កុមារ ៣នាក់បងប្អូន នៅឃុំអណ្តូងទឹក ស្រុកបូទុមសាគរ ទទួលបានផ្ទះថ្មី

កុមារា-កុមារី ៣នាក់បងប្អូន បានរួចផុតពីភាពក្តៅរងា ក្រោយរស់នៅក្នុងខ្ទមចាស់ ធ្លុះធ្លាយលំបាក ដោយជំនួសមកវិញនូវផ្ទះថ្មី គ្រារដ្ឋបាលស្រុកបូទុមសាគរ ផ្តួចផ្តើមសាងសង់ជូន។

លោក ហាក់ ឡេង អភិបាលស្រុកបុទុមសាគរ បានដឹងកាលពីថ្ងៃទី ៧ ខែធ្នូ ថ្មីៗនេះថា កុមារទាំង ៣នាក់ រស់នៅជាមួយភាពប្រាកដប្រជា ចំពោះខ្សែជីវិតរបស់ពួកគេ គ្រាឪពុក-ម្ដាយបានបាក់បែកគ្នា ព្រោះតែការមិនចុះសម្រុងនឹងគ្នា ទុកឲ្យកូនៗ រស់នៅក្នុងខ្ទមកម្សត់។

លោកអភិបាលស្រុកបូទុមសាគរ បានបន្ថែមថា ម្តាយកុមារទាំង ៣រូបខាងលើ ចាកចេញទៅធ្វើការជាកម្មករ នៅឯក្រុមហ៊ុនញូញៀន យូរខែៗទើបមកលេងកូនម្តង ព្រោះតែស្វែងរកចំណូលមកផ្តត់ផ្គង់ជីវភាពគ្រួសារ។ ពេលដែលម្តាយមិននៅជាមួយ កុមារទាំងនេះ ត្រូវម្តាយផ្ញើនឹងអ្នកជិតខាងជួយមើលថែ។

ភាពលំបាករបស់ពលរដ្ឋ មិនត្រូវបានមើលរំលងឡើយ ដោយលោក ហាក់ ឡេង ក៏ផ្តួចផ្តើមគៀងគរថវិកា សម្ភារៈមក ជួយសង់ផ្ទះថ្មី ដល់កុមារទាំង ៣នាក់បងប្អូន ដើម្បីមានជាជម្រករស់នៅសមរម្យ ស្ថិតនៅភូមិជីត្រេះ ឃុំអណ្ដូងទឹក  ស្រុកបូទុមសាគរ ខេត្តកោះកុង។

បើតាមលោក ឃៀង យិង មេឃុំអណ្តូងទឹក បានឲ្យដឹងដែរថា ឪពុកម្តាយរបស់កុមារកំព្រាទាំង ៣នាក់ បានបែកបាក់គ្នាជិត ២ឆ្នាំហើយ ដោយបន្សល់ឲ្យកូនៗ រស់នៅក្នុងភាពខ្វះកក់ក្តៅ ពឹងទៅលើម្តាយមីង ឬអ្នកជិតខាងរបងជាមួយមើលថែរក្សា ទោះបីយ៉ាងណាមិនដូចពេលម្តាយឪពុក នៅជុំគ្នានោះទេ។

លោកមេឃុំអណ្តូងទឹក និងអាជ្ញាធរពាក់ព័ន្ធ តែងតែពិនិត្យដោះស្រាយ រាល់បញ្ហាខ្វះខាតរបស់ពួកគេដូចពលរដ្ឋដ៏ទៃទៀតដែរ សម្រាប់ជីវភាព។ ដើម្បីផ្តល់លទ្ធភាពដល់កុមារទាំង ៣នាក់ មានអនាគតល្អ លោក ឃៀង យិង ស្នើសុំដល់រដ្ឋបាលខេត្ត មន្ទីរកិច្ចការនារី ឬអ្នកពាក់ព័ន្ធ មេត្តាពិនិត្យដោះស្រាយបន្ថែមមិនថា ទាំងថវិកា ស្បៀងអាហារ និងសម្ភារៈផ្សេងៗ ដល់កុមារកំព្រា៕

  អត្តបទ៖ សិរី វឌ្ឍនៈ