ព័ត៌មានជាតិ

នាយឧត្តមសេនីយ៍ វង្ស ពិសេន នឹងអញ្ជើញមេបញ្ជាការកងទ័ពហ្វីលីពីន ចូលរួមកិច្ចប្រជុំនៅភ្នំពេញ នាខែមីនា ឆ្នាំក្រោយ

បានផុស

៣ years មុន

នៅ

ថ្ងៃពុធ ៨ ធ្នូ ២០២១

ដោយ

នៅអំឡុងខែមីនា ឆ្នាំ២០២២ ខាងមុខនេះ កងយោធពលខេមរភូមិន្ទកម្ពុជា នឹងធ្វើជាម្ចាស់ផ្ទះនៃកិច្ចប្រជុំអគ្គមេបញ្ជាការកងទ័ពអាស៊ានលើកទី១៩ និងកិច្ចប្រជុំពាក់ព័ន្ធ ដូច្នេះកិច្ចប្រជុំនោះ នាយឧត្តមសេនីយ៍ វង្ស ពិសេន នឹងអញ្ជើញអគ្គមេបញ្ជាការកងទ័ពនៅបណ្តាប្រទេសអាស៊ានចូលរួម ហើយក៏នឹងអញ្ជើញកងទ័ពហ្វីលីពីន ដើម្បីចូលរួមផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់បែបនេះ បានធ្វើឡើងនៅក្នុងជំនួបពិភាក្សារវាងនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ជាមួយឧត្តមសេនីយ៍ឯក អង់ដ្រេ សេនទីណូ នាយសេនាធិការកងទ័ពហ្វីលីពីន នៅព្រឹកថ្ងៃទី០៨ ខែធ្នូ ឆ្នាំ២០២១នេះ តាមប្រព័ន្ធវីដេអូ។

ក្នុងជំនួបនោះ អគ្គមេបញ្ជាការកងទ័ពកម្ពុជា និងនាយសេនាធិការកងទ័ពហ្វីលីពីន បានផ្លាស់ប្តូរយោបល់គ្នាទៅវិញទៅមក អំពីការចូលរួមរបស់កងទ័ពជាមួយរដ្ឋាភិបាល ដើម្បីប្រយុទ្ធប្រឆាំងនឹងជំងឺកូវីដ-១៩។ អគ្គមេបញ្ជាការកងទ័ពកម្ពុជា និងនាយសេនាធិការកងទ័ពហ្វីលីពីន ក៏បានលើកឡើងអំពីកិច្ចសហប្រតិបត្តិការរវាងកងទ័ពប្រទេសទាំងពីរនាពេលកន្លងមក និងបានអះអាងរួមគ្នាពីការបន្តពង្រឹងពង្រីកកិច្ចសហប្រតិបត្តិការជាមួយគ្នាឡើងវិញ បន្ទាប់ពីអាក់ខានមួយរយៈដោយសារជំងឺកូវីដ-១៩។

ជាមួយគ្នានោះ នាយឧត្តមសេនីយ៍ វង្ស ពិសេន ក៏បានអះអាងពីការ ដែលកងយោធពលខេមរភូមិន្ទត្រូវធ្វើជាម្ចាស់ផ្ទះនៃកិច្ចប្រជុំអគ្គមេបញ្ជាការកងទ័ពអាស៊ានលើកទី១៩ និងកិច្ចប្រជុំពាក់ព័ន្ធ ដោយផ្ទាល់នៅរាជធានីភ្នំពេញ នាអំឡុងខែមីនា ឆ្នាំ២០២២ ខាងមុខនេះ៕

ដោយ ៖ កោះកែវ