ព័ត៌មានជាតិ

ក្រសួងសុខាភិបាល បង្ហាញទីតាំងយកសំណាកលើកទី២

បានផុស

៤ years មុន

នៅ

ថ្ងៃចន្ទ ៧ ធ្នូ ២០២០

ដោយ

ក្រសួងសុខាភិបាល បានបង្ហាញទីតាំងយកសំណាកលើកទី២ ចំនួន៥កន្លែងចំពោះអ្នកពាក់ព័ន្ធព្រឹត្តិការណ៍សហគមន៍២៨វិច្ឆិកា ដែលត្រូវធ្វើតេស្តនៅថ្ងៃទី៨ ខែធ្នូ ឆ្នាំ២០២០ ស្អែកនេះ។

បើតាមក្រសួងសុខាភិបាល ទីតាំងទាំង៥កន្លែង រួមមានទី១. ផ្ទះសម្តេចពញាចក្រី ហេង សំរិន ធ្វើនៅវេលាម៉ោង៨ព្រឹក ទី២. ផ្ទះសម្តេចក្រឡាហោម ស ខេង វេលាម៉ោង៨ព្រឹក ទី៣.នៅរដ្ឋសភា វេលាម៉ោង៩ព្រឹកទី៤.នៅអង្គភាពភីឡុតបន្ទាយទួលក្រសាំង សម្រាប់ក្រុមភីឡុត និងក្រុមអង្គរក្ស សម្តេចតេជោ វេលាម៉ោង៨ព្រឹកនិងទី៥.នៅពហុកីឡដ្ឋានជាតិ អូឡាំពិក សម្រាប់ប្រជាពលរដ្ឋដែលមានជាប់ពាក់ព័ន្ធផ្ទាល់និងប្រយោលវេលាម៉ោង៧ព្រឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានមានប្រសាសន៍ថា ចំពោះមន្រ្តីក្រសួងមហាផ្ទៃ ដែលបានធ្វើតេស្តយកសំណាកលើកទី១ពាក់ព័ន្ធព្រឹត្តិការសហគមន៍២៨វិច្ឆិកា មានទាំងអស់ចំនួន១៥៤៤នាក់ ត្រូវធ្វើតេស្តយកសំណាកលើកទី២ និងមន្ត្រីដែលមិនទាន់បានធ្វើតេស្ត នៅថ្ងៃទី០៧ ខែធ្នូ ឆ្នាំ២០២០ ចាប់ផ្តើមពីម៉ោង៨ព្រឹក តទៅ។

ក្រសួងសុខាភិបាល នឹងធ្វើតេស្តដល់អ្នកពាក់ព្រឹត្តិការណ៍សហគមន៍២៨វិច្ឆិកា ចំនួន៣លើក ដែលលើកទី១បានធ្វើរួចហើយនៅថ្ងៃទី២៩ និង៣០ ខែវិច្ឆិកា និងលើកទី២ ធ្វើនៅថ្ងៃទី៨ ខែធ្នូ និងលើកទី៣ នៅថ្ងៃទី១២ ខែធ្នូ ឆ្នាំ២០២០។

គិតពីថ្ងៃទី២៩ ខែវិច្ឆិកា ដល់ ថ្ងៃទី០៦ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់ក្នុងព្រឹត្តិការណ៍ «សហគមន៍២៨វិច្ឆិកា» សរុបចំនួន១១៣០៥សំណាក ដែលនៅក្នុងចំនួននេះ មានអ្នកវិជ្ជមានកូវីដ-១៩ ថ្មីចំនួន ៣២នាក់ ដែលកំពុងសម្រាកព្យាបាលនៅមន្ទីរពេទ្យខ្មែរសូវៀត និងមណ្ឌលសុខភាព ចាក់អង្រែ។

គួរបញ្ជាក់ថា គិតត្រឹមម៉ោង៧ព្រឹក ថ្ងៃទី០៧ ខែធ្នូ ឆ្នាំ២០២០ កម្ពុជាបានរកឃើញអ្នកឆ្លងកូវីដ-១៩ សរុបចំនួន ៣៤៨នាក់ ក្នុងនោះអ្នកព្យាបាលជាសះស្បើយចំនួន ៣០៦នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៤២នាក់៕

អត្ថបទ ៖ សំអឿន