រដ្ឋាភិបាល ផ្តល់ដីព្រៃកោងកាងជាង១៤២ហិកតានៅខេត្តកែបឱ្យទៅជនបរទេសសញ្ជាតិខ្មែរមួយរូប

ផ្ទៃដីព្រៃកោងកាងទំហំ ១៤២.៩៨ ហិកតាស្ថិតក្នុងភូមិសាស្រ្តភូមិអង្កោល និងភូមិទូលសាងាំ ឃុំអង្កោល ស្រុកដំណាក់ចង្អើរខេត្តកែប ត្រូវបានរាជរដ្ឋាភិបាលកម្ពុជាសម្រេចផ្តល់សិទ្ធិឱ្យឈ្មោះ ហ្សានីញ៉េ រ៉ូស្សេល្វីស្យូសែហ្វ មានសញ្ជាតិខ្មែរដើមកំណើតស្វីស ដោយផ្តល់សុពលភាពឡើងវិញនូវបណ្ណសម្គាល់សិទ្ធិកាន់កាប់អចលនវត្ថុចំនួន៣២បណ្ណ។​ នេះបើយោងតាមសេចក្តីជូនដំណឹងរបស់ទីស្តីការគណៈរដ្ឋមន្ត្រីចុះថ្ងៃ​ទី២២ ខែតុលា ឆ្នាំ២០២១ថ្មីៗនេះ។

ការផ្តល់សិទ្ធិឡើងវិញនេះ ដោយសារក្នុងកំឡុងឆ្នាំ ២០១៦ រាជរដ្ឋាភិបាលធ្លាប់បានចេញ ស.ជ.ណ លេខ ៧៩៩ ដោយសម្រេចនិរាករណ៍ចោលនូវបណ្ណកម្មសិទ្ធិទាំង៣២បណ្ណ ដែលបានចេញកាលពីឆ្នាំ ២០០៨ នោះចោល ដោយទុកដីព្រៃកោងកាងទាំងនេះជាសម្បត្តិរដ្ឋវិញ។

លោក សុទ្ធពុទ្ធិ ម៉ានីន ប្រធានមន្ទីររៀបចំដែនដី នគរូបណីយកម្ម សំណង់ និងសុរិយោដី ខេត្តកែប និងលោក សយ ចាន់រ៉ាវុធ ប្រធានភូមិបាលស្រុកដំណាក់ចង្អើរបានបញ្ជាក់ឱ្យដឹងនៅថ្ងៃទី៣ ខែធ្នូ ឆ្នាំ២០២១នេះថា ដីដែលរាជរដ្ឋាភិបាលចេញសេចក្តីណែនាំសម្រេចផ្តល់សិទ្ធិទៅឱ្យឯកជននេះ គឺស្ថិតក្នុងដំបន់ដីព្រៃកោងកាងក្នុងភូមិអង្កោល មានចំនួន ២២បណ្ណ និង ភូមិទូលសាងាំមានចំនួន១០បណ្ណ សរុបមានផ្ទៃដី១៤២.៩៨ ហិកតា។

គួរបញ្ជាក់ថា ដីព្រៃកោងកាង និងដីគម្របព្រៃលិចទឹកស្ថិតក្នុងខេត្តកែបសរុបមានចំនួន ១.០០៥ ហិកតា។​ទោះជាយ៉ាងណា អាជ្ញាធរខេត្តកែប មិនបានបញ្ជាក់ឱ្យដឹងថា ផ្ទៃដីទាំងនេះ បុគ្គលខាងលើនឹងយកអភិវឌ្ឍន៍ធ្វើអ្វីនោះឡើយ៕

អត្ថបទ៖ ណារី