ប៉ូលិសប្រឆាំងបទល្មើសសេដ្ឋកិច្ច ចុះកម្ទេចបទល្មើសលើផ្ទៃទឹកដែលកំពុងដាក់ពង្រាយយ៉ាងអនាធិបតេយ្យ

លោកឧត្តមសេនីយ៍ទោ​ សាត​ គឹមសាន​ ស្នងការនៃស្នងការដ្ឋាននគរ​បាលខេត្តបាត់ដំបង នៅថ្ងៃទី០២ ខែធ្នូ ឆ្នាំ​២០២១ ​ បានចេញបទបញ្ជាឱ្យលោកឧត្តមសេនីយ៍ត្រី ចេង ឡេង ស្នងការរងផែនការងារប្រឆាំង ប​ទ​ល្មើស​សេដ្ឋកិច្ច និង លោកវរៈសេនីយ៍ឯក យី យក់សាន នាយការិយាល័យនគរបាលប្រឆាំ​ង​បទល្មើ​សសេដ្ឋកិច្ច ដឹកនាំកម្លាំងក្នុងការិយាល័យ សហការជាមួយកម្លាំងមូលដ្ឋានស្រុកឯកភ្នំ កម្លាំងនគរ​បាលចរា​ចរណ៍ផ្លូវទឹក ដើម្បីចុះបង្ក្រាបបទ​ល្មើសនេសាទខុសច្បាប់ នៅលើផ្ទៃបឹងទន្លេសាប។

កិច្ចប្រតិបត្តិការនេះ បានធ្វើឡើងនៅចំណុចអភិរក្ស អតី​តឡូត៍លេខ៦ និង លេខ៩ ដែលស្ថិតក្នុង ភូមិសាស្ត្រ​ ឃុំព្រៃចាស់ ស្រុកឯកភ្នំ ខេត្តបាត់ដំបង។ ជាលទ្ធផលនៃការបង្ក្រាប អាជ្ញាធរមានសមត្ថកិច្ចរឹបអូសបាន រួមមាន សាច់មងប្រវែង​ ៣.៥០០ម៉ែត្រ ឡុកចំនួន ៦ ឡុក បង្គោលឈើ ចំនួន ៣៥០ ដើម និង លែងកូនត្រីចម្រុះទម្ងន់ ៥០ គីឡូក្រាម ។

ក្រោយកិច្ចប្រតិបត្តិការនេះ គឺសម្ភារៈល្មើសខាងលើត្រូវក្រុមការងារបានសម្រេចដុតបំផ្លាញចោលនៅនឹងកន្លែងតែម្តង  រីឯអ្នកប្រព្រឹត្តសកម្មភាពល្មើសនេះ​ សមត្ថកិច្ចបានស្រាវជ្រាវ និងកំណត់មុខសញ្ញាបានខ្លះហើយ៕

 អត្ថបទ៖ សោ និយមរ័ត្ន