បុគ្គលល្បីៗលើពិភពលោកធ្លាប់មកស្នាក់នៅសណ្ឋាគារឯករាជ្យ ខេត្តព្រះសីហនុកាលពី ជិត៦០ឆ្នាំមុន

សណ្ឋាគារឯករាជ្យ ឬគេស្គាល់ហៅថា សណ្ឋាគារ ៧ ជាន់ គឺជាសណ្ឋាគារប្រវត្តិសាស្ត្រមួយនៅខេត្តព្រះសីហនុ។ សណ្ឋាគារនេះ ត្រូវបានគូរប្លង់ ដោយស្ថាបត្យករជនជាតិបារាំង និងកសាងនៅឆ្នាំ ១៩៦៣ ក្នុងសម័យសង្គមរាស្ត្រនិយម ក្រោមស្នាព្រះហស្ថដឹកនាំរបស់ព្រះបរមរតនកោដ្ឋ សម្តេចឪ នរោត្តម សីហនុ ដែលជាផ្នែកមួយនៃការបង្ហាញពីសុទិដ្ឋិនិយមរបស់ព្រះរាជាណាចក្រកម្ពុជាក្រោយទទួលបានឯករាជ្យពីអាណានិគមបារាំង។

សណ្ឋាគារនេះស្ថិតនៅជាប់ឆ្នេរសមុទ្រ ហើយភ្ញៀវ ដែលស្នាក់នៅសណ្ឋាគារនេះរួមមានឥស្សរជនល្បីៗលើពិភពលោក ដូចជាលោកជំទាវជាស្ត្រីទី១ របស់សហរដ្ឋអាម៉េរិក Jacqueline Kennedy ភរិយារបស់អតីតប្រធានាធិបតី John F. Kennedy រួមនឹងតារាបរទេសល្បីៗ។

នៅក្នុងរបបខ្មែរក្រហម សណ្ឋាគារនេះមិនត្រូវបានប្រើប្រាស់ទេ ហើយតំបន់នោះត្រូវបានជឿថា ប្រើប្រាស់ជាកន្លែងឃុំខ្លួនមនុស្សរបស់ខ្មែរក្រហមទៀតផង។ ក្រោយពីខ្មែរក្រហមត្រូវបានផ្តួលរលំ សណ្ឋាគារនេះ ត្រូវបានបើកទ្វារឡើងវិញ នៅឆ្នាំ ១៩៩២ ដើម្បីធ្វើជាកន្លែងស្នាក់នៅរបស់មន្ត្រីនៃអាជ្ញាធរបណ្តោះអាសន្នរបស់អង្គការសហប្រជាជាតិប្រចាំកម្ពុជា (អ៊ុនតាក់)។

នៅឆ្នាំ២០០៧ សណ្ឋាគារឯករាជ្យត្រូវបានរៀបចំឡើងវិញ និងបានបើកដំណើរការសម្រាប់ការទទួលភ្ញៀវទេសចរ មកដល់សព្វថ្ងៃ។ អគារមួយចំនួន រួមនឹងអាងទឹកជាប់មាត់សមុទ្រគឺជាសំណង់ថ្មី។ ប្រភព៖ នេត្រ ភក្រ្តា