ហាមឃាត់ការធ្វើចរាចរ ឆ្លងកាត់កំណាត់មហាវិថីឈ្នះ-ឈ្នះ នៅថ្ងៃទី ១៨ធ្នូ ដើម្បីសម្ពោធវិមាន​កីឡ​ដ្ឋាន នៃពហុកីឡដ្ឋានជាតិមរតកតេជោ

រដ្ឋបាលរាជធានីភ្នំពេញ នឹងធ្វើការហាមយានយន្តគ្រប់ប្រភេទ ធ្វើចរាចរឆ្លងកាត់កំណាត់មហាវិថីឈ្នះ-ឈ្នះ ចាប់ពីគល់ស្ពានព្រែកព្នៅ រហូតដល់ផ្លូវជាតិលេខ ៦ នៅថ្ងៃទី ១៨ ខែធ្នូ ឆ្នាំ ២០២១ ដើម្បីរៀបចំពិធីសម្ពោធ ដាក់ឲ្យប្រើប្រាស់ជាផ្លូវការវិមានកីឡដ្ឋាន នៃពហុកីឡដ្ឋានជាតិមរតកតេជោ ស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដោយចាប់ផ្តើមពីម៉ោង ៥ព្រឹក រហូតដល់ចប់កម្មវិធី។

សេចក្តីជូនដំណឹង របស់រដ្ឋបាលរាជធានីភ្នំពេញ នៅថ្ងៃទី១៣ ខែធ្នូនេះ បានឲ្យដឹងថា នៅថ្ងៃទី ១៨ ខែធ្នូ ឆ្នាំ ២០២១ ចាប់ពីម៉ោង ៥និង០០នាទី គណៈកម្មាធិការជាតិរៀបចំការប្រកួតកីឡា អាស៊ីអាគ្នេយ៍លើកទី ៣២ ឆ្នាំ ២០២៣ នឹងមានរៀបចំពិធីសម្ពោធ ដាក់ឲ្យប្រើប្រាស់ជាផ្លូវការវិមានកីឡដ្ឋាន នៃពហុកីឡដ្ឋានជាតិមរតកតេជោ ដែលស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។

ដើម្បីឲ្យកម្មវិធីនេះប្រព្រឹត្តទៅដោយរលូន និងរក្សាបាននូវសន្តិសុខ សណ្តាប់ធ្នាប់ និងរបៀបរៀបរយ សាធារណៈ ជាពិសេសដើម្បីកាត់បន្ថយ នូវការកកស្ទះចរាចរ រដ្ឋបាលរាជធានីភ្នំពេញ បានជម្រាបដល់ប្រជាពលរដ្ឋ ម្ចាស់ការដ្ឋានសំណង់នានា ម្ចាស់អាជីវកម្មក្រឡុកស៊ីម៉ង់ត៍ ម្ចាស់រថយន្តដឹកទំនិញ គ្រប់ប្រភេទរថយន្តឈ្នួលដឹកអ្នកដំណើរ និងម៉ូតូសណ្តោងរ៉ឺម៉កគ្រប់ប្រភេទ គឺហាមធ្វើចរាចរឆ្លងកាត់កំណាត់ មហាវិថីឈ្នះឈ្នះ ពីគល់ស្ពានព្រែកព្នៅរហូតដល់ផ្លូវជាតិលេខ ៦ ចាប់ពីវេលាម៉ោង ៥ និង០០នាទី រហូតដល់ បញ្ចប់កម្មវិធី។
ចំពោះរថយន្តធុនធំ រថយន្តដឹកទំនិញ និងរថយន្តទេសចរណ៍ ដែលធ្វើចរាចរតាមផ្លូវជាតិលេខ ៥ ត្រូវឆ្លងទៅផ្លូវជាតិលេខ ៦ និងពីផ្លូវជាតិលេខ ៦ ឆ្លងមកផ្លូវជាតិលេខ ៥ ត្រូវពង្វាងចរាចរឆ្លងកាត់ តាមស្ពានព្រែកក្តាមវិញ៕

អត្ថបទ៖ ស្រីរ័ត្ន