ផ្លូវ​ថ្មើរជើង​ក្រោម​ដីខេត្ត​ព្រះសីហនុ ដាក់​ឲ្យប្រើប្រាស់​ជាផ្លូវការ

ភ្នំពេញ៖ ផ្លូវក្រោមដីសម្រាប់អ្នកដំណើរថ្មើរជើងចំនួន ២ កន្លែង នៅ តាមបណ្តោយផ្លូវជាតិលេខ៤ នៅ ខេត្តព្រះសីហនុបានដាក់ឱ្យដំណើរប្រើប្រាស់ជាផ្លូវការហើយ។

លោក ឃាង ភារម្យ អ្នកនាំពាក្យសាលាខេត្តព្រះសីហនុបានមានប្រសាសន៍នៅព្រឹកថ្ងៃទី១៤ធ្នូនេះថា ផ្លូវក្រោមដីសម្រាប់អ្នកដំណើរថ្មើរជើងចំនួន២កន្លែងនៅតាមបណ្តោយផ្លូវជាតិលេខ៤នៅខេត្តព្រះសីហនុបានដាក់ឱ្យដំណើរប្រើប្រាស់ជាផ្លូវការដោយមានប្រជាពលរដ្ឋក៏ដូចជាបងប្អូនកម្មករកម្មការិនីបានឆ្លងចេញចូលជាប្រចាំ។

ផ្លូវក្រោមដីសម្រាប់អ្នកដំណើរថ្មើរជើងចំនួន២កន្លែងនេះ ធ្វើឡើងសម្រាប់សិស្សានុសិស្ស និងកម្មករ កម្មការិនីឆ្លងកាត់ ក្នុងគោលបំណងដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ ដែលអាចកើតឡើងជាយថាហេតុណាមួយ។

គួរបញ្ជាក់ថា ផ្លូវក្រោមដីសម្រាប់អ្នកដំណើរថ្មើរជើងចំនួន ២កន្លែង នៅតាមបណ្តោយផ្លូវជាតិលេខ៤ នៅខេត្តព្រះសីហនុនេះត្រូវបានបើកការដ្ឋានជាផ្លូវការកាលពីថ្ងៃទី១៤ ខែកុម្ភៈ ឆ្នាំ២០២០ដោយ ផ្លូវក្រោមដីនីមួយៗ មានប្រវែង ៥៣ម៉ែត្រ ទទឹង៧ម៉ែត្រ និងកម្ពស់ ៣,២ម៉េត្រ ដោយមួយកន្លែងស្ថិតនៅចំពីមុខវិទ្យាល័យ ហ៊ុនសែន ឃ្លាំងលើ និងមួយកន្លែងទៀតស្ថិតនៅទីប្រជុំជនរោងចក្រ៕

អត្ថបទ៖ សំអឿន