ព័ត៌មានជាតិ

អ្នកនាំពាក្យ ៖ កូវីដ-១៩ មិនទាន់ប៉ះពាល់ដល់កម្មករ កម្មការិនី ណាម្នាក់នៅឡើយទេ

បានផុស

៣ years មុន

នៅ

ថ្ងៃចន្ទ ៧ ធ្នូ ២០២០

ដោយ

លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានអះអាងនៅថ្ងៃទី៧ ខែធ្នូនេះថា ឥទ្ធិលពល នៃការចម្លងវីរុសកូវីដ-១៩ ចូលសហគមន៍ មិនទាន់ជះផលអាក្រក់លើវិស័យកាត់ដេរសម្លៀកបំពាក់និងផលិតស្បែកជើងនៅកម្ពុជានៅឡើយទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការងារ បានលើកឡើងថា៖នេះក៏ដោយ សារតែរាជរដ្ឋាភិបាលបានគ្រប់គ្រងសភាពការណ៍បានល្អនិងមានការយកចិត្តទុកដាក់ខ្លាំងទៅលើវិស័យកាត់ដេរសម្លៀកបំពាក់ និង ផលិតស្បែកជើងតាំងតែពីដើមទីមក ។ ម្យ៉ាងទៀតការចម្លងវីរុសកូវីដ-១៩ នៅពេលនេះមិនទាន់ឆ្លងដល់សហគមន៍អ្នកធ្វើការនិងជាពិសេសមិនទាន់ប៉ះពាល់ដល់កម្មករកម្មការិនីណាម្នាក់នៅឡើយទេ ។

អ្នកនាំពាក្យក្រសួងការងារបានបន្តថា៖បើទោះជាការចម្លងវីរុសកូវីដ-១៩ចូលសហគមន៍មិនទាន់ជះឥទ្ធិពលលើវិស័យកាត់ដេរសម្លៀកបំពាក់និងផលិតស្បែកជើង និងកម្មករនិយោជិតយ៉ាងណាក៏ដោយ តែក្រសួងការងារក៏ដូចជារាជរដ្ឋាភិបាលបានយកចិត្តទុកដាក់និងបង្ការបញ្ហានេះជាមុន។

សូមជម្រាបជូនថា ផលប៉ះពាល់ដែលបណ្ដាលមកពីឥទ្ធិពលកូវីដ-១៩ គិតត្រឹមដើមខែវិច្ឆិកានេះគឺបានធ្វើឲ្យរោងចក្រចំនួន១១៦ ត្រូវបិទទ្វារ ដែលក្នុងនោះមាន កម្មករនិយោជិតចំនួនជាង៦ម៉ឺននាក់ (៦០ ៩៩១នាក់)។ ចំនួននេះមានការកើនឡើងបន្តិចបើធៀបទៅនឹងរយៈកាលដូចគ្នាក្នុងឆ្នាំ២០១៩ ដែលមានរោងចក្រចំនួន១១២បានបិទ និងប៉ះពាល់ដល់កម្មករនិយោជិតចំនួនជាង៥ម៉ឺននាក់ (៥៥ ៥៤៦២នាក់)៕

អត្ថបទ ៖ ណារី