រោងកែច្នៃ​ឈើប្រណីត​ពីរកន្លែង​បង្ក្រាបមិន​បាន​ប៉ុន្មាន​ថ្ងៃ បើកឡើងវិញ

ប្រភពពីប្រពលរដ្ឋបានឲ្យដឹងថា រោងសិប្បកម្មកែច្នៃឈើប្រណីតពីរកន្លែងរបស់ជនជាតិវៀតណាមឈ្មោះ វ៉ា បានបើកដំណើរការឡើងវិញយ៉ាងព្រងើយ បន្ទាប់ពីសមត្ថកិច្ច និងមន្ត្រីជំនាញស្រុកត្រពាំងប្រាសាទ ចុះបង្ក្រាបមិនបានប៉ុន្មានថ្ងៃផង។

ឈើប្រណីតជាច្រើនពាសពេញដី និងមានជាងជាច្រើននាក់ កំពុងធ្វើសកម្មភាពកែច្នៃឈើយ៉ាងសកម្ម ខណៈប្រជាពលរដ្ឋស្នើឱ្យសមត្ថកិច្ច បន្តចុះបង្ក្រាប និងរឹតបន្តឹងបន្ថែមទៀត ជុំវិញសកម្មភាព ដើម្បីរក្សាទុក និងកុំឱ្យវិនាសបាត់បង់ឈើប្រណីតៗ។

សូមបញ្ជាក់ផងដែរថា ទីតាំងរោងសិប្បកម្មកែច្នៃឈើប្រណីតទាំងពីរកន្លែង របស់មេឈ្មួញជនជាតិវៀតណាមរូបនេះ ទីមួយ នៅ ខាងក្រោយផ្សារសាមគ្គី ទីពីរនៅ ខាងត្បូងចូលតាមក្លោងទ្វារចុងភៅ អូរតាយ៉ត តាមផ្លូវលំប្រហែលជាងមួយរយម៉ែត្រពីថ្នល់ជាតិ ភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

អត្ថបទ៖ ចាន់ ធី