់ ដាំដុះកូនឈើ​ព្រៃលិចទឹក​មានដើមរាំង និងដើម​រំដេញចំនួន ២០០០ ដើម នៅលើដីលិចទឹកចំនួន ២ ពាន់ហិកតា នៅតំបន់គោកព្រះ ស្ថិតនៅក្នុងឃុំច្រណូក ស្រុកកំពង់លែង ដែលដក​ហូតពីជនខិលខូច។

លោក ស៊ុន សុវណ្ណារិទ្ធ បានថ្លែងថា ការដាំដើមឈើព្រៃលិចទឹកឡើងវិញនៅថ្ងៃនេះ គឺជាការរួមចំណែកជាមួយប្រមុខរាជរដ្ឋាភិបាល ក្នុងការស្ដារឡើងវិញ ដីព្រៃលិចទឹកជុំវិញបឹងទន្លេសាប ដែលជាជម្រកត្រីពងកូន ដើម្បីបង្កើនព្រៃលិចទឹកឲ្យសម្បូរដូចដើមឡើង​វិញ។

លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំង ក៏បានឱ្យដឹងដែរថា សម្រាប់​ខេត្តកំពង់ឆ្នាំង នឹងត្រូវដាំកូនឈើព្រៃលិចទឹកចំនួន ២០ ម៉ឺនដើមឡើងវិញនៅ ក្នុងតំបន់​លិច​ទឹកគោកព្រះនេះ។

ចំណែកតាមបណ្ដាស្រុក ក្រុង មួយចំនួនទៀត នៅតាមតំបន់ ៣នៃព្រៃលិចទឹក ដែលរងការបំផ្លាញ ក៏ត្រូវដាំដុះដើមឈើព្រៃលិច​ជាបន្តបន្ទាប់នៅថ្ងៃ​ខាងមុខផង​ដែរ៕

អត្ថបទ៖ ឈៀងថារិទ្ធ