រៀនបើកបររថយន្តដឹកដីខុសបច្ចេកទេសធ្លាក់ចូលត្រពាំងទឹកលិចបាត់បង្កការភ្ញាក់ផ្អើល

 ខេត្តស្វាយរៀង៖ ហេតុការណ៍មួយបង្កឲ្យមានភ្ញាក់ផ្អើលដល់ពលរដ្ឋរស់នៅក្នុងឃុំដូង ស្រុករមាសហែក ខេត្តស្វាយរៀង នាំគ្នាចោមរោមមើលរថយន្តដឹកដីមួយគ្រឿង ធ្លាក់ចូលត្រពាំងទឹក នៅរសៀលថ្ងៃទី ០៩ ខែ ធ្នូ ឆ្នាំ ២០២១។

ហេតុការណ៍នេះបង្កឡើងដោយបុរសម្នាក់ឈ្មោះ សូ ស៊ុត ភេទប្រុស អាយុ ៥៣ឆ្នាំ មានទីលំនៅភូមិឃុំកើតហេតុខាងលើ បានរៀនបើករថយន្តដឹកដីប្រភេទ ១តោនកន្លះ ពីទិសខាងកើតទៅលិច លុះមកដល់ចំណុចកើតហេតុ ដែលមានត្រពាំង(ឈ្មោះត្រពាំងស្លា) ក៏ជាន់ហ្វ្រាំងរថយន្តមិនស៊ី បណ្តាលឲ្យរថយន្តរអិលធ្លាក់ចូលក្នុងត្រពាំងទឹកលិចបាត់ស្រមោល។ 

ហេតុការណ៍នេះ មិនបង្កឲ្យនរណាម្នាក់រងរបួសនោះឡើយ ពោលគឺខូចខាតតែរថយន្ត ប៉ុណ្ណោះ។

ក្រោយកើតហេតុ ម្ចាស់រថយន្តបានហៅ ឡានអេសកាវ៉ាទ័រ មកទាញយករថយន្តពីក្នុងត្រពាំង ដើម្បីយកទៅជួសជុលដោយខ្លួនឯង៕ ដោយ:ភក្ដី