លោកស្រី ​ឱ វណ្ណឌីន​៖ វីរុស​កូវីដ១៩​ បំប្លែង​ថ្មី អូមីក្រុង​អាច ស្រាលជាង Delta

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថា វីរុសកូវីដ១៩ បំប្លែងថ្មី អូមីក្រុង មានស្ថានភាពស្រដៀងគ្នាទៅ ​នឹងវីរុសដែលតា ហើយអាចស្រាល​ជាងវីរុសកូវីដ១៩ ដែលតា គ្រាន់តែខុសត្រង់ល្បឿននៃការ​ឆ្លងលឿនប៉ុណ្ណោះ។

ថ្លែងនៅ ក្នុងសន្និសីទសារព័ត៌មាន ស្ដីពីបច្ចុប្បន្នភាពនៃវីរុសកូវីដ១៩ បំប្លែងថ្មី «អូមីក្រុង» នៅ រសៀល​ថ្ងៃទី ០៩ ខែធ្នូ ឆ្នាំ ២០២១ លោកស្រីថា អង្គការសុខភាពពិភពលោក កំពុងតែបន្តសិក្សាពីភាពធ្ងន់ធ្ងរវីរុសបំប្លែងថ្មីនេះ ហើយប្រសិនបើ​មេរោគ​អូមី​ក្រុងឆ្លងចូលកម្ពុជា ក៏វាជាមេរោគកូវីដ១៩ ដោយយើងត្រូវរួមគ្នាចូលរួមទប់ស្កាត់ការឆ្លងរីករាលដាល។

លោកស្រី ឱ វណ្ណឌីន ឱ្យដឹងថា តាមអ្នកវិទ្យាសាស្ត្រ វីរុស​កូវីដ​បំប្លែង​ខ្លួន​ថ្មី មានលទ្ធភាពបំប្លែងខ្លួនច្រើន ខុសពីវីរុសមុនធ្វើឱ្យមានការព្រួយបារម្ភ។

លោកស្រីថា រោគសញ្ញា ដែលអ្នកវិទ្យាសាស្ត្ររកឃើញមួយចំនួន មិនខុសប្លែកពីមេរោគកូវីដ១៩ នោះទេ ដូចជាហត់ អស់កំលាំង ក្ដៅ ខ្លួន ក្អក និងឈឺបំពង់ក តែក៏មានការវិវត្តនៅ ពេលខាងមុខ ប៉ុន្តែគេក៏សង្កេតឃើញថា មិនធ្វើឱ្យមានការបាត់ក្លិត ខណៈដែលកូវីដកន្លងមកមានការបាត់ក្លិន និងរសជាតិ។

លោកស្រី ឱ វណ្ឌឌីន បញ្ជាក់ថា ការចាក់វ៉ាក់សាំងនៅ តែជាឧបករណ៍ មានសារប្រយោជន៍ សម្រាប់​សមនុស្ស អាចការពារការវាយលុក មិនឱ្យមានស្ថានភាពធ្ងន់ធ្ងរ មិនថាប្រភេទជំងឺ​កូវីដបំប្លែង​ថ្មីអូមីក្រុង ឬប្រភេទបំប្លែងថ្មីជាច្រើនទៀត៕