រដ្ឋាភិបាលកម្ពុជាកំណត់យកថ្ងៃ៨ ធ្នូ ជាថ្ងៃកាន់ទុក្ខផ្លូវការព្រះសព សម្តេចក្រុមព្រះ

រាជរដ្ឋាភិបាលកម្ពុជាបានកំណត់យកថ្ងៃទី៨​ ខែធ្នូ ឆ្នាំ២០២១ គឺជាថ្ងៃកាន់ទុក្ខជាផ្លូវការព្រះសព សម្ដេចក្រុមព្រះ នរោត្ដម រណឫទ្ធិ ប្រធានក្រុមឧត្ដមប្រឹក្សាផ្ទាល់ព្រះមហាក្សត្រកម្ពុជា អតីតនាយករដ្ឋមន្ត្រីទី១ និងជាអតីតប្រធានរដ្ឋសភា។ នេះបើយោងតាមសារាចរ ណែនាំស្តីពីកាចូលរួមគោរពព្រះវិញ្ញាណក្ខន្ធ ព្រះសព សម្ដេចក្រុមព្រះរបស់រាជរដ្ឋាភិបាលកម្ពុជាចុះថ្ងៃទី០៣ ខែធ្នូ ឆ្នាំ២០២១។

រាជរដ្ឋាភិបាលកម្ពុជា បានតម្រូវឱ្យក្រសួង ស្ថាប័នរដ្ឋ សាលារៀន មន្ទីរពេទ្យរដ្ឋ និងឯកជនទាំងអស់ និងមន្ត្រីរាជការកងកម្លាំងប្រដាប់អាវុធគ្រប់ប្រភេទ គ្រប់វត្តអារាម ព្រមទាំងប្រជាពលរដ្ឋទូទាំងប្រទេសត្រូវបង្ហូតទង់ជាតិត្រឹមពាក់កណ្តាលនៅថ្ងៃ ៨ ធ្នូ ឆ្នាំ២០២១ ខាងមុខនេះ។ ជាមួយគ្នានេះ គ្រប់ស្ថានីយ៍វិទ្យុ ទូរទស្សន៍រដ្ឋ និងឯកជនផ្អាកការសម្តែង និងចាក់ផ្សាយកម្មវិធីសប្បាយៗក្នុងលក្ខណៈគគ្រឹកគគ្រេង។

សូមបញ្ជាក់ថា សម្តេច​ក្រុម​ព្រះ នរោត្តម រណឫទ្ធិ ទ្រង់​បាន​សោយ​ទិវង្គត ក្នុង​ព្រះជន្ម​៧៧​ព្រះវស្សា ​នៅ​ប្រទេស​បារាំង នៅថ្ងៃទី២៨ ខែវិច្ឆិកា ឆ្នាំ២០២១។ ព្រះសពសម្តេចក្រុមព្រះ នឹងដង្ហែរមក ដល់រាជធានីភ្នំពេញ វេលាម៉ោង១១ថ្ងៃត្រង់ នៅថ្ងៃទី៥ ខែធ្នូ ឆ្នាំ២០២១ ។ បន្ទាប់ពីការយាងមកដល់ហើយ ព្រះសពនឹងតម្កល់ធ្វើបុណ្យថ្វាយតាមព្រះរាជបវេណី តាមគន្លងព្រះពុទ្ធសាសនា នៅក្នុងព្រះដំណាក់សម្តេច នាវិថីសម្តេចប៉ាន រាជធានីភ្នំពេញ(ព្រះដំណាក់ចាស់)៕

អត្ថបទ៖ សំអឿន